Rede zum 1.August 2018 in Lindau von Pfrn. Monika Burger 1. am Tisch mit 3 Männer Werte Gmeindrat, liebi Lindauerinne und Lindauer, liebi Gäst

Transkript

1 Rede zum 1.August 2018 in Lindau von Pfrn. Monika Burger 1. am Tisch mit 3 Männer Werte Gmeindrat, liebi Lindauerinne und Lindauer, liebi Gäst Mir sind die letschte zwei Wuche am Meer i de Ferie gsi. Det bin ich mit eme Glas Rotwii am Strand gsässe und hand de Blick id Wiiti vom Meer lah schweife. Ich weiss nöd, öbs d Hitz gsi isch, aber näbe mir am Tisch sind plötzlich drü Männer gsässe. Sie sind altertümlich agleit gsi, mit lange Bärt und zerzaustem Haar. Zerst hani gmeint, es siges Männer us de Bible, villicht Prophete. Aber denn händ sie Schwyzerdütsch gredet, wenn au es urchigs Schwiizerdütsch. Sie händ sich als Walter Fürst, Werner Stauffacher und Arnold von Melchtal vorgstellt. Ich heig sie i mine Gedanke grüeft. Sie händ aber au Frage a mich gha. De Werner Stauffacher vo Schwyz häts wundergnoh, was sich i de letschte 727 Jahr sit ihrem Rütlischwur so tah hät. Was isch us ihrem Bund worde? Händ ihri Nachkomme de Eid ighalte, gmeinsam gäge die tyrannische Vögt z kämpfe? 2. Was hät sich sither da? Ja, han ich ihne erklärt, de Bund het sich ghalte. Und er isch sogar no usgwiitet worde. So sinds hüt nüme 3, sondern 26 Kantön, wo 4 Sprache und unzähligi Dialekt gredt wärded. Das hät alles viel komplizierter gmacht. Es ghöred jetzt Städt und ländlichi Gebiet dezue, i dene isgesamt guet 8 Mio Mänsche läbed. Sie händ mich mit grosse Auge aglueget: 8 Mio Mänsche und 4 Sprache? Ich ha gmerkt, sie händ kei Vorstellig, was das bedütet. Und irgendwie han ich das ja au nöd. Über Flughäfe, Autobahne, Gotthardstau hani ihne nüt welle verzelle bsunders nöd em Walter Fürst em Urner. Das wär usguuferet. 1

2 Es hät sich sehr viel veränderet, sit oiem Eid, wo ihr gschwore händ. Aber de Bund hät immer no Bestand! Das fiired mir jedes Jahr am 1. August i de ganze Schwiiz! De Walter Fürst isch mer is Wort gfalle: was meinsch du mit de ganze Schwiiz hät er welle wüsse. Wo d Gmeinschaft vom Bund immer grösser worde isch, hät mer en gmeinsame Name gsuecht. Jetzt sinds grad 170 Jahr här, dass de Bund offiziel Schwiiz heisst. De Werner Stauffacher vo Schwyz hät sich z friede zrugg glehnt und en grosszügige Schluck us sim Glas gnoh. Aber de Arnold vo Melchtal us Unterwalde hät das offesichtlich gwurmt. Werum grad Schwiiz? hät er schüüch gfröged. De Werner Stauffacher hät glached und gmeint, meinsch Hinter- Entschuldigung Unterwäldler wär en passende Name gsi?. De Walter Fürst hät lut mitglached. Es isch aber scho klar worde, dass es ihm lieber gsi wär, wenn d Schwiiz hüt Uri würd heisse. Bevor die andere no Witz über Uri mached, hät er lieber e anderi Frag gstellt: Was mached ihr denn so a dem Fest? I jedem Dorf trifft mer sich am 1. August am Abig. Es git zässe und z trinke, für d Chind gits en Lampion, so e Art en Fakelumzug, d Nationalhyme, oises gmeinsame Lied wird gsunge und öpper dörf e Red halte. In Lindau, eme Dorf im Züribiet, dörf ich das Jahr e Red halte. Du? De Walter Fürst hät s nöd chönne fasse. En Momänt sind alli ruhig gsi. Bis de Walter Fürst gmeint hät: sit wänn hät s Wiibervolk denn öppis zsäge? De Werner Stauffacher seit zum Arnold von Melchtal: stell der mal vor, dini Vrone würd welle rede. Sie händ lut useglached, bi de Vorstellig, dass ihri Fraue oder Müettere chönnted öffentlich rede. Da bin ich scho chli betüpft gsi. 2

3 Es isch nonig lang här, han ich ihne erklärt, erst vor 50 Jahr häts e Art e Revolution gäh, wo sich d Gsellschaft, wie mir zämeläbed sehr verändert hät. D Generation vode 68er hät oises Verständnis vo Glichberechtigung, sexueller Selbstbestimmig, Toleranz und Meinigsfreiheit veränderet. Fraue händ ändlich die gliche Möglichkeite und Chance wie ihr Männer. Jede Mänsch, öb Ma oder Frau, Buur oder Gstudierte dörf sini Meinig säge und läbe wie er will. Natürlich nume wenn er de andere nöd schadet. Niemert dörf ois meh säge, wie mir z läbe händ. Ihr händ ja fürs gliche kämpft oder nöd? Ihr händ oi nöd vo de Habsburger Vögt welle la unterdrucke, sondern selber bestimme. Ja, das stimmt natürli, händ die drü gseit, aber grad so wiit, wäre mir damals ned gange. Aber wenn mer die Freiheit so wiiterdänkt? Ja, denn händ ihr das scho richtig gmacht. 3. Für was kämpfed ihr denn hüt? Für was kämpfed ihr denn hüt? hät de Arnold von Melchtal denn welle wüsse. Jetzt bin ich für en Moment still gsi und han überleit. I de Schwiiz händ mir nöd viel Problem: ois gaht sehr sehr guet. Luxus seit mer dem. Mir chönd im Friede läbe, händ Sicherheit und en unglaublich höche Lebensstandard: Es guets Sozialsystem, Lohnvorschrifte, kostelosi Schuel, es unglaublich guets Gsundheitssystem, strengi Vorschrifte zur Sicherheit, politischi Mitbestimmig. All das giltet für alli, nöd nume für e oberi Schicht und die Riiche. Aber dä höch Lebensstandart gaht uf Choschte vo anderne: Oisi Kleider und s Gmües wird wiit wäg vo da under schlimme Bedingige hergstellt. D Arbeiter überchömed en Lohn, wo chum zum Läbe langed, kei Schutz vor giftige Substanze. Scho Chind müend schaffe, damit d Familie 3

4 gnueg zässe händ. Viel müend wie Sklave läbe, nume damit mir da i de Schwiiz ständig noii Sache chönd chaufe, wo so billig sind, dass mir sie grad wieder wegrüered. D Lüüt i de Schwiiz laht das eigentli nöd chalt. Sie händ es schlechts Gwüsse, sind aber hilflos, wie mer das chönnt ändere. Ois i de Schwiiz gahts sehr guet, aber de Priis, wo mir defür zahled, isch e inneri Zerrisseheit. I de Länder um ois ume, und das nimmt ois natürlich nöd us gits e Bewegig, wo s Erreichte zerstört. Es git schlichend e moralische Verschiebig: Wert, wo ihr und die Generatione zwüsched ois härt erkämpft händ, wärded ufgäh. Eis Biispiel isch d Mänschlichkeit. Wenn mir Mänsche uf de Flucht vor Hunger, Krieg und Hoffnigslosigkeit bewusst ertrinke lönd, zum anderi abzschrecke, wärded sie entmänschlicht und ihres Läbe hät offesichtlich weniger Wert als oises. D Grenze vom Sägbare wärded langsam Schritt für Schritt verschobe. Das, wo vor churzem no undenkbar gsi isch, zum öffentlich säge, wird schnell als normal aglueget. Mer dörf sich öffentlich über Behinderti lustig mache, behaupte, d Chind vo Flüchtling siged verschlage, in Italie einzelni Mänschegruppe wie Romas zelle oder wie in Östriich vo de Registrierig vo Mitglieder vo bestimmte Religione fantasiere. All das mached offizielli Regierigsmitglieder! Das isch, wie wenn oii Urenkel d Macheschafte vo de Habsburger hätted welle ifüehre. Die drüü sind entsetzt. Wie schaffed die das? Wered sich d Lüt nöd gäge so Idee? fröged de Werner Stauffacher. Sie schaffed das, will sie Ängst bi de Lüüt schüüred oder au reali Ängst aspreched, wo mir no kei Antwort und Lösig druf gfunde händ. Will es git ja au würklich Problem, wo mir dringend müend löse: Verhinderig vo Altersarmuet, glichi Bildigschance für alli Chind, bezahlbare Wohnruum, dass d Lohnschär nöd so wiit usenand klafft. 4

5 All die Problem händ mir würklich, aber die z löse isch halt kompliziert und bruucht Ziit. Debii wänd d Mänsche eifach ernst gnoh wärde. Mit ihrne Ängst. Das Gfühl gänd ihne die sogenannte extreme Rechte, wo zeiged, wovor mer vermeintlich Angscht haa müend. Debii zerstöred sie alles, wo über Jahrhunderte ufbout und erkämpft worde isch a Wert. Eis Biispiel vo de Schwiiz: mir händs trotz grosse Krieg um ois ume gschafft, dass mir nöd dri zoge wärded und händ ois i de Friedensbewegige und Friedensverhandlige bi andere igsetzt. Mir sind weltwiit gachtet für das. Glichziiitig verkauft oisi Regierig und mit dem mir alli, immer wie meh Waffe a anderi Länder. Dur das wärded Waffe i Länder glieferet, wo ime Krieg mit andere, aber au gäg sich selber, sogenannte Bürgerkrieg, stecked. D Ussicht uf wirtschaftliche Gwünn isch somit grösser als Wert, wo mir härt erkämpft händ, vertretet und hoffentlich au läbed. De Werner Stauffacher lueged mi a und fröged: Isch das so, wie wenn mini Enkel de Habsburger Waffe verkaufed, damit die wiiteri Völker chönd underdrucke? Isch ihne s Geld, wo si demit verdiened wichtiger als alles andere? Und das, obwohl ihr ja ime Wohlstand läbed, wo ihr uf das Geld gar nöd agwiese sind? Die drü lueged mi forschend a und ich nicke langsam. Ja das triffts guet. De schüüch Arnold von Melchtal us Unterwalde roispered sich und fröged denn: gits denn da kei Widerstand? Regt sich denn da niemert uf? Jetzt häsch vorher verzellt, dass alli frei dörfed läbe und rede. Au ihr Fraue. Und denn wehrt sich niemert gäge das, wo da passiert? Doch, es git e Empörig gäge all das. Aber d Empörigskraft nutzt sich ab, wenn nüt passiert. 5

6 Wenn Regierigsmitglieder offesichtlich dörfed lüge, ohni dass das Folge hät. Wenn Flüchtlingshelfer als kriminelli Handlanger vo Schlepperbande bezeichned wärded, ohni dass sich dä muess entschuldige, wo das seit. Die ganzi Welt lueged nach Thailand, wie 12 Buebe nach eme Freiziitusflug usere Höhli grettet wärded. Aber glichziitig lueged mir weg, wenn Hunderti vo Mänsche im Meer vertrinked. No schlimmer, wänn en Kapitän, wo Mänschelebe rettet, sich vor Gricht wie en Verbrecher muess rechtfertige, denn wird die gsamti Moral und oisi Wert über Bord gworfe. So wie d Grenze vom Sägbare ganz fiin, Schritt für Schritt gschliffe wird, wird au d Empörig abgschliffe. Und mir bliebed sprachlos und hilflos zrugg. 4. Noii Visione D Sunne sinkt langsam, während dem mir vier oisi Blick über s Meer lönd la schweife uf de Suechi nach Antworte. D Hitz vom Tag wird vertriebe dur en chüehle Wind, wo d Gedanke aregt. Da stricht sich de Arnold vo Melchtal über sin Bart und seit: Eigentlich bruched ihr s gliche, wie mir damals. Zämestah gäge Tyrannei und es Läbe under unmänschliche Bedingige. Mir händ zäme ghebed gäge die Habsburger, wo üüs knächtet und üüs underdrückt händ. Über d Grenze us. Uri, Schwyz und Unterwalde. En gmeinsame Bund isch nöd uf de Hand gläge. Aber ois allne isch klar gsi, dass mir zäme stärcher sind, als elei. Mir händ s gwagt und en Bund über d Grenze use gschlosse und gmeinsam für oisi Vorstellig vo Läbe und Zämeläbe kämpft. De Werner Stauffacher git em Recht und ergänzt: Niemert het vorher dra glaubt, dass so en Bund möglich isch und so lang hebed. Es brucht Lüüt mit 6

7 Visione. Ihr redet zviel über die, wo alles wänd zerstöre. Reded doch meh über die, wo öppis Guets wänd ufboue oder erhalte. Visione langed aber nöd. findet de Walter Fürst. Wäge schöne Troim hät sich no nüt veränderet. Ihr müend au Verwantwortig übernäh. Nöd nüme es paar wenigi, sondern alli zäme, wo anders denked. Denn sind ihr gwüss Meh, grösser und iflussricher als die extreme Rechte. Verantwortig übernäh heisst, Visione entwickle, es klars Bekenntnis ablege, Widerstand zeige und dänn, das isch s wichtigst, gmeinsam d Problem apacke. Mängisch bruchts halt Muet, öppis Grössers z wage. De Kampf für oii Vorstellige brucht Muet. Und au Opfer. Aber es wird sich für d Gmeinschaft lohne, au wemmer es bitzeli mues verzichte. Noii Visione! En wiite Blick über de Momänt us. Schliesslich engagiered sich wiit meh Mänsche freiwillig für Flüchtling und sozial Schwachi, als bi Demonstratione vo Rechte uftauched. E Bewegig, wo d Mänsche die Kraft chönd dri stecke, damit sie sich ebe nöd abschlifft oder i de Fust im Sack verpufft. E Bewegig -e Friedensbewegig, wo ois us de Hilfslosigkeit und Sprachlosigkeit befreit. Bis jetzt sind die extreme Rechte lüüter. Au i de Wahrnehmig vo de Medie. Drum müend mir d Wort zrugg becho und noii setze. Es cha nöd si, dass Guetmänsch es Schimpfwort sell si. Gmeinsam müend mir hii stah und bekenne: Ja, mir wänd in ere plurale Demokratie zäme läbe, wo alli die gliche Recht und Möglichkeite händ: egal öb Frau oder Maa, Schwarz oder Wiis. Es sind oisi Wert und Mänscherecht, wo oisi Vorfahre über Jahrhunderte drum kämpft und ufboue händ. Die gilts z verteidige. Ich mache d Auge uf und wott em Werner Stauffacher, em Walter Fürst und em Arnold von Melchtal bii pflichte. Aber sie sind verschwunde. 7

8 Ich sitze elei da am Meer und luege id Wiiti. Aber ihri Wort halled no nah: Eigentlich bruched ihr s gliche, wie mir damals: noii Visione. En wiite Blick über de Momänt us. Und e Bewegig, wo sich d Mänsche gmeinsam für die Visione isetzed. Ich wünsche Ihne viel Visione und d Kraft, die au umzsetze. Danke viel Mal. 8