Laudatio zur Ernennung von Peter-Heinrich Brix zum 1. UNESCO-BOTSCHAFTER FÜR DAS NIEDERDEUTSCHE THEATERSPIEL

Transkript

1 Laudatio zur Ernennung von Peter-Heinrich Brix zum 1. UNESCO-BOTSCHAFTER FÜR DAS NIEDERDEUTSCHE THEATERSPIEL Sehr geehrte Damen un Herren, leeve Frünnen vun dat nedderdüütsche Theoter, leeve Peter! Wenn een Mann sösstig worrn is un dat hett een Keerl un Künstler as Peter-Heinrich Brix drapen, denn is intwüschen allens över em seggt worrn, wat sick seggen lett. Allens, wat man över em al weet oder ok nich weet, nich mol he sülben. Denn sünd ok all kloken un dömlichen Frogen al stellt worrn, wohrschienlich ok de, Peter- Heinrich, wat Du ok splitternaakig spelen wöörst. Wat blifft uns nu also noch? Der Rest ist Schweigen, as de Dichter seggt? Nee, ganz so eenfach wüllt wi uns dat nu nich moken! Denn wi weet jo dörch een gewissen Siegmund Freud, dat jedeen Minsch ok noch Afsieden hett, in de man nich so recht rinkieken kann. Dat dat jümmer noch wat gifft, vun wat de Welt nix weet. Üm dor nu bi Peter-Heinrich n beten Licht rintobringen, hebbt wi denn berühmten Kommissar Geiger denn Opdragg geven, hier Ermittlungen antostellen. Un de hett natürlich sien Bekanntschaft mit een dicken katholschen Preester ut Bayern utnützt un em üm Hölp beden. Un de hett denn so n beten op Latinsch nahdacht un blots seggt: Nomen est omen. Un wohrhaftig! Dor is uns een Steen vun n Harten fullen! De Naam Peter kümmt jo vun Petrus, un Petrus heet Felsen! Tja, mutt man noch mehr seggen? Ahn düssen Naam keem de heele Christenheit in t Rullen! Twors gifft dat ok denn Struwwelpeter (ganz nebenbi weet Se egenlich, dat Peter-Heinrich Brix mol richtige Lockenpracht harr?), dat gifft ok denn Miesepeter, denn Swatten Peter un denn Zegenpeter, dat dröppt op uns Peter-Heinrich jo nu würklich nich to un kann ünner Kinnerkram afhokt warrn. 1

2 Un wat is mit sien tweeten Naam Heinrich? Al dörch de Märken ut uns Kinnertied weet wi jo, dat de Antwoort op denn Satz Heinrich, der Wagen bricht! vun een Minschen stammt, de dat Musterbild vun Truu un Redlichkeit weer. Un denn gifft dat in de Weltgeschicht jo ok de Heinrichs mit n Nummer achter ehrn Naam un mit n Krone op ehrn Kopp. Leider hett de een oder anner vun düsse Heinrichs wat gegen de Köpp vun anner Lüüd hatt un hett de ok mol afslaan laten, so as een Heinrich mit de Nummer Acht in England ok bi twee vun sien Fruuns. Aver dat is jo al fiefhunnert Johr her un düsse Schann is dörch Lüüd, de de Fruuns över de Maten leev harrn so as to n Bispill Heinrich Heine - al lang n wedder reinwuschen. Een anner Heinrich hebbt se mol an n Kopp smeten: Heinrich, mir graut vor dir!, aver de unglückliche Blondine, de dat seggt hett, weer dorbi al to n groten Deel in geistige Ümnachtung. Över Heinrich denn Löwen hett woll ok al mol jedeen wat höört, un mennigeen fraagt sick hüüt natürlich, worüm se dormols unsen Peter-Heinrich nich ok so nöömt hebbt, as he noch mit n lange Mähne un grote Sprüngen op n Footballplatz an t Jagen weer. To denn Naam Brix mutt man gor nich veel seggen. Denn dörch een lüttet Dörp in Gallien weet wi jo, dat de Naam vun wohre Helden op -ix enden deiht... Wenn nu een Minsch för wat Besünners vörsehn is, oder wenn em besünner Opgaven anvertruut ward, heet dat jo faken ihn ereilte der Ruf. So is dat mol ok een anner Heinrich gahn. De weer Herzog vun de Sachsen, un denn ereilte der Ruf Kaiser to warrn jüst bi t Vagelfangen. Dat weer dormols so n Ort vun Sport. Woans uns Peter-Heinrich to sien wohre Bestimmung funnen hett, hett ok wat mit Sport to dohn. Aver bi em müß dat nich heten ihn ereilte der Ruf in der Morgenfrühe sünnern ihn ereilte der Schmerz im Sprunggelenk. He muss nu eernsthaftig doröver nahdenken, wat dat neben Football noch anner Vergnögungen geev, an n besten so n, de de Gelenke nich so belasten. Un dor is 2

3 Peter-Heinrich folgerichtig op dat Theoterspelen kamen. Natürlich hett he toeerst een Bühneneignungsprüfung afleggt. Un twors bi de Füürwehr. Wenn nu een nich glöövt, dat de Füürwehr för sowat ok tostännig sien kann, denn will ick kort mol von een Fall ut Schwerin vertellen. Dor harr n lütt Deern een Onkel bi de Füürwehr. Un as de lütte Deern an een schönen Hilligavend ünner n Dannenboom een Gedicht opseggt harr, hett düsse Onkel seggt: Also, de Deern is so begabt, de mutt an t Theoter! Un se is wohrhaftig düssen Wegg gahn un is een grote Künstlerin worrn een Tänzerin. Man dat Ümstiegen vun Gummistevel in Ballettschoh keem jo nu för Peter-Heinrich nich in Fraag vunwegen de Sprunggelenke. Aver dat gifft jo an t Theoter ok Opgaven, bi de man sick blots enigermaten manierlich op de Bühn bewegen un Text opseggen mutt. Un dorbi so doon, as weer man dat nich sülben. Un jüst dat kunn Peter-Heinrich bannig goot. Een Zeitung hett schreven, sien Talent harr sick entfaltet. Dat klingt so, as harr he dat al jümmer in tosamenklappten Tostand bi sick dragen un dat sülben gor nich markt. Mokt jo ok nix, denn för sowat gifft dat ja in hogen Norden jo de Nedderdüütsch Bühn Flensborg, sotoseggen as Radarstation, de jo al allerhand heemlich un unheemlich Talente ut denn Küstennevel in t Rampenlicht bröcht hett. Un dormit natürlich ok in de Zeitungen, in de man bi t Entfalten vun de Kultursieden bald lesen kunn: een gewissen Peter-Heinrich Brix weer irgendwie sympathisch, köstlich naiv, überzeugend dekadent oder ok energisch brutal. Villicht hett sick Peter-Heinrich grad bi t Lesen vun düsse Rezensionen dacht, dat man dat jo allens ok op Hochdüütsch vör de Lüüd bringen kann, denn mit düsse Spraak keem he jo ok ganz goot torecht. Un em keem villicht ok in den Sinn, dat n Barg Wege nich blots nah Rom führt, sünnern ok in anner Städte, wo Theoter speelt ward. Sülfst Hamborg is em dorbi infullen. Un, leeve Peter, dor hebbt wi uns denn jo ok kennt lehrt, weetst Du noch: dormols an t Ernst-Deutsch-Theoter un bi de Holsteener Komödianten. 3

4 Tja, allens anner vun Peter-Heinrich weet wi. Un wer verpasst hett, wat to sienen Sösstigsten allens över em to lesen, to höörn un to sehn weer, de mutt even aftöven, bet een Book rutkümmt mit denn Titel Peter-Heinrich Brix und sein Beitrag zum norddeutschen Menschenbild des 20. und 21. Jahrhunderts. Dat so een Book schreven ward, dorvun sünd wi fast övertüügt, denn Peter-Heinrich hett jo denn Minschenslagg vun uns plattdüütsch Weltendeel to veele Frünn verhulpen, de nu dörch sien Figuren weet, dat de norddüütsche Minsch Genie in n Bregen, Kultur in n Sinn un Leev in t Hart driggt. Un dat dat bi uns Grotstadtreviere gifft, wo de Polizei ganz, ganz anners arbeit as in denn Rest vun de Welt. Un dat dat Dörper bi uns gifft as Büttenwarder, wo sick dat noch beter un spaßiger leven lett as in dütt lütt Dörp in Gallien, wiel hier bi uns de Kraft un Herrlichkeit nich dorvun afhännig sünd, wat dütt Johr de Misteln goot wussen sünd. Peter-Heinrich hett düsse un anner Botschaften ok jümmer wedder op Platt in de Welt schickt, un dorför sünd wi em ganz eernsthaft groten Dank schüllig. He hett uns Spraak to Sympathie un Ansehn verhulpen, un he wiest uns un anner, dat sinnigen Humor een vun de besten Middel dorför is. As wi nu an t Överleggen weern, woans wi em dorför ehren köönt, keem glieks toeerst de Vörslagg: een Titel mutt her! Denn jedeen Minsch, de wat gellt, kriggt een Titel. Dat weer al jümmer so. Al Abraham hett denn Titel Vater der Völker kregen, un bet hüüt hett sick dat mit de Titelei düchtig wiederentwickelt. Denkt wi doch blots an Königin der Herzen oder Mutter der Nation, Ikone der Popmusik oder König von Mallorca! Een Vörslagg för so een Titel weer Leuchte des Nordens, aver de is glieks wedder aflehnt worrn, wiel dat al een Fernsehsendung gifft, de so heet un man dor as Sieger een Ding in de Hand drückt kriggt, dat woll een Latüücht sien schall un so hässlich is, dat man een deepen un düstern Keller bruukt, üm dat Dings to versteken. Mit sowat schall Peter-Heinrich op keen Fall in Tosamenhang bröcht warrn. 4

5 Een goden Vörslagg weer egentlich Steern vun Angeln, aver dor keem de Bedenken op, dat Peter-Heinrich denn villicht ut Bescheidenheit aflehnen kunn. Wi hebbt uns also noch mol theologisch künnig mokt, un de dicke Preester ut Bayern hett uns eenfach poor Bibelstellen nöömt. As wi de nahlest hebbt, weern wi midden in de Apostelgeschicht. Apostel? Wöör dat op Peter-Heinrich passen? Aver weern de to ehr Tied nich in ganz anner Himmelsrichtungen togang n? Goot, een Utnahm gifft dat: In t Krüüzwoorträtsel ward faken nah een Apostel der Grönländer fraagt. Aver mol ehrlich: Köönt Se sick Peter-Heinrich bi een plattdüütsche Predigt in de arktische Tundra vörstellen? Aver is dat nich egentlich ok ganz egaal, wohen de Botschaft dragen ward, wat Plattdütsch för n wunnerbore Spraak is? Un süh dor mit dat Woort Botschaft hebbt wi dat Problem doch al bi de Ohren kregen! Botschaft dat klingt doch binah so n beten nah Wiehnachten, nah Frohe Botschaft. Dat gifft twors ok jichtenswo dat Woort Die Botschaft hör ich wohl, allein mir fehlt der Glaube, naja, aver dor besteiht bi Peter-Heinrich as Botschafter keen Gefohr, denn he is een Minsch, denn man glöövt, un dat to Recht. Botschafter! Genau, dat is doch de richtige Titel! Dat klingt nah Verkünnigung un Diplomatie. 1. Unesco-Botschafter för dat nedderdüütsche Theoterspeel dat höört sick nich blots goot an, dat is ok een Rull, de Peter-Heinrich op n Liev schreven is. Aver nich blots as Bühnenrull, sünnern ok as persönlich Charakterrull. Ick heff nu blots noch de Fraag, wat wi em nu ok jichtenswo een Botschaft henboon mött. Man, woans dat hüüt mit de Bookosten so löppt, weet wi jo. Un dorüm... villicht langt dat jo ok, wenn dor, wo dat to sien Hoff in Angeln afgeiht, een Schild an de Straat steiht: Residenz des Niederdeutschen Botschafters?! Ach so, un noch wat: Ick heff dor mol sowat höört oder lest - mutt man een n Botschafter egentlich mit Exzellenz anreden? Leeve Lüüd, seggt, wat ji wüllt, för mi blifft he liekers Peter-Heinrich! 5

6 Leeve Peter-Heinrich, hartlichen Glückwünsch to düssen wunnerboren Titel!! Kiel-Molfsee / 24. Niederdeutsches Theatertreffen 12. Juni 15 6