Es war einmal vor langer Zeit in einem Land namens Schweiz...

Transkript

1 Es war einmal vor langer Zeit in einem Land namens Schweiz......Isch es nid immer einmalig gsi, zuezlose, wenn eim öper es Märli vo wunderschöne Prinzässinne i verwunschne Schlösser, starke Königssöhn uf wiisse Rösser, gfürchige Häxe, Drache, Kobolde, Zwärgli ond andere kurrlige Gstalte verzöut oder vorgläse het? Mucksmüslistill isch me dört ghöckelet ond grad sälber en Teil vo dene phantasievolle Gschichte worde. Eg be immer es sehr verträumts Meitschi gsi ond ha stundelang allei chöne spiele ond mini eigene Märli erfinde. Dr Papi het ame gseit, e heig sogar ufem Heiwäg vo dr Schuel no mit de Ameisi chöne spiele Vo de bekannte Märli sind s Dornrösli, Schneewittli, Cinderella ond Rapunzel mini liebschte gsi ond ou höt het sich das nid gänderet. Wenn sich a dr Fasnacht d Meitschi als Cowboy, Indianer oder Clown verchleidet hei, bin eg als Prinzässin umegloffe. S Grosi het mir einisch useme alte wiisse Vorhang es schöns Chleidli gnäit ond es goldigs Krönli het ou nid dörfe fähle. Das het mir sehr gfalle ond es het ou zu mir passt. Eg be es fiins, empfindsams Persönli gsi ond nid so en Ruech wie anderi Meitschi i mim Alter damals. Wo anderi scho längschtens ihres Barbie ine Egge gheit hei, han eg deheim i mim Zimmer ganz för me allei oder mit mim Schwöschterli Andrea wiiter mit dene schöne Bäbi gspielt ond i mine Phantasie-Wälte gläbt. Wenn das öper vo mine Schuelkamerade gwösst hätt, wäri usglacht worde, das weiss eg drum isch es mis Gheimnis gsi. Es git so vieli Sache im Läbe, wo me sich imene gwösse Alter eifach nid getraut z verzöue. Wenn me en bestimmte Sänger guet findet, e Lieblings-Serie im Färnseh het oder eifach halt no gärn Chind isch. Viel z schnäll wird me erwachse ond wenn me die Gab oder besser gseit sogar dr Muet het, sich en gwösse Teil vo sinere Chindheit z bewahre, denn isch das öpis wunderbars. Eg be richtig froh gsi, woni irgendwenn gmerkt ha, dass eg mir mis Läbe so dörf gstalte, wieni wott ond nid muess uf anderi luege, damit eg nid usglacht wirde. E be zwar älter worde, aber das het rein gar nüt negativs. Eg be sogar richtig happy ond wett sicher nüm zrügg!!! Eg ha s doch so toll.e cha mi mit dene Sache umgä, wo mir gfalle ond wenn sie ou no so kitschig sind, e cha die Musig lose woni wott (ond diejenige vo Euch, wo mi kenne, wösse, dass eg alti dütschi Schlagersongs liebe :O) Eg cha Schnulzefilme luege, bis alli Nastüechli ufbrucht si, e cha romantisch ond poetisch si, aber eg lose trotzdäm als krasse Gägesatz mega gärn mini Punk-, Crossover- oder söschtige anti-mainstream -CD s. ( wobii isch nid alles hötzutags scho chli zu Mainstream vercho?) Es goht sicher vielne vo Euch ou so, wo öpe min Johrgang hei oder no älter sind. Ihr sid bestimmt zum Teil genau so glücklich, dass Ihr jetz dörfet si ond mache, was Ihr wänd, oder? Händ Ihr Euch das scho mol überleit? Läbet Ihr jetz Euches Läbe oder lönd Ihr Euch immer no lo ines Schema dränge, wo gar nid zu Euch passt? D Generation vo höt het s do gloub scho chli besser i dere Beziehig. E cha mi tüsche, aber e ha so chli s Gfühl, dass sie eher das chöne mache, wo ihne gfallt ohni usglacht z wärde ond sie chöne ihri Persönlichkeit viel meh entfalte. Me isch toleranter, wöu me eifach scho ganz andersch ufwachst. Es cha natürli scho si, dass es schüchs Meitschi, wien eg s gsi be, immer no under Ghänsel muess liide i dr Schuel, aber eg hoffes nid. Es isch alles anderi als schön Viellicht het mi die Zyt aber ou stark gmacht..nei, nid viellicht sondern sogar ganz bestimmt. Höt lacht mi niemer so schnäll wieder us ond wenn, denn macht sich däjenig eigentlich nur sälber lächerlich ond isch en arme Tropf. Eg ha viel erreicht findi ond e muess mi nid schäme för was eg be ond was eg mache us mim Läbe. Zum Teil tueni mi wundere über die sogenannte starke Meitli ond Buebe vo früehner, wo mi zum brüele brocht oder mi hindedüre belächlet hei. Sie sind höt eifach Normalos ond chöne mi nüm im gringschte

2 erschüttere. Chind ond Jugendlichi chöne viel meh im Gmüet vomene Mönsch arrichte, als me dänkt. Hmmm wieso verzöu eg das alles? Ihr söllet eifach chli en Idruck vo mir becho, wieni mis Läbe als Chind erläbt ha wohlgemerkt als Chind i dr Schuel. Denn mini Chindheit deheim hätt nid schöner chöne si. E be stolz ond froh, dass eg i sonere wunderbare Familie ha dörfe ufwachse. Dört bini wörkli wichtig gsi (ond natürli immer no), wöu jedes Familiemitglied viel zumene schöne Familieläbe bitreit. I mine letschte zwöi Wiehnachtsbriefe hani jo immer chli meh über d Gägewart, bzw. über s vergangene, immer no aktive Johr gschriebe ond drum isch jetz halt chli mini Chindheit/Jugend a dr Reihe. Kei Angscht s 2002 chont ou no zum Zug. Sicher hei mi nach minere Lehrzyt, die 3 Mönet Wälschland ond vorallem mis Johr in London ou viel sälbständiger ond vorallem ebe stärker gmacht. Wenn me aber vomene längere Usland-Ufenthalt zrügg chont ond sich absolut unabhängig ond ou zuegegäbenermasse chli cool vorchont, de stoht me i üsere liebe Schwiiz schnäll wieder ufem Alltagstrott-Bode. Mini Rocker-Läderjacke ond verrissne Jeans hani emu de nüm so viel agleit, wöu s eifach Vätterlis uf dr Stross oder Verkäuferinne im Lade gha het, wo mi als irgendwelchi Rebellin agluegt ond mi dämentsprächend ou ziemli unfröndlich behandlet hei. För das bini de doch no z wenig muetig gsi, es het mi fruschtriert ond do chont ou höt no i gwössne Fäll s Sensibelchen vo früehner vöre. Lieber mitem gliche Strom schwimme wie die meischte, damit me nid als Ussesiiter gilt. Me het eifach weniger Problem, es isch leider so. Mit dr Chleidig het das allerdings nüm so viel z tue. Hötzutags chame jo wörkli alles alege. Hippie-Style Kuschelmäntel im knallige Pink mit stilbrächende schicki-micki Hose, superultra Miniröck, längi Röck, Hochwasserhose, schrägi Stoffe i allne Farb-Variatione, String-Tangas, wo unbedingt müesse gseh wärde vo hinde oder ou Chleider ganz schlicht in schwarz. Fascht alles isch erlaubt, solangs einigermasse suber ond gepflegt usgseht. Sogar dr abgf***ti Look vo früehner het en Platz i dr modische Wält vo höt gfunde ond mit däm erschreckt me höt niemer meh. Natürli wenn me unbedingt wott usestäche oder uffalle, findet me immer en Wäg. För me isch es s allergröschte, wenni cha Glitzersache alege. Scho bereits mini Barbies hei vieli tolli Glitzerchleidli gha. Wow eg ha mir immer gwünscht, ou mol so Röckli oder Shirts azlege zu bestimmte Aläss oder im Usgang. Hey ond wösset Ihr was? Das dörfi jetz jo mache! Eg wett wörkli nüm zrügg. S allerschönschte Chleid wo en Frau i ihrem Läbe tuet ussueche, isch äuä s Hochzyts-Chleid. Es het för jede Typ Frau s richtige: För die modärni Bruut, för die extravaganti, för die flippigi, sportlechi ond natürli die romantischi Bruut (wien eg s be...) Hochzyt Ihr wössets jo scho alli, dass im Juni 2003 d Hochzytsglogge före André ond me wärde lüte. Mis Märli isch wohr worde ond eg ha mi Traumprinz gfunde. Nach mim Antrag Ändi Juni 02 (eg ha no nie so zitteret wie denn), hei mir bereits churzi Zyt spöter alles afo organisiere ond mir sind froh, hei mir das gmacht. Es isch en grosse Ufwand, die viele Offerte ihole för Apéro, Fotograf/Videofilmer ond Bands, diversi Chile go aluege ond natürli die Orte, wo denn s Fäscht söll stattfinde, Musig ond Gsang i dr Chile wähle, Schlächtwätter-Programm in Betracht zieh, Tätschmeister/in ussueche ond ou d Trauzüge vorallem aber s Datum finde, wenn das Hochzyt söll stattfinde. För me isch vo Afang a klar gsi, dass mis Schwöschterli Trauzügin wird ond eg be ou froh, dass mir zwöi liebi Mönsche gfunde hei, wo die ganzi Arbeit vo de Tätschmeister übernähme (Eg stelle mi denn bi ihrne Hochzyte ou zur Verfüegig, wenn sie wänd :-) 2

3 Wöu dr André reformiert isch ond eg katholisch, hei mir ou no chli müesse luege, wäge de Chile ond vorallem, wäge de Pfarrer. Nachdäm mir einigi Chile sind go aluege reformierti ond katholischi hei mir eus för d Stadtchile in Bade entschiede. Die isch katholisch. Wenn me inechont, isch alles so positiv ond me fühlt sich wohl. (Es het ou wunderschöni Ängeli drin). Es git zwar immer no einiges z tue jetz, aber s gröbschte isch organisiert. Imene halbe Johr isch es bereits wieder verbii. Eg cha s gar nid gloube! E empfinde die Vorbereitigszyt als so öpis wunderschöns ond e gloube, vieli zuekünftigi Hochzytspäärli gäbe mir do rächt. Zytufwändig, mängisch chli närveufriibend, aber trotz allem wunderschön ond einmalig. Hötzutags wo me d Wahl het, öb me en Ma oder Frau wörkli wott hürote ond s Läbe zäme verbringe, isch so en Hochzyt no viel spezieller worde. Früehner het me quasi müesse hürote, wenn me het wele zäme wohne oder gar zäme es Chind ha. Höt het me d Wahl emu i einige Religione. Vieli (vorallem älteri Persone) chöne nid verstoh, dass me för es Hochzyt tusigi vo Franke cha usgä. Ou mir hei am Afang dänkt, mir chöme miteme ganz chline Budget us. Trotzdäm isch es jetz enorm gstiege ond mir hei nid wörkli extravaganti Wünsch. Aber eus reut kei Franke, denn me hürotet (im Normalfall) jo nur einisch im Läbe ond das söll s eim eifach wärt si. Wenn Ihr jetz no alli dr Dume fescht drücket, dass am 14. Juni 2003 keis Rägetröpfli vom Himmel gheit, denn isch es perfekt.ond andernfalls seit me jo, dass es en fruchtbari Ehe git :O) E freue mi emu sehr uf dä Tag, woni wieder einisch cha Prinzässin imene wiisse (viellicht liecht glitzernde) Chleid si denn so stelli s mir als Bruut vor. A propos Chleid das hani noni. Ond uf die Shopping -Tour freui mi ganz bsonders fescht das chönet Ihr Euch sicher vorstelle. Dr Wäg Jetz chomi also zu mim Johr Es isch es Johr, woni nid unglücklich be, dass es verbii goht. Obwohl eg im Februar wunderbari Ferie mitem André ond mine Eltere uf Ko Samui (Thailand) verbrocht ha, vor churzem wieder ha z London mitem Mami chöne go lädele ond afangs Oktober en tolli neui Arbeitsstell agfange ha, isch s 2002 es trurigs Johr gsi. Hilflosigkeit, Chrankheit, Abschied ond Tod sind die ungeliebte Begleiter gsi, woni us nöchschter Nöchi erläbt ha. D Chraft vo einige Lüt i minere Umgäbig haut mi jetz no um! Do chöne sich vieli es Biispiel näh. Nid jede, wo en bösi Chrankheit het, wird die ou bezwinge, aber dr Wäg zur Gsundheit oder dr Wäg is Himmelriich, chame entweder über sich lo ergo oder me cha dä Wäg mit viel Muet, Chraft ond Hoffnig wiiterloufe. Me cha us däm Wäg öpis einmaligs för sich sälber ond för sini Aghörige mache. S Läbe wird so oder (leider ou) so nie meh s gliche si nachär. Däjenig wo wieder gsund worde isch, wird ganz bestimmt vieli Chlinigkeite als nüm so sälbschtverständlich aluege, sin Wäg viel dankbarer wiitergo ond viellicht Fähler us dr Vergangeheit nüm wiederhole. Wenn me aber dr Wäg usem irdische Läbe is Paradies goht und för sich ond för sini Liebschte die letschti Zyt mit vielne schöne Gspräch voller Liebi ond Dankbarkeit gfüllt het, denn wärde die Aghörige näbscht em riesige Abschiedschmärz ou en grossi Portion Chraft zum wiitermache becho. Die Chraft wird för sie sehr wichtig si, denn sie müesse ihre Läbeswäg jo wiitergo. Eg persönlich gloube fescht dra, dass sich alli wieder wärde träffe irgendwenn. Es isch zwar en Abschied wo unbeschrieblich weh tuet ond eim so hilflos macht, wie me sich s niemols vorgstellt hätt, aber wenn me tüüf i sich inne dra gloubt, dass me dä Mönsch wieder wird gseh ond dass dä Mönsch trotzdäm no zu eim luegt, denn chame irgendeinisch nach vielne Woche ond Mönet viellicht wieder befreit ufatme ond wiitergo... S Mami vonere liebe Fröndin isch dä Septämber is Paradies cho wie sie kämpft het ond ihrer Familie Muet gmacht het, isch ganz ond gar biispiellos. Sie wird wiiterhin als wunderbare Ängel för ihri Familie do si ond über sie wache, das isch för me ganz klar. 3

4 Ou d Chraft vomene Mönsch i minere eigete Familie isch för me absolut ungloublich. Me wird eifach überrumplet mit Fakte wo eim umhaue, us dr Bahn bringe ond zerscht hilflos mache. Niemols hätti erwartet, dass dä Mönsch so en grossi Chraft zum läbe ufbringt. Eg be stolz uf ihn ond wirde mir immer es Biispiel a ihm näh. Dur das alles isch eusi grossi Familie- Zämeghörigkeit no viel meh gwachse ond mir gniesse jedi Sekunde, wo mir gmeinsam chöne verbringe. Jede Momänt, wo me mit sine Liebschte dörf verbringe, isch öpis speziells. Jede vo eus sött das so gseh ond die Zyt gniesse ond dankbar si derför. Nid nur a Wiehnachte, Geburtstäg oder andere Fiirlichkeite...jedes Zämeträffe isch einmalig. Nur dr Momänt zählt ond nid was me geschter för en Stritt gha het oder was morn chönt passiere Sid nid nachtragend, niidisch ond haltet Euch zrügg mit böse Wort. Wenn me s mol gseit heit, chame s nüm rückgängig mache. Es git so viel negativs uf dere Wält, dass mir nid ou no d Energie sötte verschlächtere. Bi jedem einzelne foht s nämli a ond wenn jede vo eus positivs würd wiitergä, chönt d Wält um eus ume viel schöner ond heiterer wärde. Läbens- ond liebenswärter. Eg ha mol ganz en schöne Film gseh letschthin. Es isch drum gange, dass jede Mönsch wiitere drü Mönsche inere gwösse Situation hilft. Ond däjenig, wo denn Hilf erfahre het, het das nachär so wiitergfüehrt ond ou drü Mönsche gholfe. Denn immer so wiiter. Me het nid zuegluegt, wenn e Mönsch gschlage worde isch, me het s fremde Portemonnaie uf dr Stross nid gläärt ond wäggheit, sondern em Fundbüro brocht, me het ere alte Frau über d Stross gholfe oder het ihre im Bus dr Platz überlo ond wenn s grägnet het in Ströme, het me sin Schirm mitere fremde Person teilt (das isch mir drum mol passiert ond eg be richtig überrascht gsi). Das sind natürli nid alles Biispiel us däm Film das isch s Läbe. Mir chöntes no wiiterfüehre, indäm mir de Lüt eifach positiv entgägeträte z.b. wenn me dr grummlige Kiosk-Frau es Lächle schänkt, jede Morge sim eigete Spiegelbild seit, wie gärn me sich sälber het oder z.b. Friede schliesst miteme Kolleg, wo me nacheme Stritt nie meh gseh oder ghört het. Es liegt bi jedem vo eus. Nand immer gägesiitig Schuld zueschiebe wie im Chindergarte, bringt eifach nüt.nur Chrieg (mir gsänd das jo i vielne Länder uf eusere Wält, wo sogenannti heiligi Chriege füehre s Wort heilig derför z missbruche isch scho en Sünd findi). Öpis anders Was mir jetz ou no chli am Härze liegt, müessti zwar nid unbedingt ine Wiehnachts- bzw. scho eher Neujohrs-Brief, aber es chönt jo si, dass einigi vo Euch ou es Problem dermit hei ond sich en guete Vorsatz för s 2003 chöne fasse.es goht um d Fairness undernand. D Fairness under Frönde in finanzieller Hinsicht. Eg be eini, wo ganz sälbschtverständlich s letschte Lümpli würd gä för ne Frönd ond das wird leider usgnützt. Klar, ou mir passiert scho mol, dassi öperem öpis vergisse zrügg z gä. Aber de wotti dra erinneret wärde. Eigentlich wösse mir jo, dass me vo niemerem (usser dr eigete Familie) öpis dörf erwarte im Läbe, ou wenn s trurig isch. Ond wenn das öper nid weiss ond immer no höchi Erwartige het, wärde d Enttüschige nie verschwinde. Die Illusion muessi Euch ond mir sälber jetz leider definitiv näh. Eg mache mine Lüt sehr gärn e Freud oder lade se meischtens ou zumene Drink oder Kafi i ond das wirdi ou wiiterhin mache, ohni dassi Erwartige ha. Aber wenn me mini Freigiebigkeit usnützt, denn goht s z wiit. Sälbscht wenni riich wär (was eg definitiv nid be), würdi diesbezüglich gärn fair behandlet wärde. Eg go nüm wiiters druf i, denn es isch alles klar hoffi. Nid grad en liebe Absatz, aber es ghört för me ou zum Abschluss vom Ei Vorsatz för s neue Johr wird also si.eg lo mini Freigiebigkeit nüm lo usnütze ond eg muess lehre, dassi ou mol cha Nei säge. 4

5 So, jetz aber wieder zu schönere Theme Mir het letschthin öper verzöut, wenn me meh über nes Land oder sini Gschicht wott erfahre, muess me sini Märli läse. Dä Gedanke het mir gfalle ond eg gloube das stimmt. Dä Gedanke het mi ou derzue brocht, mi Brief mitem Thema Märli azfo. Me sött sich meh Zyt näh ond Märli us allne verschiednige Kulturkreise läse. Indianer- Gschichte oder abendländischi Erzählige oder grad zur Wiehnachtszyt d Gschicht vom Jesus-Chind. Es tuet eim eifach guet ond macht glücklich. Wenn me grad die Gschicht betrachtet wo über 2000 Johr alt isch, denn gseht me viellicht ou wieder meh dr Sinn im Gschänkli mache zu Wiehnachte. Das isch nämli dr Ursprung vo däm Bruuch, wöu die 3 heilige Könige (Kaspar, Melchior ond Balthazar) em Jesus-Chindli Gold, Weihrauch ond Myrrhe brocht hei öb eg s richtig gschriebe ha, weissi nid :O) Es isch doch öpis schöns, wenn me undere Wiehnachtsbaum luegt ond es Päckli mit sim Name druf gseht. Niemer cha mir säge, dass das nid stimmt. Es goht nid mol um s Gschänk an sich es goht drum dass en liebe Mönsch sich öpis derbii dänkt het ond eim e Freud wott mache. Eg mag mi no guet erinnere, woni mi erscht Wiehnachtsbrief gschriebe ha. Es isch under anderem ou ume Stress bim Gschänkli sueche gange. Jetz bini sälber es Opfer vo däm Stress gsi ond eigentlich immer no chli. E ha mi zu de koufte Gschänk no derför entschiede, mini Kreativität chli walte z lo ond be jetz total im Seich e weiss nid mol, öb eg s schaffe, alles fertig z mache bis übermorn (höt isch dr )! Usserdäm hani jo unbedingt no dä Brief do wele fertig mache för Euch. Immer alles im letschte Momänt.typisch för me. Viellicht wär das ou en guete Vorsatz för s neue Johr was Du heute kannst besorgen, das verschiebe nicht auf morgen...mol luege, öb eg s schaffe S Johr 2003 gmäss de Astrologe, wird s no chli negativer als das Johr. Aber wei mir eus alli nid dr Vorsatz fasse ond s vorusgseite Schicksal vom 2003 ändere? Es isch jo trurig, dass eg eigentlich i jedem vo mine Briefe muess schriebe, dass mir positiv sölle dänke, oder nid? Aber viellicht sött me jo immer wieder dra erinneret wärde. Mir stelle dere Vorussag also es Bei.mir wünsche eus, dass s Johr 2003 eis vo de schönschte wird, wo mir je erläbt hei! Wenn mir eus das alli wünsche ond euses Umfäld mit dere positive Chraft astecke, denn wird s so wärde! Mir versueche, vor eusere eigete Türe z kehre ond nid ohni en Mönsch z kenne dr Stab über ihm z bräche. Jede vo eus wörkli jede het sini Fähler. Vergässet das nid. Mir hei nid s Rächt über anderi z urteile, wo eim nie öpis z leid do hei oder eifach us puurer Dummheit bös z rede über anderi. Das strahlt negativs us ganz extrem. Mir sötte eus do alli chli a dr Nase näh, findet Ihr nid ou? Aber eg be zueversichtlich, dass mir das packe. Eg kenne Euch jo alli e chli ond eg mag Euch gärn. Wenn Ihr negativi Mönsche wäret ond mir nid guet würdet tue, denn würdi viellicht ou nid dr Kontakt zu Euch wele. Es tuet eim eifach nid guet, sich mit negativ dänkende Mönsche z umgä. Ihr sid das alli nid. Klar het jede mol sini Tüüfs ond zwöschedüre ou en negativi Aura um sich ufbaut, zum alles abschotte, aber i Euchem Härz sind Ihr positiv. Nur allei mit dere positive Usstrahlig, wärdet Ihr s viel liechter ha im Läbe. Miteme Lache, mit Hilfsbereitschaft ond Geduld, wärde mir alli viel wiiter cho. Geduld isch en Tugend, wo me sich muess erschaffe. Das isch nid immer eifach. Aber nid jede Mönsch isch ufem gliche Level i gwössne Situatione ond dört muess me eifach lehre, geduldiger z si. Eg be sälber mängisch mega ungeduldig, cha s denn aber nid verstoh, wenn öper ungeduldig wird, wenn eg öpis z.b. nid grad checke. Das erschreckt mi denn. Eg wirde also ou müesse lehre, alles chli glassner azgo. Übe Dich in Geduld en wiitere Vorsatz för s emu för me gilt dä ganz sicher. 5

6 Meh vo mir Wow jetz hani wieder viel gschriebe. Ihr wärdet bald d Glägeheit ha (falls Ihr das wänd), meh vo mir z läse, denn eg be dra, en eigeti Homepage ufzbaue. Das isch scho sehr lang min Wunsch gsi. Eg ha mir immer gseit, entweder es Buech schriebe zwar meh för mi sälber, oder denn en Homepage, was chli meh up to date isch ond usserdäm mit bewegliche Bildli usw. ou viel meh Spass macht zum luege. Natürli wird dört dri ou alles vo mim Hochzyt cho ond ou mi nöchscht Wiehnachtsbrief wird denn äuä dört drin si. Hoffentlich pünktlich!! E hoffe, Ihr händ alli chli Freud gha am einte oder andere Abschnitt oder viellicht sogar am ganze Brief ond eg wünsche Euch vo ganzem Härze, dass Ihr 1. alli Euchi Vorsätz för s 2003 chönet packe, dass 2. alli för Euch wichtigschte Vorhabe i däm Johr klappe ond dass Ihr ganz eifach eis vo de schönschte Johr dörfet erläbe, wo s för Euch jemols gä het.trotz unbeschrieblich trurige Abschiede i däm Johr ond ischniidende, unabänderliche Erläbnis.eg schicke Euch ganz viel Chraft, Muet ond en positive Energiestrahl, wo Euch s Lache wieder zrügg bringt. Es wunderschöns Wiehnachtsfäscht (im Nachhinein sorry) ond en guete Rutsch is neue Johr nid vergässe Ihr händ s verdient, glücklich z si. Wieder einisch es dicks Schmötzi ond en Umarmig för Euch ond die ganzi Familie Gaby 6