Kerweredd Ich begrieß eich im Name vun de ganz Straußjuchend do heit, unn naderlich ach von dene ganze annere Äneller Leit.

Transkript

1 Ihr liewe Leit un Kerwegeschd, es is schee, dass ner all gar do sin, un do hanner a grad reschd! Kerweredd 2016 Ich begrieß eich im Name vun de ganz Straußjuchend do heit, unn naderlich ach von dene ganze annere Äneller Leit. Schachereich hammer uns do versammelt, das is doch fein, fer Freibier, Schnaps un ganz viel Wein. Mir han dies Johr wirrer Mol e bissje späder ogefang, awwer geklappt hot's wie immer trotzdem, wenn ach mit e bissje Drang. Mir sin e ganz schä chaotischer Haufe, awwer das macht nix, do kenne mer jetzt mo ordentlich enner saufe. Von demm Johr gebt's einisches zu berichte, ach so manche luschdische Geschichte. Viel Spaß beim zuheere un driggen die Daume, dass ner net eire eischene, sonnern die Schandtate vun de Annere bestaune. Doch bevor ich eich das alles verzehl, muss doch noch mo was Feischdes in die Kehl. Drum losst uns all die Glässer hewe, die Äneller Kerb soll lewe! Die Musik speelt in de Zwischezeit: So e Daach, so wunnerschää wie heit...!

2 Tulpen aus Amsterdam Jedem ess bekannt de Bägger hott iwwer die Äneller Jacht sei Hand. Un wo gejacht werd, werd ach als mo schää geschwankt, bis unser Horst gude Idee' erlangt. Iwwerm Worschd mache fallt em inn, dass guder Kees un Tulwe jo vun Holland sin. De Griewel voller Tatendrang, schwingt de wasserfeschde Edding wo er nore kann. Im Nu steht uff alle Päckscher Tulweworschd, oer Jürgen was han ich jetzt e Dorschd. Als de Bägger das Elend schließlich sieht, der sich uff ämo ganz verbiet. Ei zum Dunnerkeil dun ehr dann spinne?! - Was dun dann ehr fer neie Worschdsorte erfinne? Sowas kann ich meine Kunne net verkaafe, ei die gehen jo fort, so weit wie se kenne laafe! Siehn zu wie ner das Zeisch vun de Verpackung abbringe, sunsch dun ehr die Worscht mit Verpackung verschlinge! Die Worscht werd in e Kiwwel geleht, mo gugge ob das Zeisch mim Rech Werner seim Schnaps net abgeht. Geje dene Edding es kee Kraut gewachs, de Jürgen un de Horst han kä mie Spass. Sie beiße in de saure Abbel nin, un tran alle Tutte wirrer in die Worschdkisch nin, Alles nei verpackt un ordentlich berschribb, hätt mer das glei gemach wer merr so lang net geblibb. Die Musik speelt dene Beide geschendene Holländer dann, Tulpen aus Amsterdam

3 Hängerkupplung Bei 'me Audo met 'me Hänger fahrt merr normalerweis e bisje länger, bess mer is am Ziel - awer in so 'me Ohänger transpordeert merr jo aa viel. Das Audo zieht schwer un ess vun vorne bess hinne lang, drumm nennt mer e Audo met Hänger aa Gespann. Audo un Hänger normal sesamme geheere - es sei denn, der Hänger dud sich wehre un verlosst, ohne dass de Fahrer ebbes schbeert, die Fahrtrischdung no redschds, bess merr e laudes Krache heert; De Lenker ganz verdutzt, sich erschd emol stutzt un sich wunndert, warum wärd plötzlisch alles so leischd, als de Ohänger im Jägerzaun am Bau sei Endposition erreischt. Ja, so kann's geh, wenn Kupplung un Maul nett uff enonner schdeh - dann losst die Äh de Anner los un plötzlisch schdeht de Ohänger näwer de Wollfschder Stroß. De Zaun kabutt, de Ohänger ennin gekeilt, de Fahrer stoppt un zu seim Hängersche eilt - Do schdeht das Ding metsammt de Grillvorrischdung im Gepäck, in besaachtem Jägerzaun un in de Heck. Zum Glick sin im Dorf awer ball e paar Helfer parat, zerre das Ding eraus un schdelle's wirrer grad. Die Moral vun der Geschischd: Traue deiner Kupplung nicht un fahr niemols schneller als de Hänger folsche kann - sunschd stoppt die Fahrt ganz schnell im Hang! Die Musik schbeelt dem Unglicksvochel jetzt met Schmiss: Aber eins, aber eins, das is gewiss...

4 Strom Strom, egal vun welscher Firma der aa kummt, immer dorsch die selbe Leidung summt; ob OIE, Yellow oder sunschd Ähner der das biet - die hann halt All bei de Palzwerke noor gemiet. An sisch ferr jeden klar un aa ne schwer - wenn Leidung kabutt, dann Schdeckdose leer! Nor ferr ähner scheint das net se gelle, weil er mähnt er ess besonerschd helle: Um Strom se schbaare werd die Kihlschrank-Lamp eraus gedreht - wolle mer doch emo sieh, ob uff de negschd Abrechnung net e geringerer Verbrauch druffsteht?! Die Palzwerke kommt un saat, mer misse an de Leidung schaffe un schdelle dodefor de Strom korz ab awer das dud der Sell net raffe; er saat; Was ehr doo mache gilt net ferr misch un ess mer gleisch, isch bin nämlisch gar kää Kunne bei eisch - Die Musik schbeelt, ehr wern's verschdeh: Ohne Strom kann aa beim Schnigg nix meh geh! Strom von den Toten Hosen

5 Die Glasdeer am Bau Dass met feel Arwet e Glasdeer ingebaut ess am Bau, wäß jeder wo do owwe se duh hat normalerweis genau; Awer scheinbar leischd dort Nachts de Mond so hell ennin, dass net nor die Schnooge degäje gebrummt sin. Nää, aa junge Mensche die in unserm Ort wohne flieje scheinbar im Bau erum wie ferngeschdeijerte Drohne. Ohne met de Wimper se zugge un aa ohne Schmerz-Gebrüll saat sich e dorfbekannter Jungmusiker: Mol sieh ob die Deer, wenn isch degäje hubbse, net uffspringe will? Leider hot de Hupser net bedacht, dass merr die Deer vun auße no inne uff macht. Das Glas hot e Sprung, die Scheib is kabutt - wie um Himmels Wille macht merr das nor wirrer gut? Nemm Geld in die Hand un bezahl die nei Scheib, mach's negschde Mol die Deer rischdisch uff un such der e annerer Zeitvertreib; Dann geht nix gabutt, du bleibsch gesund un aa immer gut druff - awer denk dro: Die Deer am Bau, die geht no inne uff! Unser Musik schbeelt dem junge Mann, schlag niemals mit dem Kopf an eine Türe an! Knockin on Heavens Door

6 Stockweiher E paar Jungs aus unserm Dorf, ihr kenne se all, sin diss Johr ach mol werrer schää uffgefall. Es war in de Sommerferie, die Langeweile war schon extrem, do saat de Schreiwer Bernd zum Jakob: Was machschen jetzt die ganz Zeit dehäm? Unnernemm was, ich han do e Tipp, fahr mol an de Stockweiher, un nemm am beschde noch e paar von deine Kollesche mit. Näwerm Jonas horrer noch die Kumpels Fabi un Julian gefroot, un sin dann met zwä Audos Richtung Frankreich los. Um de Weiher se finne, fuhr de Fabi mem Navi ach glei vorneweg, awer dem sei Fahrstil hot im Jakob gar net geschmeckt. Anstatt dem zu folge wie e Blinder seim Hund, wurd es im Jakob allmählisch zu bunt. Wenn der jetzt net schneller fahrt, grieh isch an meine Hinnere noch e Furunkel, Bis mer do okumme, werds jo schun dunkel! Am Fabi vorbei hot er jetzt es Komanndo iwwernumm und hot sogar die Richtung no Frankreich gefunn! Net weit hinner de Grenz erspähe se de erschde Weiher; Jonas, das muss er sin, mach gleich mo e scheenes Feier. Es Zelt, die Schwenker un es Bier gleich ausgelad, han se dann erschd mol gechillt, no derer anstrengende Fahrt. Bis in die Nacht han se am Feier gesess un sich mol erholt von dem ganz Sommerferiestress. Mojens um 12 sin se zum Kiosk um ebbes zu esse; Do froot de Jakob die Bedienung: Wo simmern eigentlich do, ich han's ganz vergesse.

7 Stockweiher, oder so ähnlich, ach isses do so schää! Do meent die ganz heiter: Stockweiher? Nei, do is de grüne Weiher, do müssen'er noch 30 km weiter! No derer Blamasch han se er Kram glei zusamme gepackt un sich in Rischdung Heimat gemacht. Unnerwegs wollte se noch zum Seefeschd an de Bostalsee, aber do ware se noch e Daach se früh. Do sin se grad werrer dehäm die Luschd war abgeebbt, Kopf hoch Jungs, dodefor sinner heit in de Äneller Kerweredd. Die Musik speelt fer die 4 Urlauber jetzt flott: Das Lied vom roten Gummiboot!

8 Ess Sportplatz-Klo Wenn am Schbortplatz ebbes se mache ess,vun de Zappolach bess zum Klo; de Hönes Werner es immer do. Es ess net so genau bekannt was an die Halter vun de Schutzhunde verfüttert worr ess - uff alle Fäll hat's denne wohl die Packung veress; Es Klo war zu, die Brieh laaft nimmie ab - also kummt de Werner met seim Kärcher-Zauberstab. Trotz all seim Wisse un seim Bemiehe, dud sisch die Dreckbrieh net verziehe - de Werner saat; Do werd merr jo bekloppt - der do Klo ess un bleibt verstoppt! Mer brauche härteres Gerät un schwere Waffe, mer misse de Zahn Paul vun Lauteregge do eruffer schaffe. Der gebt dann met großem Schlauch un mäschdisch Druck der Drecks Verstoppung e ordentlischer Ruck un dud de Dreck aus dem Rohr enaus schieße - hinneno kann die Klospülung wirrer fließe. Vun de Geschischt brauch merr sisch äns nor se behalle: Digge Schdoppe macht mehr nor met großem Werkzeisch alle! Wenn alle Brünnlein fließen

9 Siggi Im Auguscht war beim SVE net nor de Fußball rund, nää fer Kohle zu scheffele, do kumme die sogar uff de Hund. Die Määschderschafte vum Südwestdeutsche Hundesportverband, zieht unser Togo als Cheforganisator an Land. E hundearschvoll Helfer brausche fer so e 3-tägisches Event uff jede Fall, doch met scheene T-Shirts als Köder do krieht mer se all! In Fetze, so grien wie e verdriggelter Fußballrase, soll es Personal die Wauzies unn ehr Besitzer bespaße... Sogar die Äneller VIP's hann sich vum Leitwolf inspanne geloss, alle voran die First Landy unn de Gemääne-Boss! Samschdaachs mojens is de Togo Richdung Sportplatz getingelt, unn hot met de Leibscher bei de Familie Berndt geklingelt. Kääner dehäm? - Awwer in de Dreck schmeiß ich die jetzt net ääfach hie! Mol gugge, ob ich beim Bääger e Plastiktutt krieh! Gesaat, gedaa. An de Hausdeer hängt er se uff, jedoch e Hinweis zu de Inhaltstoffe babbt er kääner druff... E bissje speerer dut de Majestix sei Schritte zur Heimstatt lenke, un sieht ach glei e grienschimmerndie Maino Tutt dort henke. Aha die Hilde hot Salat gebrung, muss er do zwangläufisch denke, unn entfernt die Ware vun de Hausdeerschlenke... De Inhalt werd nimmieh gecheckt seiner Schwiermudder durer blindlings vertraue, un de vermeintliche Salat im Kiehlschrank verstaue. Der soll uns moje Meddach zum e Bolle Flääsch köstliche munde, unn vielleicht wachs ich jo ach noch e bissje vun de Vitamine, de gesunde. So denkt denkt sich de Bojemääschder, doch am nägschde Daach, do trifft die Tina bei Koche beinah de Schlach! Gekühlte Textilie - is sowas jetzt Mode?

10 Siegfried, warsch du das? Ei du bisch e Schoode! Also werre die Vitamine spondan vum Speiseplan gestrech, unn die klamme T-Shirts lande in de Wesch. Dodebei war's an dem Wochenn hääß wie e Hund, ehr Leit! Do hätt sich mancher schwääßtriefende Körper iwwer so e Abkiehlung gefreit... Un die Moral vun derer Geschicht: Hasche de Dorchblick, bassert sowas nicht! Siggi, bleibt cool jetzt hosche zwar de Salat, doch zur Menü-Abrundung is noch e Nachtisch angesaat! Grün, grün, grün sind alle meine Kleider

11 Grünschnitt-Sammelstelle Bei de Grieschnitt-Sammelschdell war merr sisch bewuscht, dass mer Rase-Abfall un Hecke trenne muschd. Also schdelle se e Container uff un dort kommt dann das ganze Gras enuff. Dramadische Szene schbeele sisch beim Befille ab, do war de Grieschnitt-Wärter schwer uff Trab; Alde Mensche packe ehr Gras-Säck net se hewe und dort wo de Container schdeht, war s aa net grad ewe. E mords Gemachs un a das ää orrer anner Mol harde Worde, ferr se trenne, die Abfallsorte. Awer es war jo ferr e gudi Sach - immerhie hot s gehäß, aus dem Gras werd Bio-Energie gemach. Bess e schlauer Mann von de Kreisverwaldung kommt un adeschderrt, dass de Gras-Kiwwel Wasser verleert; das darf net äfach in de Borrem eninndodefor brauch merr e extra Beton-Rinn! Das awer war de Gemäh feel zu deijer un außerdem mache se aus dem Gras gar kää Strom - das Gras ess nämlich nor extra gefahr uff de Schneehof enuff komm. Eischendlisch hat's die Bürger vun Schilda doch bloß frieher geb - awer scheinbar sin bei unserer Vewaldung e paar iwerisch bleb?! Die Musik schbeelt, es ess kää Wunner: Kommen emol von eierem hohe Roß erunner. Da steht ein Pferd auf dem Flur

12 Ratssitzung In de Sitzung vom hot unser Rat beschloß, es werre 38dausend EURO in de Ausbau vum alde Feijerwehrhaus geschoß; E Juchendraum sogar met extra Klo - das war in Änelle noch niemols do! Fer die Junge wärd umgebaut un hergerischd - mer mischd bloß wisse wen ne merr alles unner die Juchend mischt? Sin das die junge im Dorf bess 25 Johr, orrer komme do aa e paar junge Rentner, wo Boule schbeele, drin vor? Uff alle Fäll ess äns mol gewiss, fer se misse braucht dann am Bau käner meh in die Wiss un somet ess jedem gedient - nor het der Raum dann das Prädikat Mehrgeneratione vedient. Die Musik schbeelt jetzt ohne Verdruß: Jeder macht die Knie krumm, wenn er emol muss Scheiße auf der Lampenschale, gibt gedämpftes Licht im Saale

13 Fer Schluss se mache werd's Zeit, Jakob, hall schummo de Wein bereit! Weil bevor mer noch paar Schobbe zerre, muss de Strauß ach noch begosse werre! - Taufe - Siggi komm mo her, was sahschen do, ned schlecht orrer? Sah emol! Un wenn eich annere ach gefallt unser Strauß, dede mer uns freie iwwer e bissje Applaus. Bevor mer jetzt werklich all unser Sache packe un uns em Bier higewwe, muss ich noch kurz was mit eich beredde: Die Kerwezeitung koschd zwä Euro, die kammer entbehre, um dodemit de Straußjuchend e scheeni Kerb zu bescheere. Die ganz Straußjuchend un ach ich wünsche eich e paar luschdische Stunn, un dass paar vun eich froh sinn, dass se sich ned in meiner Redd gefunn. Ich verabschied mich jetzt so läd mer's dud, mit äm ledschde, besonnersch laude Gruß: DIE ÄNELLER KERB SIE LÄWE!!!

14 Die Äneller Straußjuchend 2016 Christian Fitz Dunja Berg Fabian König Felix Scheidt Gabriel Giesler Klara Breitzler Jakob Schreiber Magdalena Breitzler Johann Schreiber Jonas Berg Lucas Presser Moritz Drumm Nico Nowakowski Pascal Nürnberger Patrick Brand Patrick Zapp Sebastian Giesler Sebastian Hübner Steffen Bernhardt Tobias Mühlberger