Zu guder Letzt woll mer noch die bayrische Musiker begrüße, un wie ners vun uns net annerschder kennen ach noch mit me Gläsje Woi begieße.

Transkript

1

2 Mir begrießen eich im Hof vum Arnd ich hoff ihr hän mich all widder erkannt. Als aldi Fraa bin ich ledschd Johr g kumme, doch die Jugend hat mich widder gewunne. Newer mir, wie ma gud sieht, hab ich die Alexandra Hofmann, als Verstärkung kriet. Uff unsern anner Zuwachs do nebe dun mer jetzt emo unser Glässer hebe. Zu guder Letzt woll mer noch die bayrische Musiker begrüße, un wie ners vun uns net annerschder kennen ach noch mit me Gläsje Woi begieße. (Betrunkener Italiener tritt uff) Mona: Sa mo was bischen du fer oner? Italiener brauchen mer do wohl koner! Wachrem is e sauberes Ord, geh mer mit dene Petze ford! Alex: Begrieße kännschen jo schun emo, schließlich is er jetzt jo do. Mona: Der wird vun mir doch net begrießt, die hän uns die WM vermiest! Alex: Ich finn die Italiener gar net so schlechd, g wunne ham se zwar net ganz mit reschd un seit dies Johr is de dritt Platz eh de Beschd. Mona: Seit em 4. Juli is fer mich ganz gewiss, dass ich kä Lasagne, Pizza un Eis vum Italiener mehr ess! Alex: Ich geb dem Arm Kerl jetzt mo en Schobbe un du her uff so Sprich zu kloppe. In Wachrem is doch jeder willkumme do wern ach Italiener uffgenumme! Mona: Aller gud ich siehs jo oi. Wie schmeckt er dann de Wachremer Woi? Italiener: Bene Bene Bravisimo! Alex: Allerhopp dann bleib doch grad do! Un her der unser Kerwered o. Weil mer kummen jetzt zu epaar luschdiche Geschichde un dun vun Wachremer Leit berichde!

3 Urlaubsgrüße aus Wachrem Unser Wachrem is jo wunnerschä, trotzdem dut ma ach gern emo in Urlaub gehe. Palme, Strand un Sunneschoi, kann jedoch net Wachremer Alldag soi. Ma dut am Strand leie, Schifahre oder kämbe un an die Dehomgeblibbene Poschtkarde sende. Iwwer so was fraat sich dann ein Jedermann, ach wenn er selber net in Urlaub fahre kann. Es Heinze hänn im Mai e Poschdkad kriet un hänn gar net gewisst, dass der Bekannde in Urlaub g fahre is. Aus Bad Füssing is e Kärtche kumme, un die Fraa Heinz hot se sich glei zum Lese vorgenumme. Do hot se gedenkt ach God is des schä, wie gern daed ich noch emo Bad Füssing seh. Kummen emol her ich lese mo grad, was der do g schrieb hot uf seiner Kard: Liebe Grüße aus Bad Füssing. Vielen Dank für die Übernahme der Kurkosten! P.S.: Entfernung zum Strand: 815 km Sie lest die Adress, des kanns doch net soi, do led uns bestimmt widder oner enoi. Fam. Dieter Heinz Hauptstraße 15 A bis C Wachenheim Germanski Do sad de Dieter Was soll dann des? Der schreibt Germanski un is net im Ausland gewess. Hauptstroß 15 A bis C des gebts jo net, ei is der dann bleed? Uff dere Kard sin so viele komische Sache, Ich glab do dut oner e Spässje mit uns mache. Un guckt eich mo den Schdembel o, do steht jo Wormser Festspiele dro Schbedschdens do wars klar, dass die Kard e Verarschung war. Des do is jo wohl de greschde beschiss, ich wett die Kard is in Wachrem oigeschmiss. Der Kardeschreiber war ja gar net fort, der war die ganz Zeit dehäm in unserm Ort. So e Idee konnt jo bloß vun äm Kumme, de Udo Schenk hot um die Kart se schreiwe de Stift in die Hand genumme ausgeheckt hat er des mit seiner Fraa, dass so was nur dene zwo oifallt, des war jo klar.

4 Romandik Urlaub für Zwei Es gebt awwer ach noch Leit in dem schäne Ort, die ham noch Zeit und fahrn ach fort. So lebt do Pärche, die halten sich schun ewich die Treue un dun sich faschd schon genauso lang uff ihrn Urlaub freue. En Flug in de Süde ham se gebucht un dodefür e Spitzehotel ausgesucht. Der Dach des Aufbruchs is gekumme, die Urlauber ham de Fliescher Richdung Strand genumme. Un wie sich der Fliescher vom Bode bewescht sin beide pletzlisch ganz uffgereschd: Hammer ach werklich nix vegesse? Hasche Sunnekräm un ach unser Pässe? Ei sa mo du machsch misch jo ganz doll, mansche ohne Babiere kummsche durch de Zoll? Mit doiner Uffrescherei kannsche eim ach alles vermiese mir wolten den Urlaub doch in Ruh genieße! De Reschd vum Fluch hot er sich zusamme genumm dann sin se am Urlaubsziel a gekumm. De Schaddelbus ans Hotel hot schun g wad un die Urlauber samt Gepäck oigelad. An de Unnerkunft sin se dann ausgeschdiege un wollten schnell die Zimmerschlissel kriege. Mim Uffzuch sin se uff de rischdisch Stock gefahre un de Portier hot ne es Gepäck nogedrahe. De Ogeschdelle schließt uff un fiehrt se enoi do sad de wachremer: Guck do mo noi!??????????????????????????? Do schdeht jo e Himmelbett un frische Blume, wie simmer dann dodezu gekumme? Des sieht so aus als wärs e Hochzeitssuit, mir ham doch net geheirat, warum hämmern die dann kriet? Beschwerd ham die zwo sich awwer net, fer des Geld schlofen se gern in nem Himmelbett. Ihr wern eich jetzt awwer froe wo der Witz dodebei is, e Pärche macht doch bei em Himmelbett kä Geschiss!? Jetzt kummt die Stell zum Lache, bassen gud uff: In de Hochzeitssuit oigemit ham sich de Stefan Wagner un de Jürgen Britzius.

5 Innkafen schwer gemacht Unser Ort des is so schä, bloß kann ma do net oikaafe geh. In Munsem gebts en Edeka, un nebedro en Aldi a. Fer Wachremer is des ganz gut, wenn ma schnell was brauche dut. So ach fer ohnen aus de Wormser Strooß der brauch noch Grumbeere un e Päcksche Jeeschersoß. Un weil s schun korz vor Middach is, macht der Mann nemer lang Geschiss, er hockt sich in soi Audo enoi un wollt schun längschd in Munsem soi. Do ruft soi Fraa: Ei horsch emo, doi Leinedasch leid jo als noch do die wersche jetzt wohl net vergesse, ich hatt se extra frisch gewesche. Do hol se der bei de saubere Sache, du willsch doch noch schnell doin Oikaaf mache Kaum hot soi Fraa ausgered war er auch schun widder weg. Die Dasch steckt er sich in die Jack, es Geld kummt in de Hosesack. Im Edeka dann ogekumme, hot er Grumbeere un Soß genumme. Der Mann is dann an die Kass geschnellt un hot sich hinne ogestellt. Bezahlt hot er se dann soi Sache un wollt se in die Dut noipacke. Drum greift er in die Jackedasch un merkt die Dasch hot gar ko Lasch. Ei was bin ich dann fern Depp?! Was hot se mer dann do gegeb?! Des is jo e T-shirt vun meiner Fraa, dass die Sache do unne rausfallen, des is jo klar. Udo, du jetzt mo gut uffbasse: E Dasch hot o Loch un zwo Lasche, E T-shirt awwer hot drei Lescher meh do gugge mo an meim kannsche des gut seh.

6 Stille Nacht, heilige Nacht?? En annere Mann aus de Wormser Stoß wollt Silweschder feiern,un des ganz groß. Er wollt soine Kinner zeische, wie ma e Feierwersch macht, dass es ach schä funkt un rischdisch laut kracht. Er hot Böller un Rakete gekaaft in Masse un e halbes Vermöge gelosse an diverse Supermarktkasse. Dann hot er alles homgebrung un sich soi Bube zu Herze genumm: Ihr Kinner, bassen mo gut uff, an Silweschder mache mer oner druff. Ich zeich eich was e gscheit Feierwerk is, net bloß Knallerbse, Wunnerkerze un so e Geschiss. Die Kinner hot er schnell närrisch gemacht un all hänn se gewart uff die besagte Nacht. Am Dach des Abschusses macht er sich bereit un nämmt sich zum Uffbaue ganz schä viel Zeit. 12 Uhr konnt die Familie kaum noch erwarde, sie wollten zum Knalle naus in de Garde. Kaum wars endlich Middernacht, ham se sich ans Böllern gemacht. Doch irgendwas is schief geloffe ko Raket is hochgeschosse. De Nachbar hot sich schun gewunnert, warums nebedro iwwerhaupt net dunnert. Er is dann niwwer gang un wollt gucke, do is em weg geblieb die soi ganzi Spucke. Er hot sich gewunnert: Was dropst dann do? Der steckt jo net die Zündschnur o. Des sieht jo wie gschmolze Plastik aus Mein Lieber Herr Eckstein, was lerne mer do draus? Ma sollt erschd de Plastikschutz vun de Zündschnur ziehe, nur dann kennen die Ragede a rischdisch hoch fliehe.

7 Oh Tannenbaum Jed Johr zu de Weihnachtszeit, macht sich e feschdlischi Stimmung breit. Do frat ma sich uff Gliehwoi, Plätzjer, Kerzeschoi un gesellisches Beisammesoi. Die TuS-Weihnachtfeier mit Weihnachtsmann, viel Geschenke un wechselndem Programm, gehert jed Johr zu de Weihnachtszeit fer jung un alde Wachremer Leit. Es Bürgerhaus is immer schee degoriert, un was dodeno mit dene Sach bassiert, was es mit de Dannebäm gebt, is vorbestimmt, weil jeder Helfer oner mit zu sich nimmt. Ach de Hans-Jürgen Hofmann hot e Bämsche bekumme, un aus Platzmangel net glei mit häm genumme. Mit nem Namensschild versehe hots Bämschen uf em Parkplatz gelehe. E paar Daa später is de Hans-Jürgen eniwer un hot gedenkt: Ich hols Bäumsche eriwer. Die Isolde hot die Stub bestimmt schun soweit, un zum Weihnachtsbom butze werds ach langsam Zeit. Doch do wu de Bom geleh hot, war rer net me, vielleischd hot en oner wu annersch hi geleed. Er hot sich uff die Such gemacht un heert ausm Bürgerhaus viel Fraue, also Krach. Do hot er gedenkt: Do muss was soi, ich glab ich guck do mo korz enoi. Hot oni vun eich moi Bämsche gesieh? Vun hinne rufts: Ei wu hattsche des dann hie? Do hinne hatt ich en anne geled, bloß do is er net me, ich bin doch net bled. Do hot e Zeddelsche drogehange, un do druff hot moin Name gschdanne. Aus de Kisch hert man die Gerda kreische: Ich hab mich schun gewunert wer kann dann moin Name net schreibe? Mer henn gedenkt, der wär fer mich, do leid er klogeschnidde uff de Disch. Mit de Dannezwäcke hamme die Plätz degoriert, fer disch is des Pech, awwer so was bassiert. So nahms e jehes End mit dem Bom, am Bscherdaa hatt de Hans-Jürgen zu Glick en annere dehom. So Hans-Jürgen, mer gebben dern Tipp, nägschd Johr nemmsche doi Bämsche am beschde glei mit. Dann kann dir so ebbes net bassiere, un du kannsch deiner Familie e orischinal TuS-Bämsche präsendiere.

8 Es Wachremer Bermudadreieck Im Bürgerhaus bassiern misteriöse Sache do sollt ma sich emo Gedanke driwwer mache. Do schoints ganz schä gefährlich zu soi drum gehen do niemals allond enoi. Di Fraa Humann hats beim Butze erwischd, wovon ich eich jetzt mo bericht. Sie is in de Bürgerhauskich die Trepp nunnergang Die gud Fraa war in dem Zwischenraum gfange un langsam is rer schun ganz schee bange. Die Der is vun inne net uffzukriehe do konnt se rittle un ach zeihe. So e der die gehert verbott, weil die kä Schlink, sondern nur en Derknopp hot. Der Fraa war klar, sie war gefange un langsam wurds rer Angschd un bange. Do is rer die glorreich un rettend Idee gekum, Sie hot de Weg in die Freiheit dorchs Fenschder genumm. Ach de Udo Schenk war in dem Räumsche verscholle, un hot en Ausweg aus dere Misere gesucht wie en Dolle. Er hot als Lösung ach nur nochs Fenschder gesieh un hot sich rausgeschafft nur mit Mieh. Ach unser Boiemoschter is in die selb Lag kumme hot awwer net de selb Auswech genumme. ER hot gedenkt: Ich wink emo zu de Tankstell eniwwer vielleicht siehts oner un es kummt dann en Retter riwwer. Die Martina Stabel hot den arme Mann erblickt, soi Not hot se awwer net erkannt un winkt nur freundlich zurick. Aus Zufall kam soi Dochter, die Marina vorbei, do hängt er sich mim rufe un winke nochemol kräfdisch enoi. Die hot die Not vun ihrm Vadder zum Glück erkannt un is zur Rettung ins Bürgerhaus gerannt. Die Der vun de Kich macht se uff un lässt en enaus, Ihr Leit ich sans eich, des is e ganz schä misteriöses Haus. Ich rat eich gen do am Beschde gar net allond enoi de Herr Heinz sollt nämlich bestimmt net de ledschde soi.

9 Ach an ner anner Stell im Bürgerhaus kummt mer schoinbar net mehr so ofach enaus. E annerie Fraa hots ach getroffe. Sie is em Dame-WC in die Fall geloffe. Die Fraa war im Klo gefange, weil die Der is net mehr uffgegange. Sie hot gekrische un geschännt, awwer es war käner do der rer helfen kännt. Sie hot versucht unner de Der dorch zu kumme, awwer aus Platzmangel hot se den Gedanke glei widder zurückgenumme. Sie rittelt nochemo verzweifelt an der Der ganz feschd bis rer dummerweise die Derklink abbrecht. Ihr onzigschd Schans war iwwer die Zwischewand vun de Kabin zu schdeie un schwupp dud se uff de Kloberschd vum Nachbarklo leie. Die Kloberschd bricht in de Mitt entzwei, des warn die 10% veluschd dodebei. Der Reschd vun de Rettung war net me schwer, die Fraa geht oifach dorch die uffne Der. Die Gerda Hoffmann war vorerschd es ledschde Opfer vun dene vier. Awwer g wiss net die ledschd, des glabe ner mir. Fer uns schoints, als gäbs im Bürgerhaus e Bermuda Dreieck, wenn ma do omol droihängt kummt ma do nimmer so schnell weg.

10 So Ihr liewe Leid und Kerwegäschd, des war jetzt der Anfang vun dem schäne Feschd. Zum Esse un Trinke laden mer eich jetzt oi, probiert ruisch auch e bissel mer vum Woi des is an so nem Dach net werklich schlimm, dann sein ner vielleicht ach nägschd Johr emo in de Kerwered drin. Ab 10 Uhr macht dann ach die Bar do hinne uff, hoffentlich machener do dann ach noch mit uns oner oder zwo druff. Zum Schluss kreischen noch mo alle mit Kerwejugend Marina Heinz Karsten Schüttler Manuel Hess Alexandra Hofmann Christof Wegerle Steven Dierdorf Sandra Gießen Simone Gießen Mona Emig Helen Emig Sandra Rossmann Anna Ühlin Chantal Egli Katja Schmitt Tina Dangmann Gudrun Bornschein Erik Fürnkranz Wir bedanken uns an dieser Stelle für die zahlreiche Unterstützung, die wir erhalten haben! Wir freuen uns über jeden, der etwas zu unserer Kerwe beitragen will und auch über diejenigen, die uns mit ihrem Kommen erfreuen! Mit freundlichen Grüßen die Wachenheimer Kerwejugend!