Gottesdienst mit Jodlermesse

Transkript

1 Gottesdienst mit Jodlermesse So 11. Jan. 2015, 9.30 Uhr, Zwinglikirche Musikalische Gestaltung: Jodelclub Schwyzerhüsli, geleitet von Erika Wild Rebekka Hofer Tillmanns, Orgel Jodlerclub Schwyzerhüsli aus Dübendorf Liturgie und Predigt: Pfr. Markus Vogt Thema: Geschenkte Zeit Text: Epheser 5, Lesungstext Lukas 2, (Simeon vertraut darauf, den Heiland zu sehen) Lesung Predigttext Epheser 5, Achtet nun sorgfältig darauf, wie ihr euer Leben führt: nicht als Toren, sondern als Weise! Kauft die Zeit aus, denn die Tage sind böse. Seid also nicht unverständig, sondern begreift, was der Wille des Herrn ist. Lasst in eurer Mitte Psalmen ertönen, Hymnen und geistliche Lieder, singt und musiziert dem Herrn aus vollem Herzen, und dankt unserem Gott und Vater allezeit für alle Dinge im Namen unseres Herrn Jesus Christus. E gschänkte Tag (nach Lesung) Wenn der Himmel voller Wulche steit, git es Tage, wo di nüt meh freut, de vergiss im Läbe nie, dass alli Wulche wyter zieh Bringt e ruuche Luft dir Frosacht und Schnee, chasch din Wäg und au dis Ziel nid gseh, ja, de chunnt au mal die Zyt, wos wieder Alperose git Steit de d Sunne guldig überm Tal, dank derfür und sing und jutz es Mal. Freu di dra, vergiss di Chlag und dänk, es syg en gschänkte Tag

2 Predigt Liebi Mitglieder vom Jodlerclub Schwyzerhüsli, liebi Gmeind, liebi Gäscht Es isch e sältsami Redewändig, wo mir vorhär im Predigttext ghört händ: Kauft die Zeit aus! Uusverchauf: Ja, das känned mir us de letzschte Wuchene. Es heisst zwar hüt oft Sale überall uf grosse Plakat. Uusverchauft wird allerdings nöd Ziit, sondern meistens billig produzierti Ware. Ziit isch Gäld - heisst e Redewändig us oisere Ziit. Jedi Stund wird monetär verrächnet. Es mues effiziänt und möglichst ziitsparend gschaffet werde. Vil effiziänter, na meh Hamsterrad sii, wie mir das i oisere Gsellschaft praktiziered, isch chum meh möglich. Doch eso isch s Wort vom Apostel bestimmt au nöd gmeint. E weisheitlichi Iisicht sait zu oisere knappe Ziitiiteilig: Wohlstand ist, wenn Menschen mehr Uhren haben als Zeit. Es isch sowieso echli rätselhaft mit däre Ziit. Eine, wo sich vil Gedanke drüber gmacht hät, de Chilevater und Philosoph Augstinus, saits ehrlich: Was also ist die Zeit? Wenn mich niemand fragt, weiss ich es. Wenn ich es jemandem erklären will, der fragt, weiss ich es nicht. Au wänn mir nöd emal so gnau bestimme chönd, was Ziit im Grund isch. Ziit uuschaufe meint wohl, d Ziit sinnvoll z nutze; au drum, wil mir ja nie wüssed, wievil Ziit ois na gschänkt isch. Damals händ vili Christe i de Erwartig gläbt, dass s Ändi vo aller Wältziit bald bevorstaaht. Dass öppis aabricht, wo ganz vo Gott här neu gstaltet wird. Allerdings, scho i biblischer Ziit isch formuliert worde: 1000 Jahr sind für Gott wie 1 Tag. Also läbed mir so grächnet - 2 Täg nach Christus. Vo Gott här isch nanig vil Ziit vergange. Aber i was für ere Ziit läbed mir, i mängem wie scho damals? D Fortsetzig vom biblische Text sait drufabe: Die Tage sind böse. Gwalt, Verfolgig, Underdrückig hät d Mänsche belaschet.

3 D Täg sind bös : Das müend au mir hüt säge. Under em Iidruck vo de letzschte Wuche isch es unübersehbar. Was wältwiit a Attentat in Nigeria, in Pakistan, und - für ois nächer - in Paris passiert isch: So unbegriiflich, so schmerzlich, was Mänsche andere aatüend - und debii überzüügt sind, us em Wille vo Gott z handle. Nei, ganz und gar nöd: Füehrendi Verantwortlichi us de verschiedene Religione - vo Gruppierige au, wo mer das chum erwartet hetti - händ das tüütlich gmacht: Das hät nüt mit Glaube z tue. Das isch fähl- und irregleitet, was da gscheh isch. Die Tage sind böse : müend mir aafangs vo 2015 konstatiere. Es isch 2000 Jahr später - oder i Gottes Ziiträchnig 2 Täg später chum besser. Aber das isch im Grund alles sehr wiit oder rächt wiit ewäg. Wänded mir de Blick uf oisi Läbenswält! Wie gönd mir mit oisere Ziit um, wänn oisi Täg bös werded? Wänn mir persönlich nüme wiiter gsehnd, wänn ois Schwärs trifft, und mir vomene Liebste und Nächste Abschied nää müend. Da wärded Täg schwär, belaschtend und schleppend, wie d Ziit vergaaht. Wänn ich nur scho en Schritt wiiter wär? Wänn ich nur scho über em Bärg wär? Da giits meistens keis Rezäpt, wies chan rasch besser werde. Das bruucht Ziit. Schritt für Schritt, wieder Zueversicht z empfange und em Funke vo de Hoffnig wieder Ruum gää. Die Zeit heilt Wunden. bewährt sich nöd immer, aber doch mängisch. Doch das eleige langet wohl nanig. Es bruucht es Begleite, won ois vo de böse Täg wägfüehrt. Da sind emal verständnisvolli Wort und iifühlsams Begägne, won ois tröschtlich stimmed und guet tüend. D Fortsetzig vom biblische Wort giit en wiitere Impuls, wo mir bedänke möged: Singt und musiziert dem Herrn aus vollem Herzen, und dankt unserem Gott und Vater allezeit. Nöd, dass mer da immer mit iistimme chan.

4 Aber es chan scho guet tue, mit debii z sii, sich mitnää z laa, und berüehrt werde von ere andere Stimmig. Singe und Musiziere schänkt ois Momänt vom Uufghobesii und Troscht. In ere Art, wies ebe nur d Musik zum Uusdruck bringe chan. Und das gilt bestimmt au fürs Jodle! Grad d Jodellieder spräched immer wieder au de Chummer, d Chlag und di ruuchi Ziit aa, wo chum öpper devoo verschont wird. Aber sie finded de Wäg und de Blick uuf z tue: Uf e Freud, wo vilicht ganz unschiinbar erschiint. Und kostbar isch de Blick i d Natur, i d Schöpfig vo Gott: en Sunnestrahl, e Blueme, es Liechterläbnis. Und scho passiert öppis i oisne Herze. Und mir chönd tanke säge: Vilicht zerscht zaghaft, doch behutsam wachst öppis Neus. Dankbar sii isch i de Jodellieder, aber ebe au i de biblische Wort es Grundthema. Nie uufgää, immer wieder in e dankbari Haltig finde. Das bruucht mängisch gar kei Wort. Tänked mir an Jodel sälber. I de Definition heisst echli hölzern: Jodeln ist Singen ohne Text auf Lautsilben bei häufigem schnellen Umschlagen Jo-la-dait-tijo Hola-dait-tijo und so wiiter. Es sind Gfüühl, wo zum Uusdruck chömed. Gfüühl vom Stuune, vo de Dankbarkeit, vom gschänkte Tag und em gschänkte Läbe - trotz und wohl au gäge alles Bösi und Schwäri isch es, es sich öffne für e Wält voller Wunder. Mir händ s gsunge im Jodellied vor de Predigt: Freu di dra, vergiss di Chlag und dänk, es syg en gschänkte Tag. Es isch im Grund e läbensnächi Uusleggig vom biblische Wort, wo mir hüt bedänked. Singt dem Herrn aus vollem Herzen, dankt unserem Gott und Vater allezeit für alle Dinge im Namen unseres Herrn Jesus Christus. De Simeon, wie mirs i de erschte Läsig ghört händ, hät zwar e ganzes Läbe lang müese druf warte, bis zu däm erlösende Momänt, dass sich siini tüüfschti Hoffnig erfüllt hät.

5 Da hoffed mir doch, dass es für ois nöd ganz eso lang gaaht. D Botschaft vom Evangelium isch ois siit Wiehnachte gschänkt. Es isch nanig lang här, dass mir das gfiiret händ. Jesus Christus isch uf d Wält cho. Isch er au i oisne Herze gebore? Händ mir d Auge offe, für di gschänkti Ziit, für jede Tag, won ois neu is Stuune und Dankbar sii füehrt? Immer wieder möged mir so oder ähnlich iistimme: Steit de d Sunne guldig überm Tal, dank derfür und sing und jutz es Mal. AMEN Orgel Heb Vertuiwe Musik und Text: Jost Marty (während Abendmahl) Hesch du einisch Sorge, drückt dich s Läbe schwär, plagt dich herbä Chummer, der Alltag isch so läär. S Läbe bringt au Freude, nimm si dankbar aa, wird nüd übermüetig, denn s Glück cha schnäll vergaah. Darfsch ja nüd verzage, der Herrgott isch nu da, darfsch ja nüd verzage, der Herrgott isch nu da! Heb Vertruiwe, chasch zuenem gah, heb Vertruiwe, er lost dich aa. Heb Vertruiwe, er nimmt dich aa: muesch nur Vertruiwe ha! Heilig, isch der Herr (während Abendmahl) Mit Dym Säge Musik und Text: Jost Marty (Schlusssegen) 1./2. Mit Dym Säge wemmer gah, mit Dym Säge chömmer bstah. Dyni Gnad und Hilf und Kraft, üsers Làbe glücklich macht. 1. D Freud, sie strahlid us hei i jedes Huus. Und mit frischem Muet gratet d Arbet guet. Überwunde wird der Schmärz, mit me frohe Härz. 2. Eister zäme ha - treu zum Hergott stah. Fort mit Zank und Stryt Friede alli Zyt. Alls us Liebi für-ä-nand: blybst i Gottes Hand. Ja mit Dym Säge, ja mit Dym Säge, wird s üs immer guet im Läbe gah. Ja mit Dym Säge, ja mit Dym Säge, wird äs guet üs gah.