SP 10 S- 1. Texts vegls rumantschs

Transkript

1 SP 10 S- 1 Texts vegls rumantschs En quei seminari less jeu, sco indicau en Gestens, leger in text ord il Niev Testament en differentas ediziuns per eruir sin basa da quei text il svilup ch'il lungatg ha fatg mintgamai dad ediziun ad ediziun en quels texts. Effectivamein ein ils texts dil Niev Testament adina puspei vegni edi en novas versiuns, il bia adattadas al diever linguistic dil temps, schegie per ordinari cun entgins arcaissems, sco ei descha per in text da quella impurtonza. Mo gest ell'engiadina ein quels texts per ordinari vegni surluvrai d'ina versiun a l'autra, auter che p.ex. en Surselva. Leu dat ei mo minimas differenzas denter il text dil Niev Testament da Luci Gabriel da 1648 e quel da 1820, che pertuccan praticamein l'interpuncziun e la scripziun grond e pign. Mo aunc il Niev Testament da 1869 indichescha Lucius Gabriel sco translatur, era sch'il text cuntegn lu tuttina differentas modernisaziuns linguisticas, buc mo ortograficas. Era quella ediziun ei denton aunc fetg conservativa e mantegn praticamein tut las specialitads morfologicas dil text da 1648, sco il diever da pronoms nunaccentuai e dil pft. sempel, che vegnevan buc duvrai pli el lungatg plidau sursilvan naven da ca Ei ha bein ha dau dentern, 1856, ina ediziun sursilvana dil Niev Testament protestanta translatada da niev, mo lezza ha aunc buc dumignau da quei temps la translaziun da Luci Gabriel da Mo nus vegnin aschia ni aschia a star quei semester plitost ell'engiadina. Leu ston ins secapescha entscheiver cun tgei translaziun dil Niev Testament? Quella da Bifrun da 1560, l'emprema translaziun dil Niev Testament per romontsch insumma. Ina copia dil tetel ei d'anflar ellas Funtaunas I, p.79. 'L'g Nuof Sainc Testamaint da nos Signer Iesu Christi'. Ei dat aunc ulteriuras indicaziuns sil tetel. Empruei vus da leger inaga: 'Prais our delg Latin & our d'oters launguax & huossa mis in Arumauntsch, três Iachiam Bifrun d'agnedina.' Cun differents problems da pronunzia: [launguaks] ni [lenguaks], [arumauntš] ni [arumentš], e lu [añedina] ni [añġedina]. Mo schon el tetel ein differentas caussas buc claras: Ei 'Nuof' in sbagl da stampa per 'Nouf', quei che fuss ualti penibel, e co ei 'Sainc' da pronunziar: [saiñċ] ni [sęñċ]. Lu suonda aunc in citat dil psalm tgeinin? Saveis leger las cefras romanas? 119. Lu legi il text citau. Sur dalla pronunzia da 'Tieu' e 'mieu' savess ins puspei specular, mo gliez schein nus cheu. 'glimijra' stat per 'glimệra'. 'glimijra' ei ina fuorma ualti tipica pil puter dil 16avel tschentaner, ch'ins anfla suenter buc pli els texts. Tenor l'ortografia da Pallioppi (p.20) valeva quella pronunzia [ī] per [ệ] da siu temps, 1857, aunc per Puntraschigna. Strusch 50 onns pli tard para ella era dad esser svanida leu; per 'glimêra' e per 'inclêr' indichescha il DRG negliu fuormas cun la pronunzia [ī], ed ils auters exempels da Pallioppi ha el aunc buc tractau. Effectivamein anfl'ins quei citat en vers 105 da quei psalm 119, il pli liung ch'ei dat. Tiels catolics eis ei il psalm 118; la dumbraziun dils psalms variescha en general per in denter catolics e protestants. Ils protestants han surpriu la dumbraziun hebraica, ils catolics duvravan la dumbraziun greca dils psalms. Lu aunc la fin dalla pagina. Legi inaga? [š] enstagl [tš] ei era ina specialitad da Bifrun, che jeu sai buc propi, con derasada ch'ella ei. En scadin cass ei la fuorma da Bi-

2 SP 10 S- 2 frun per 'tschệl' praticamein adina schijl ni schil, entscheiva en scadin cass buc cun <tsch>-. Plaids ch'entscheivan cun <tsch>- ha el negins tenor il glossari da Gartner. Tier lez vegnin nus lu aunc proximamein. Il sun sco tal ha el denton era, p.ex. en 'fatscha'. Aschi lunsch pia la pagina da tetel da l'emprema translaziun dil Niev Testament en romontsch. Igl ei clar che la pagina da tetel ei buc dispet adattada per cumparegliar las differentas versiuns dil Niev Testament. Igl ei empau pauc text, mo nuninterssants ei era quel buc, sco nus vegnin aunc a veser. Mo avon ch'ir tiel text che jeu hai tscherniu sco pugn da partenza per la cumparegliaziun aunc enzatgei pauc sur da Bifrun e sia ovra. L'emprema translaziun romontscha dil NT ei pia vegnida fatga da Iachiam Bifrun, sco quei ch'il num ei screts silla pagina da tetel. La pronunzia correcta dil num digl autur ei Bivrun, cun 'v', sco en 'ovra' e da quellas caussas. Il num da schlatteina ei vegnius italianisaus pli tard ed ha lu num en fuorma taliana Biveroni. Da quellas italianisaziuns da schlatteinas ladinas ha ei dau dabia duront in cert temps: Ils 'Secchis' vevan num oriundamein 'Schech', lu 'Sech', quei ch'ei vevan pari buc aschi bugen. Ils 'Bezzolas' vevan num oriundamein 'Betschla', quei che significhescha era "Arvenzapfen". Da quei dat ei aunc pli. Cunzun quellas famiglias che mavan ell'italia a far fatschentas italianisavan bugen lur num. Quei ei aunc capeivel sch'ins vul far fatschentas ell'italia, mo ei mantenevan lu era la fuoram taliana, cu ch'ei vegnevan anavos en Engiadina. Mo la caussa ei aunc empau pli veglia. Vulpis dat ei schon el 17avel tschentaner, era sche 'Volp' ni 'Vuolp' ei era aunc semanteniu tochen el 18avle tschentaner. Quellas italianisaziuns dallas schlatteinas han pia ina liunga tradiziun. Per turnar tier Bifrun: La scripziun cun <f> ch'el drova per siu num resulta d'in problem ortografic ch'el ha. El scriva il sun [v] adina cul bustab <u>, sco il sun [u] dil reminent era. Quels dus suns scrivev'ins gia el latin tuttina, perquei ch'ins pronunziava era il consonant bilabial, sco en engles 'water', buc labiodental, sco nus pronunziein el en 'vin'. La pronunzia labiodentala valeva denton segir era dil temps da Bifrun, sco nus vegnin gest aunc a veser. La solia alternatina da scriver siu num en sia ortografia num fuss pia stau aschia: *Biurun. Mo lu vess el secapescha riscau, che quei vegni pronunziau [biurun], e gliez fuss lu tuttina aunc stau pli falliu che 'Bifrun', sco quei ch'el vegn pronunziaus ozildi usualmein. Chiampell ei lu setratgs ord l'affera pauc pli tard cun duvrar il <w> dubel tudestg per il sun pronunziaus [v] el romontsch, ed ella prefaziun da Chiampell (p.9) ei il num dil "bain amuossad Ser Iachiam Biwrun" lu era screts aschia: Biwrun. Ei ha dau da quei temps, pia denter 1550 e 1580, dispetas ortograficas davart il 'mœd da scriver' ladin. L'emprema uiara ortografica romontscha ha pia giu liug gia gest a l'entschatta dalla tradiziun litterara romontscha. Gia ella introducziun a sia translaziun dil NT numna Bifrun "ün schert mœd da scriuer, quęl chi num plęstha", pia "ina moda da scriver che plai buc a mi". El indichescha era las raschuns, pertgei che quella moda da scriver plai buc ad el, numnadamein: "par aquaista chaschun chels adrouuen schert bustaps & accens, quæls chi nu uignen adruôs in la leaungia Latina", pia "perquei ch'els drovan certs bustabs ed accents che vegnan buc duvrai el lungatg latin". In da quels bustabs che vegn buc duvraus el lungatg latin ei lu gest era il w-dubel da Chiampell. La critica da Bifrun ei segir buc drizzada directamein encunter Chiampell; il cudisch da Chiampell ei vegnius publicaus pér dus onns pli tard ch'il NT da Bifrun. Ella sa pia mo

3 SP 10 S- 3 esser drizzada encunter Gian Travers, il soli autur enconuschent ch'ha scret ladin avon Bifrun. Chiampell stat denton ella tradiziun da scriver da Gian Travers; lez era da Zuoz, da quei temps la capitala da l'engiadina, e Chiampell da Susch, il vitg il pli sisum da l'engiadina bassa. En pli bia detagls vi jeu denton buc ir cheu; cheu sai jeu sereferir sin artechel che jeu hai scret sez ellas Annalas 103, da 1990, p Sur da Bifrun sez drov jeu era buc dir la massa; quei san ins leger suenter ellas Funtaunas I da Gion Deplazes, p El ei naschius 1506, ei lu ius cun 12 onns a Turitg per sescolar e vegnius en contact leu cun Zwingli e sia refuorma. El va lu vi 1622, pia cun 16 onns, tiels reformai, ei pia probablamein ualti in dils emprems Romontschs ch'ei vegnius refurmaus. Lu studegia el aunc a Paris e tuorna suenter lu en Engiadina, nua ch'el fa giurist e notar a Samedan. El daventa pliras gadas landámma dall'engiadin'aulta ed ha era schiglioc bein enqual post politic. Naven da 1552 sedat el plitost giu cun caussas da religiun; en scadin cass ha el suenter 1552 negin post politic pli, lavura denton vinavon da giurist e notar eis el morts tenor la cronica da Chiampell. La translaziun dil NT ei segir buc l'emprema ovra che Bifrun ha publicau, e quei malgrad ch'el di sez en sia prefaziun al NT, ch'el hagi giu a disposiziun "üngiüns cudesths ne chiartas chi saien stôs stampôs ne scrits aquidauaunt in nos laungaick", pia "negins cudischs ni documents ch'ein vegni stampai ni screts pli baul en nies lungatg." Daco ch'el ha scret quella tschaguola, sai jeu era buc propi. En scadin cass indichescha Conrad Gesner, 'Conrad' magari era screts cun K- e 'Gessner' cun dus <s>, en siu cudisch Mithridates da 1555 sur dalla 'Rhaetica alpina lingua' per latin - jeu citeschel per romontsch: "Sco emprem ( ) ha Jachiam Bifrun, il Ret, entschiet a scriver e publicar quei lungatg. Quel ha era translatau in catechissem da nossa sontga religiun dil tudestg en quei lungatg, stampaus a Puschlav igl onn dil salit 1552." Gesner citescha lu ord quei catechissem il Babnoss, sa pia buc ver inventau quella indicaziun. Dil 'Mithridates' da Gesner ei in soli exemplar semantenius, e lez hai jeu secapescha buc viu. Ei dat denton in reprint da quei cudisch, e da lez hai jeu copiau las indicaziuns decisivas. Las indicaziuns concernent la publicaziun d'in catechismus veis vus alla fin digl emprem alinea, cun l'indicaziuns 1552 alla fin. Ella secunda mesadad dalla pagina veis vus lu il 'Bab nos'. Quel deriva d'in evangeli, ina passascha, che Bifrun ha lu era translatau pli tard el Niev Testament, aschia ch'ins sa cumparegliar ils dus texts in cun l'auter. La versiun da Bifrun sebasa sin Mt 6,9-13; Lc 11,2-4 ha ina versiun empau pli cuorta. Ei dess schon differenzas denter ils dus texts che fussen da tractar. Jeu fetg mo attents sin la scripziun cschil, cun in <c> inizial, ch'ins anfla lu negliu ella transalaziun dil Niev Testament, silmeins a l'entschatta dil plaid, nua ch'ins sa controllar quei sin basa dil glossar da Gartner. Mo cunquei che quei ei en scadin cass buc igl original, aschia ch'ins ei buc dil tut segirs ch'era lez veva quella scripziun, vala ei buc la peina da far memia grondas speculaziuns davart quella scripziun. Il text dils emprems Paternos ladins, inclusiv quel da Chiampell, ein tractai da Sigfrid Heinimann ellas Ann. 88 da 1975, p Exemplars da quella ediziun dil catechissem da 1552 che Gesner numna ein semanteni negins. Ei sto denton setractar da l'emprema ediziun dalla schinumnada 'Fuorma' da Bifrun. L'emprema ediziun semantenida, schegie buc dil tut cumpletamein, datescha da Il tetel romontsch da quei catechissem ei: "Una cuorta et christiauna fuorma da

4 SP 10 S- 4 intraguider la giuventüna " etc.; il tetel ei fetg liungs. Ins anfla el ella Bibliografia retorumantscha , in grond cudisch blau ch'indichescha tut las publicaziuns independentas romontschas naven dalla emprema ediziun dalla 'Fuorma' tochen Pia ella 'Bibliografia rumantscha', abreviada BR, nr Dil tetel resorta era, ch'ei setracta tier la Fuorma d'ina translaziun d'in catechissem dils "predichaunts da Chuoira (Johannes Commander e Johannes Blasius)". Igl original tudestg da quei catechissem ei cumparius 1538, ei denton buc semantenius. Dalla prefaziun alla ediziun da 1571, scretta da Bifrun sez e datada culs "6.[evel] di d'tschner, dalg An 1571", resorta era, che quella ediziun da 1571 sa buc esser l'emprema. El scriva numnadamein gest a l'entschatta da sia prefaziun alla ediziun da 1571: "Haviand eau auaunt uercequants ans fat stamper l'g Catechismum (...) quæl chi es sto scrit dals barmœrs predichians da Chuoria, et da me mis in Arumaunsch, da quæls nun siand plüs auaunt maun, (...) schi hæ eau darchio prais aquaista fadia, & l'g hæ fat stamper." La versiun da 1571 ei era buc mo ina restampa da quella da 1552; el scriva numnadamein era, ch'el hagi "stuuieu bgier imgiurer, et müder per saluêr üna cufgnafla et reguleda fuotscha da scriuer nos launguaick." Tgei ch'el ha lu tut midau ortograficamein en quella ediziun, lasch jeu cheu; schiglioc va ei lu aunc in'uriala tochen che nus vegnin tiel text dil Niev Testament. Da dir ei aunc ch'ei setracta dad in'ovra relativamein pintga; l'ediziun da 1571 cumpeglia 32 paginas. Sut il num da Bifrun va aunc in'ulteriura publicaziun, numnadamein la Tæfla. Era cheu vein nus puspei la scripziun dil [v] da Tævla cun <f>. Cheu fuss la scripziun cun <u>, pia *Tæula, aunc bia pli curiosa, e la distincziun dad <u> e <v> enconuscha Bifrun aunc buc. Indicaziuns pli exactas dil tetel hai jeu buc anflau. L'emprema ediziun enconuschenta da quella 'Tæfla' datescha da 1629, mo lu era Bifrun gia morts daditg. Alla fin da l'ediziun da 1629 stat denton in alinea cul tetel "Iachiam Bifrun agli maister da schoula auuoira salüd", e quel finescha cun l'indicaziun: "Dæda à Samædan l'g prüm di dalg Anno Schquitscho in Turich Anno 1629." Quella postfaziun da 1571 ei pia datada 6 dis avon la prefaziun alla ediziun dalla 'Fuorma' dil medem onn, ch'ei datada, sco gia detg, culs 6 da schaner Bifrun ha pia preparau sur las vacanzas da Nadal gest domisdus texts per la stampa, mo ch'ei deva secapescha aunc buc vacanzas da Nadal da quei temps. Pia astgass era la 'Tæfla' effectivamein ir anavos sin Bifrun, e la scripziun cun <f> el el tetel ei tuttina era in indezi per quei vess ins scret quei cun <v>; da quei temps vegneva la scripziun <v> sempel per [v] ed <u> per [u] schon duvrada ualti dapertut. Aschi lunsch pia las ovras romontschas enconuschentas da Iachiam Bifrun. Dat ei aunc damondas tier quellas? Avon ch'ir tiel text dil Niev Testament da Bifrun che jeu hai tscherniu aunc cuortamein tier la dalla disponibilitad da ses texts per la perscrutaziun. Jeu entscheivel cun la 'Fuorma', ch'ei gie il pli vegl text stampau romontsch, era sch'ei dat negins exemplars pli da l'emprema ediziun. La davosa gada che jeu hai tractau in text da Bifrun, 2002, deva ei aunc negina ediziun scientifica dalla 'Fuorma'. Entgins tocs dalla 'Fuorma' eran publicai ellas crestomazias, en emprema lingia ella 'Rätoromanische Chrestomathie' da Caspar Decurtins, Crestomazia, tom V, igl emprem tom ladin, p Il text ch'ins anfla leu sebasa denton pér silla 3.ed. enconuschenta da 1589, pia ina ediziun ch'ei cumparida pér 17 onns suenter la mort da

5 SP 10 S- 5 Bifrun. Ella ei vegnida procurada da siu beadi, Iachiam Papa, ed il text ei lu era d'anflar ella Crestomazia sut il num da Iachiam Papa, buc sut il num da Bifrun. Papa indichescha el tetel da quella ediziun, ch'il text seigi "huossa da noeff survais ed adampchiô", pia curregius ed amplificaus. Ils texts edi ella Chrestomazia ein inaga l'introducziun da Bifrun alla secunda ediziun da 1571, ch'ei pia reprida ella 3. ediziun. Jeu hai giu controllau ils dus texts inaga, e sche jeu hai fatg e notau quei endretg, ei la versiun da 1571 da quella introducziun vegnida suprida senza midadas ella 3.ed. Mo tiel text dil Catechissem sco tal dat ei lu schon pintgas differenzas. Aschia ei p.ex. la scripziun <u> per [v] dalla 2. ediziun da 1571 e segir era da l'emprema ediziun da 1552 vegnida midada en <v>, pia p.ex. uezan en vezan, denton aunc buc dil tut sistematicamein. Midadas ortograficas hai jeu era aunc notau en in ni l'auter auter cass, buc la massa, mo tuttina. L'ediziun dalla Crestomazia ei en quei cass impeccabla; jeu hai anflau negin cass, nua che la Crestomazia vess enzatgei auter ch'igl original da 1589 en quella prefaziun. Lu suonda ella Chrest. aunc l'introducziun specifica da Iachiam Papa, ch'ha da far nuot cun Bifrun, e lu aunc 3 paginas ord il catechissem sco tal, sco detg, ella versiun da Ina pagina e miez ord quella ediziun da 1589 anfl'ins era ella 'Engadinische Chrestomathie' da J.Ulrich, (EChrest) cumparida 1882, restampada 1980 ensemen cun sia 'Oberländische Chresthomathie', ch'ei cumparida oriundamein in onn pli tard, sco secund tom sut il tetel 'Rhätoromanische Chrestomathie', 'Rhätoromanisch' cun 'R-h', ferton che la Crestomazia da Decurtins ei scretta correct mo cun 'R'. Era tier Ulrich stattan quels texts sut il tetel 'Catechismus von Papa', p.65s., ed el dat ord quei Catechismus mo singuls tocs: il paternies, lu "die 12 Gebote", ch'el ha probablamein sbagliau culs 12 apostels, pertgei condaments dat ei secapescha era tier Papa mo 10, e lu aunc la 'Confeschiun da sainchia vêglia credinscha'. Il text dalla cardientscha hai jeu controllau; el ei corrects, mo ch'el stat sin p.14 da quella 'Fuorma' e buc sin p.17, sco Ulrich indichescha 1. Igl ei buc da smarvegliar pli ch'in ton, che las Crestomatias sebasan silla tiarza ediziun da Dalla secunda ediziun da 1571 dat ei numnadamein era mo in soli exemplar, e quel ei ella 'Staatsbibliothek Preussischer Kulturbesitz', ch'era vegnida suenter la secunda uiara mundiala a Berlin digl ost 2. La bibliotheca cantunala da Cuera ha denton survegniu ina xerocopia da quei cudisch entuorn 1980, aschia ch'ins vess saviu consultar el, quei che jeu vevel era fatg dil temps che jeu erel aunc a Cuera. Uss dat ei denton finalmein era ina ediziun da quei text, fatga da Jan-Andrea Bernhard e publicada ellas AnSR 121, 2008, p , cun ina fetg interessanta introducziun a quella ediziun p Jan-Andrea Bernhard ei buc in linguist, mobein predicant a Castrisch, aschia ch'ei dat in ni l'auter sbagl en siu text, mo quels perdun jeu bugen ad el. Persuenter ha el lu era ina massa detagls quei che pertucca ils catechissems tudestgs da quei temps. La 'Fuorma' ei numnadamein ina translaziun d'in Catechissem dils predicants da Cuera, Johannes Comander e Johannes Blasius, cumparius 1538, ch'ei denton era buc semantenius pli, sco la 'Fuorma' da 1552, ed igl ei pia schon interessant da veser, en tgei tradiziun che quels catechissems stattan. Il text dalla 'Fuorma' da 1571 ei pia puspei disponibels dapi gnanc dus onns. Variantas dalla 3.ed. da 1589 ein indicadas ella ediziun da Bernhard, denton buc gest en moda fetg cuntenteivla per lin-

6 SP 10 S- 6 guists. P.216 ella introducziun vegn indicau, che "Kleinste orthographische Veränderungen zwischen 1571 und 1589 ( ) werden nicht in den textkritischen Apparat aufgenommen". Sco exempels indichescha el ns' enstagl n's, pia ina spustada digl accent; sch'ilg enstagl schigl, pia differenzas d'apostrofaziun, ch'ein per in linguist buc nuninteressantas. Lu suonda aunc: "Weiter ist zu bermerken, dass orthographische Differenzen nur bei ihrem erstmaligen Auftreten aufgenommen werden (z.b. lhium wird immer zu hom)." Quei ston ins lu schon mirar pli exact. Effectivamein ha ei num ella secunda ediziun da 1571 l'g lhium; igl artechel stat pia era avon 'lhium'. Ella 3.ed. da 1589 eis ei lu effectivamein l'g hom, sco quei resorta dil text dalla Crestomazia. Linguisticamein ei la fuorma 'lhium' cun artechel agglutinau buc nuninteressanta, e quei lu cunzun en connex cul Niev Testament da Bifrun. Lez ha numnadamein ni ina ni l'autra da quellas fuormas, mobein la fuorma hum. Schon quei la supponer, che Bifrun ha forsa era buc fatg l'entira lavur vi dalla Fuorma da 1571, mo quei stuess ins lu aunc mirar pli exact. En scadin cass han ins uss la pusseivladad da far quei. Mo indicar quellas midadas mo, cu ch'ei vegnan avon l'emprema gada, ei empau problematic. Sch'ins drova mo ina ni pliras passaschas dil text, ston ins lu bunamein surveser quei. Ei dat lu aunc ina 4. ediziun dalla 'Fuorma', cumparida 1615, che para era d'exister mo ella Biblioteca cantunala a Cuera. Quella ei lu secapescha meins interessanta per la perscrutaziun linguistica, e Bernhard drova lu era ella mo leu, nua ch'ei maunca text ella secunda ediziun. Lezza ei numnadamein buc dil tut cumpletta: p.5 e 6 ed il davos fegl cun pagina 31 e 32 mauncan. Damai che la 3.ed. ha in auter text sin p.5 e 6 che la secunda, ei lez vegnius reprius dalla 4. ediziun, aschia ch'ins ha era stuiu duvrar lezza per vegnir tier in text cumplet dalla secunda ediziun. La quarta variescha bein ortograficamein ualti fetg dalla secunda, denton buc els plaids dalla 2. ediziun. Culla 'Tæfla' stat ei uss mender, quei che pertucca il text. L'emprema ediziun ch'ei semantenida ei quella da 1629, ed in pèr tocs da lezza ein publicai ella Crestomazia da Caspar Decurtins, tom V, p.249s., denter quels l'entschatta e la fin. Quei text ei vegnius plazzaus aunc avon il text dil Niev Testament da Bifrun, perquei che Decurtins carteva che la Tæfla seigi vegnida publicada Il pli interessant da quei text ei secapescha la fin; lezza fa la postfaziun da Bifrun da 1571, e mo sin basa da quella san ins insumma dir, ch'ei sto ver dau ediziuns pli veglias era dalla 'Tæfla' che quella da Contas da quellas ch'ei ha dau, ei secapescha buc d'eruir pli. Ch'ei hagi dau ina ediziun gia 1552 ei denton fetg pauc probabel, sco Bernhard ha saviu demussar. Mo denter quella da 1571 e l'ediziun da 1629 savess ei schon ver dau aunc autras ediziuns. L'ediziun da 1629 ei lu publicada cumpletamein da J.Ulrich, ella 'Revue des langues romanes' 39, 1896, Il text da 1629 ei denton claramein buc screts ella ortografia da Bifrun sez. Perquei lain ins lu era per ordinari d'in maun il text dalla Tæfla. Dalla ediziun da 1629, la solia, dalla quala ins ha in text segir tochen uss, dat ei segir plirs exemplars. La Biblioteca cantunala grischuna ha in exemplar, denton era p.ex. Ottavio Clavuot, sco indicau ella BR. La BR veglia da 1938 indichescha aunc exemplars a Berlin ed ella Rhaeto-Romanic Collection ella Cornell University Library a New York, Ithaca.

7 SP 10 S- 7 La BR indichescha aunc ina ediziun dalla Tæfla per 1642, denton mo cun renviament a Böhmer, che veva fatg e publicau ina gliesta da sia biblioteca. Ei savess esser in exemplar d'ina davosa ediziun da quei text. Lu dat ei aunc ediziuns pli tardivas cul tetel Tævla, ch'ein cumparidas 1674, 1707, 1732 e Quellas han ina scripziun pli moderna dil tetel e cuntegnan era aunc ulteriuras indicaziuns el tetel, che la Tæfla cun <f> da 1629 cuntegn buc. Bernhard ha era dau in'egliada sin quellas ediziuns (p.205, Ann.100). Tenor lez setracta ei effectivamein dad ediziuns che sebasan silla Tæfla da Bifrun, ch'ein denton augmentadas. Ei maunca era la postfaziun da Bifrun; enstagl lezza stattan treis psalms alla fin da quella ediziun. Aunc damondas tier la 'Tæfla'? Quella ei semplamein meins interessanta, perquei che l'emprema ediziun semantenida datescha pér da Plinavon eis ella probablamein tuttina vegnida fatga pér 1571, pia pli tard che las duas autras ovras da Bifrun. Lu tiel text dil Niev Testament da Bifrun. Cun quel stat ei lu tuttina in pulit tec meglier. Per l'ina ha tuttina bunamein mintga gronda biblioteca romontscha in exemplar ton da l'emprema sco dalla secunda ediziun da 1607, denton era bibliotecas sco la Biblioteca centrala da Turitg ni la Biblioteca naziunala a Berna, denton era igl Archiv da litteratura. Andri Peer veva plirs exemplars, schegie ils biars nuncumplets. A Friburg dat ei denton negin exemplar, ed jeu hai era mo in nuncumplet. Mo ei tonscha pia tuttina dad ir tochen Bern per vegnir tier in exemplar. La damonda ei lu mo aunc, sch'ins survegn lu era el, cura ch'ins ei leu. Ei ha secapescha pliras raschuns, pertgei che la translaziun dil Niev Testament ei semantenida meglier che la 'Fuorma' e la 'Tæfla'. Gliez era cudischs fetg satels. La 'Fuorma' ha normalmein 32 paginas; mo la 3.ed. ha 40. La 'Tæfla' ei aunc pli satella: 24 paginas. Cudischs satels van relativamein tgunsch a piarder. Il Niev Testament ha lu 902 paginas en tut, ed in tal cudisch san ins lu buc surveser. La 'Fuorma' e la 'Tæfla' vegnevan plinavon segir duvrai sco cudischs da scola per affons e mavan probablamein d'in affon a l'auter, tochen ch'els vesevan lu ora aschia, ch'ins saveva lu culla megliera veglia buc duvrar els pli, ferton ch'il Niev Testament era probablamein mo en diever da predicants e babs da casa fetg pietus, che legevan lu mintgamai avon enzatgei ord il Niev Testament a lur famiglias. Plinavon ei il Niev Testament probablamein vegnius cumpraus naven da l'entschatta era mo ord prestisch, e gliez ein lu ils exemplars ch'ein semanteni il meglier, perquei ch'els ein strusch ni insumma buc vegnir duvrai. Perquei ein pia bia daplirs exemplars dil Niev Testament semanteni che dils auters dus cudischs da Bifrun. Dil Niev Testament da Bifrun dat ei lu tuttina era ina ediziun scientifica cumpletta da quei text, fatga da Theodor Gartner e cumparida 1913 a Dresden ella retscha 'Gesellschaft für romanische Literatur', tom 32, in cudisch ualti gries, che jeu hai perquei buc priu cun mei. Il problem da quella ediziun ei mo, ch'ella ei tenor mias experientschas bunamein aunc pli difficultusa da survegnir che igl original sez; lez vess jeu survegniu inaga ni l'autra, sche jeu fuss staus pronts da pagar 5-7'000.- francs per el. Ei dat denton tuttina silmeins tontas bibliotecas ch'han quella ediziun che da quellas ch'han igl original e, cuntrari agl original, dattan las bibliotecas lu era or l'ediziun senza pli gronds problems, ferton ch'ei emprestan igl original mo en biblioteca. Quella ediziun ei schizun cheu a Friburg, ed ella ei schizun dad anflar sur il catalog digitalisau, perquei che jeu hai empristau inaga quei cudisch. La raschun pertgei ch'ella ei aschi scarta ei probablamein la data

8 SP 10 S- 8 d'ediziun cuort avon l'emprema uiara mundiala. Jeu supponel che lezza hagi impediu ina derasaziun pli gronda da quella ediziun. Igl ei la solia ediziun moderna cumpletta dil text da Bifrun, ed era lunscho la megliera da tut las ediziuns da texts da Bifrun ch'jeu enconuschel. Jeu hai cumparegliau il text dalla introducziun da Bifrun ella ediziun da Gartner, ch'ei dil reminent era reproducius ellas Funtaunas I da Gion Deplazes, p.80-83, cugl original da Bifrun dalla Biblioteca cantunalada Cuera. Jeu hai anflau mo 4 differenzas sin 9 paginas digl original. Duas gadas ein sbagls da stampa da Bifrun vegni curregi senza indicar la fuorma originala, inaga maunca ina comma, ed inaga ein -u- ed -n- scumbigliai, quei denton en in liug buca dil tut nunsensibel: noeglian enstagl uoeglian. 'noeglian' ei ina fuorma che savess silmeins menar en err in bien latinist, perquei ch'ella fa endamen lat. 'nōlle' "buca vuler", pia gest il cuntrari da quei che 'uoeglian' vul dir. Igl -n- ed igl -u- ein aunc scumbigliai pli ella ediziun da Gartner. Malgrad quellas differenzas creig'jeu ch'ins sappi duvrar l'ediziun da Gartner per la lavur scientifica, schegie ch'ins vegn a stuer dar en cass da dubi aunc in'egliada egl original, sco tier tut las ediziuns da texts. L'ediziun da Gartner ha plinavon dus gronds avantatgs visavi igl original. Primo ein ils vers numerai atras tier Gartner, quei ch'ei buc il cass egl original; era quella numeraziun ei in'invenziun ch'era aunc buc currenta dil temps che Bifrun ha translatau il text. Secundo ha ella alla fin ina cuorta grammatica da gnanc 10 paginas, che vala secapescha buc gest la massa, mo lu vegn lu in glossari da 95 paginas cun indicaziun dil liug, nua ch'il plaid vegn avon, sch'ei setracta da fuormas pli raras, e gliez ei lu veramein in grond agid. Per la lavur scientifica preferess jeu perquei aschia ni aschia l'ediziun da Gartner agl original, mo sche miu Bifrun nuncumplet cunteness il text che jeu duvrass, controlass jeu secapescha el egl original.