Rede von Regierungspräsident Dr. Guy Morin anlässlich des Sechseläuten in Zürich

Transkript

1 Präsidialdepartement des Kantons Basel-Stadt Rede von Regierungspräsident Dr. Guy Morin anlässlich des Sechseläuten in Zürich [ ] Es gilt das gesprochene Wort Hochgeachtete Herr Zumftmäischter, gschetzti Ehre- und Alt-Zumftmäischter, verehrti Zümftler und Kandidate: Es git im Kaländer e paar wichtigi Date. S ainte isch s Zürcher Säggsilütte, das duet am ne Zümftler alles bedütte. S Knaabeschiesse, d Fasnacht z Lozärn, d Silveschterkläus, dr Ziibelemärt z Bärn, der Vogel Gryff in Basel am Rhyy. Doch dä isch scho verbyy, drumm löömer das syy. Und überall sinn, will das sich so ghöört, Politiker und Behörde döört, sogaar bi so lausigem Räägewätter Lüt vo der Präss und Wirtschaftsverträter, Delegatioone mit ihre Presäntli, und zmitts drin no s Basler Stadtpresidäntli. Als Ehregascht stand ych doo vor Ihne und füül my nervöös, e bitz nääbe de Schiine.

2 Präsidialdepartement des Kantons Basel-Stadt Seite 2 Ich dangg Ihne alle und freu mi sehr: Dasch für mi us em rotgrüene Basel en Ehr, zämme mit andere Gescht, duss und dinne, Regierigsrööt und Snowboarderinne, mit Bundesröt und mit schöne Misse beflisse nach beschtem Wisse und Gwisse dä Daag do z verbringe, z stuune und z lache und erscht no paar dummi Sprüch dörfe z mache. Apropos Sprüch: Es erwartets bald jeede, dass d Basler, wenns goht, nur in Värsform reede. Ych möcht das hütt au emoll ussprobiere und Ihne Un-Gryymts in Ryymform serviere. Als Regierigsroot und als Stadtpresidänt isch me z Basel im Friehlig im Elemänt. So isch mit Pauke, Trompete und Tuba am Fryttig d Eröffnig gsii vo dr Muba. Als befründeti Stadt und als Ehregascht sorgt daas Johr d Stadt Züri für e Kontrascht. Sit 96 Johr s erschte Moll. Doch jetz isch si koo, und daas isch doch toll! Si het sich mit Slam-Jam präsentiert und sich dialäggtisch bi uns integriert. Als wyteri Mäss isch bi uns hinderem Jura parallel zu der Muba als au no d Natura. Will bäides ganz wichtigi Mässe sinn, isch daas doch für s ganze Land nur e Gwinn. D Muba und d Natur-Mäss: die hämmer, die wämmer! Und Züri als Gäschtestadt sorgt für dr Glämmer.

3 Präsidialdepartement des Kantons Basel-Stadt Seite 3 Glämmer? Hejoh, Downtown Switzerländ isch in de Halle omnipresänt: Doch zwische de Mixer und biologischem Lauch goht si fascht under, d Corine Mauch. Hinter Kääs-Promotore und Sunne-Kollektore hätt ych se im Truubel fascht no verloore. Am Säggsilütte so stohts im Kataloog lauft si als Gascht bi der Zunft zur Woog. Drumm bitte, diend luege, wo si als stoht, nit dass si uns wider verloore goht. Apropos: Will Züri an d Muba koo isch und will me do drüber in Basel so froh isch, und als Gegeläischtig vor alle Dinge darf ych hüt der Glämmer uf Züri bringe. E härzlige Dangg drum an Beat Sigg. Als oberschte Maischter hani glääse im Blick dass är hütte s letscht Mool d Oberstrass gfiehrt haig und als Mäischter e Mäischter-Red formuliert häig. Der Yysatz vom Zumftmaischter duet mi begaischtere, wien är als Maischter s maischte duet maischtere. Y ha au no ghört, er schaff als wie meh im Oberland Bernois als Hotelier. S Gaschtgwärb hets schwer hütt, und d Baize, die maischte, könne sich kuum no en Äxtrawurscht laischte. Drumm kääm är so gärn ans Säggsilütte und sammli do d Blueme, won är duet erbütte. Är bindi die Blueme, die Gschängg vo de Fraue, am Gurt fescht und dät si denn zoobe verstaue und nähm si denn mit und wurd se verpagge fürs Victoria-Jungfrau in Interlake. Schyynts schmück er dermit denn sy Hotel-Halle. Denn Blueme us Züri dien alle gfalle.

4 Präsidialdepartement des Kantons Basel-Stadt Seite 4 Bi uns an der Fasnacht ischs umgekehrt: Nit d Fraue verschängge als Blueme dert. Näi, es sind d Waggis, die vertäile Mimöösli und hin und wider e stachligs Röösli. E wytere Unterschiid sticht mer ins Aug: Bi uns gits kuum Ehregescht, mit Verlaub. Will me doch die mit de Aazüüg und Hiet statt z ehre bi uns dur dr Gaggo zieht. Verstöhn Sii mi alli? Do kaan ych nur froh syy. Härzlige Dangg, dass ych darf doo syy. Apropos froh sy: Wär erinneret sich noo, wo Ihri Zumft mol uf Basel isch koo? Es isch gsii anno Zwäituusig und siibe und sisch nit nur bimme Ässe bliibe. E Böögg hännd ihr mitbrocht, kreftig und gross, und sind dermit häimlig uf me richtige Floss, vom Walter A. Studer unterstützt, mit Böllerschüss hoppla der Rhy aabeflitzt. Zum Glügg het der Käpten so ghört me verzelle nit d Mensche am Uufer be-yydrugge welle. Die Krüzfahrt isch glunge, ganz ohni Bedängge und ohni Angscht vor em Schiffli versängge. Apropos versängge: S sinn schwiirigi Zytte: Z Italie ligt als no das Schiff uf der Sytte. E junge Maa isch Kapitään gsi. Sy Abschiidsverhalte isch nit souverän gsi. Denn kuum lauft das Schiff uf em Fels uf, sofort isch denn dä Käpten ab und vo Bord. Wär zfrieh vo Bord goht das ka durch-uss syy luegt zrugg uf e zümftigi Havarie. Ganz umgekehrt isch doch hüt d SVP draa, will dörte der Käpten nit uffhööre kaa.

5 Präsidialdepartement des Kantons Basel-Stadt Seite 5 Wenn ain z spoot vo Bord goht das könnt jo au syy hinterloht er villicht au e Havarie. Apropos Käpten und Havarie: Y wüsst no meh Un-Gryymts us Basel am Rhyy. Am Morge frieh, kuum hesch der Kaffi gnoo, stellsch e wichtigi Frog. Und die Frog häisst eso: Liisisch hüt d BaZ oder liisisch e Zyttig? Beschaffsch du dir d Infos anderwyttig? Denn wottsch dy nit uf e Mainig verstyffe, no muesch zunere Zürcher Zyttig gryffe. Obs s ächt zwische Tagi und NZZ no Platz für e regionaals Blettli het? No siibe Reporter und zwäi Inseränte für fuffzäh Komma vier Abonnänte. Do kaame nur hoffe, die Havarie gieng bitte! am Läckerlihuus verbyy. Apropos Läckerli: Es isch esoo: Ych loss euch e paar als Geschänggli doo. Ych will mi als Basler ganz härzlig bedanke dass ich darf doo syy in dr Stadt vo de Bangge, in dr Stadt vom Theater, in dr Stadt vom See, uf der internationaale Chaussée. Am Paraadeplatz, in der Bahnhofstroos isch jo sit eh und jeh öppis los. E huffe Fremdi kaa me do gseh us Europa und au us Übersee, Tourischte us Dütschland, und allem aa au Stüürfahnder us den USA. Näi, Ziiri het anderi Qualiteete: D SRG mit ihre Wätterprofeete, Schawinski, wo mit de Lüt imme Gfächt isch,

6 Präsidialdepartement des Kantons Basel-Stadt Seite 6 und au der glai Nörgeli, wo wäiss, was rächt isch. Doch z Basel isch me Sii, ych stuun gege s Geplauder vo dääne immuun, jä sogaar danggbar, denn neimeduure, sinn die allergrööschte Schnuure im Grund gnoo numme s grööschte Gschängg für unsri Basler Schnitzelbängg. Und übrigens: Villicht stuune jetz Sii: Au der Ospel isch moll e Basler gsii, het Stüüre zahlt und z Basel gwohnt. Doch het er uns jetz mit bäidem verschoont. Hiin und wiider kasch en no gseh inere Loge amme Match vom FCB. Apropos FCB: Dä muess sich nit schämme, het meh Pünkt als GC und FCZ zämme. Me mues jo fascht Mitläid haa mit em Sforza. Doch der Dosé het gnueg vom Sforza sym Knorza. Ych hoff, dass der Dosé in syner Not bitz meh as nur Swissairdütsch verstoht. Doch au mit em FCZ, mit däm arme, hesch als Basler Bebbi Erbarme. Dr Fischer het numme im Triebe gfischt und ländelahmi Fisch ufftischt. Und au bim Fringer vermuetet me dumpf, bald steckt er scho tief im Letzi-Sumpf. Jä miesst me in Züri ächt nit probiere, die bäide Rumpfteam z fusioniere? Em FCB und das wäär e Gruus göön jo sunnsch no d Gegner us. Me könnt das jo au no globaaler gsee: Hopp F-C-G-Z-FCB!

7 Präsidialdepartement des Kantons Basel-Stadt Seite 7 Denn könnt me als Schwyzer Team esoo no äines Daages Bayern schloo! Apropos Fusioone: Würd sichs au lohne mit de zwäi Metropolitaanregione zwüsche Rhyy und Zürisee? Oder miechts emänd doch weh, uf dass me still zem Herrgott bättet, bis es em Böögg der Kopf verjättet? Denn Sii, mir hänn scho z Basel Mieh, söll Stadt und Land an äim Strigg zieh, fascht glyych wie d USA und Kuba. Drum hoff i schlicht, dass an dr Muba nid 96 Johr muesch warte, bis d Zürcher wiider duurestarte. Denn kiemte si jo rechne sacht erscht im Zwäitausigäihundertacht. Ich bi nit ganz sicher an dere Stell. Sisch soo, Herr Sigg, und Siggs wies well: Y kumm zem Schluss, y dangg euch alle. Bis jetz het mir dä Daag guet gfalle. Doch äins wott i unbedingt no verkünde: Bi allem Stichle: Mir blyybe Fründe!