Ried vum Jean Huss iwwert déi Lëtzebuerger Kooperatiounspolitik (Séance publique N 30, Compte Rendu N 09)

Transkript

1 Ried vum Jean Huss iwwert déi Lëtzebuerger Kooperatiounspolitik (Séance publique N 30, Compte Rendu N 09) M. Jean Huss (DÉI GRÉNG).- Här President, Dir Dammen an Dir Hären, erlaabt mer am Numm vun der grénger Fraktioun och e puer Wuert hei ze verléieren iwwert de Rapport vum Här Schiltz a vun der Regierung iwwert déi Lëtzebuerger Kooperatiounspolitik zu Gonschte vun enger Partie vu Länner vun der sou genannter Drëtter Welt. Ech wéilt gläich hei zur Illustratioun ufänke mat e puer interessanten Zuelen; et sinn der jo schonn hei genannt ginn: Eng éischt Zuel ass d Zuel 793. Wat ass dat? Wat bedeit d Zuel 793? Abee, dat ass déi nei, vergréissert Zuel vun Dollar-Milliardären, esou wéi se eis an de vergaangenen Deeg vun enger bekannter Finanzzäitschrëft matgedeelt gouf, mat Nimm vun esou Dollar-Milliardären, déi alleguerten also mindestens 30 Milliarden aler Lëtzebuerger Frang hiert Eegen nennen dierfen. An déi mat just ronn 30 Milliarde Frang sinn dobäi am Fong just d'proletarier ënnert dëse Milliardären. Eng zweet Zuel ass d Zomm vun 350 Milliounen Euro. Dat sinn déi Gelder, déi weltwäit all Joer a Waffen a Rüstung gestach ginn; dovun hat d Madame Arendt och scho geschwat. Eng drëtt Zuel ass d Zuel 420 Milliounen. Dat ass d Zuel vun deene Leit aus der Drëtter Welt, déi am Joer 2015, dem Millenniumsjoer also, no seriöe Prognosen ënner extremer Aarmut wäerte leiden, déi da mat manner wéi engem Dollar pro Dag wäerte misse liewen, wa se dann dës extrem Aarmut iwwerhaapt wäerten iwwerliewen. 840 Millioune Leit, Mënsche wéi mir heibannen, gëllen haut no offizielle Kritären als ënnerernährt. Nach en interessanten, mä och skandaléisen Zueleverglach: Während hei bei eis an den héich industrialiséierte Länner d Obésitéit vun de Kanner zouhëlt op praktesch - 1-

2 eent vun zéng Kanner, stierwen all Joer ronn sechs Millioune Kanner an dem Tiers- Monde ënner fënnef Joer u Malnutritioun a se hunn net genuch z iessen. Ech wëll Iech hei aner interessant a schockant Fakten an Zuele vun de soziale Realitéiten a villen Tiers-Monde-s-Länner erspueren. Mir kenne se alleguerte schonn zënter Joren: - zum Beispill de Beräich Santé mat de Stéchwierder: Aids-Drama, Malaria an Tuberculose; - de Beräich Aarbechtslosegkeet, Chômage an Aarmut, mat ronn 70% reellem Jugendchômage zum Beispill a munchen afrikaneschen oder latäinamerikanesche Groussstied, a mat där domadder verbonnener Kriminalitéit, Zwangsprostitutioun, Drogenhandel an esou virun; - de Beräich Fraenënnerdréckung, mat nach ëmmer mëttelalterlechen Antifrae- Praktike wéi Klitorisbeschneidung oder fundamental islamesche Schariapraktiken a mat nach ëmmer milliounefachem Stierwe vu Frae bei Accouchementer; - de Beräich Zougang zu Educatioun, Beruffsausbildung, Zougang zu propperem Waasser, zur Ofwaasserklärung, Hygiène, Müllentsuergung an esou virun, déi nach ëmmer honnerte vu Millioune Leit verwiert bleiwen, - a schliesslech de Beräich Ëmwelt a Gesondheet, wou haut scho vill Leit drënner leiden, mä wou duerch de Klimawandel an Zukunft nach vill méi Leit wäerte riskéieren, ënner jorelaanger Dréchenheet oder Iwwerschwemmungen ze leiden; vum wuessenden Aids-Skandal net emol ze schwätzen; vun der Vullegripp och emol net, well déi hätt, wa se do austrëtt, ganz aner Konsequenzen nach wéi hei. Esou wäit, Dir Dammen an Dir Hären, just e puer schockant, oder solle mer vläicht éischter soen, zynesch Zuelen iwwert d Realitéit vun dëser Welt, iwwert déi sozial Realitéiten am Verhältnis tëschent Räich an Aarm, tëschent Nord a Süd, obschonn déi neoliberal Entwécklungen aus deene vergaangenen 20 Joer dozou gefouert hunn, datt et och hei am Norden ëmmer méi Aarmer gëtt, an datt am Süden och eng - 2-

3 Partie räich Eliten hir eegen aarm Bevölkerung weider ënnerdrécken an ausbeuten. Räich a superräich Profiteure gëtt et haut iwwerall. Dir Dammen an Dir Hären, aus dësen déprimanten Zuelen a Fakten ergëtt sech vum selwen, wéi wichteg Solidaritéit, wéi wichteg ënner anerem eng seriö sou genannten Entwécklungshëllef grad och haut ass. An och wa mer haut hei zu Lëtzebuerg eng Partie vun Unzeeche vu Kris hei am Land selwer hunn - eng Partie vu Firmen, déi zoumaachen, Budgetsproblemer beim Stat an esou virun -, esou däerf dat an eisen Aen net dozou féieren, eis bishereg finanziell Entwécklungshëllef-Efforten a Fro ze stellen. Entwécklungshëllef-Politik bleift weiderhi wichteg aus Grënn vu Solidaritéit mat Mënschen, deenen et onvergläichbar vill méi dreckeg geet wéi eis hei: - Aus deem ekonomesch evidente Grond, datt och mir selwer dobäi an Zukunft géife gewannen, wann et dem Tiers-Monde mëttelfristeg géif geléngen, op e méi avancéierten ekonomeschen Entwécklungsstand ze kommen; - aus deem Grond och, well am Kader vun der Globaliséierung eis Welt ëmmer méi zu engem Duerf ginn ass, a Problemer wéi de Klimawandel, Ëmweltproblemer, Epidemien an esou virun net méi viru Landesgrenzen an och net méi viru Grenze vu Kontinenter Halt maachen. A schliesslech zum Schluss nach en Argument zu Gonschte vun Entwécklungshëllef an Entwécklung vun Afrika, vum Tiers-Monde: Well d Alternativ nëmmen déi kënnt sinn, datt et nach vill méi staark wéi bis elo zu Völkerwanderungen, zu Migratiounen aus dem Süden, aus Nordafrika oder Afrika, an Europa géif kommen. Net méi spéit wéi haut stoung eng grouss Schlagzeil am Tageblatt ze liesen, wéi wa Afrikaner virun eise Grenze géife stoen. Als Gréng si mir der Meenung, datt Europa opgrond vu senger Demographie souwisou eng gewëssen Immigratioun wäert brauchen, mä ech mengen awer och, datt et dobäi op verstänneg Equiliberen ukënnt an datt et op jidde Fall och erstriewenswäert ass, de Mënschen an hire Länner selwer ze hëllefen, fir sech eng - 3-

4 mënschewierdeg Zukunft opzebauen; also keen Ofbau vun Entwécklungshëllef, mä an eisen Aen e weideren Ausbau vun dëser Hëllef. Wat eis awer bei Ärer Analys feelt, dat wier eng Analys - nëmmen a kuerze Wierder - doriwwer, firwat trotz europäescher an internationaler Entwécklungshëllef aus deene leschten 30 Joer d Situatioun vun deene meeschte Länner vum Tiers-Monde sech bis haut nach net verbessert huet, mä sech a villen Drëttweltlänner souguer nach verschlechtert huet. An do geet och déi sécher éischter historesch Erklärung vu Kolonialismus a Sklaverei net duer. Déi gëtt et, mä si geet net duer. Et gëtt och do an eisen Aen an och aus der Vue vun de Länner vum Tiers-Monde aktuell Ursaachen. An dat ass dat, wou et drop ukënnt. Ursaachen, déi mat där feelender Kohärenz vun den europäeschen an internationale Politiken ze dinn hunn. Déi räich Industriestate bedreiwen op där enger Säit nämlech eng Kooperatiounspolitik, si ginn Entwécklungshëllefgelder, déi zwar - ech hunn et gesot - bei wäitem ze niddreg sinn, op där anerer Säit awer gëtt zënter 20 Joer an der Handelspolitik, an der Finanzpolitik an op aner Politikfelder eng absolut egoistesch neoliberal Politik duerchgezunn, déi deene meeschten Drëttweltlänner iwwerhaapt keng Chance léisst, sech eegestänneg kënnen ze entwéckelen oder och just nëmmen eng gewësse Sécurité alimentaire ze erreechen. Et ass jo net esou, wéi wann et zum Beispill an Afrika, a Latäinamerika oder och an aneren Drëttweltlänner keng wäertvoll Buedemschätz géife ginn. Mä dës Buedemschätz - Beispill Kongo, Beispill Bolivien - sinn an den Hänn vu groussen transnationale Firmen, sou datt d Bevölkerunge vun esou Länner bis elo nëmme ganz wéineg dovunner profitéiert hunn. Datselwecht gëllt fir hir Liewensmëttel oder Naturprodukter, Beispill Banannen oder Kaffi, woubäi och nach dobäi kënnt, datt an deene vergaangenen 20 Joer d Präisser fir Exportprodukter aus der Drëtter Welt, déi op de Boursen zu London oder zu New York festgesat ginn, praktesch stänneg gefall sinn - wann een emol vun de Pëtrolspräisser ofgesäit. - 4-

5 Doriwwer eraus ass eng weider evident heiteg Ursaach firwat de maldéveloppement weidergeet an et net zu engem Décollage kënnt déi weidergehend Verscholdung vun deene meeschte Länner aus der Drëtter Welt. Ronn 40% an der Moyenne vun hirem Gesamtbudget ginn a villen Drëttweltlänner eleng dofir drop, fir hir Scholdzënsen u westlech Banken zréckzebezuelen, an dat bei Statsbudgeten, déi souwisou schonn ënner chronescher Schwindsucht leiden. Wéi sollen do esou Staten iwwerhaapt kënnen Investitiounen a Waasserversuergung, Bildung a Gesondheet, an noutwendeg Transport- oder Stockageinfrastrukture selwer finanzéieren? Infrastrukturen, déi awer Viraussetzunge wiere fir eng wierklech eegestänneg Entwécklung; vun den Erfuerdernisse vun engem wierkleche kompletten Développement durable iwwerhaapt emol net ze schwätzen. A wa sech dann déi verantwortlech Politiker aus Drëttweltlänner an hirer Noutlag erëm eng Kéier un den Internationale Währungsfong oder und d Weltbank wenden, fir nei Kreditter ze kréien, da kréie se vun dësen neoliberalen, fräihandelsorientéierten Agencen, déi haaptsächlech ekonomesch Intérête vun den USA, vu Japan an der EU vertrieden, zënter 20 Joer eng Politik octroyéiert, déi de Géigendeel ass vun enger eegestänneger Entwécklung. Si mussen hir Grenzen nach méi opmaache fir subventionéiert bëlleg Importer, si solle liberaliséieren a privatiséieren a si sollen an hirem Haushalt, an hirem eegene Budget, virun allem bei Bildung a bei Gesondheet spueren. Dës Politik vun den internationale Finanzinstitutiounen ass et och, déi zu deenen trauregen, och verheerende Konsequenze vun zounehmender Veraarmung, sozialer Exklusioun an Honger geféiert huet an och weider féiert. A soulaang kee Wëllen an de räichen Industriestate besteet, bei de Froe vun Entschëldung a vun déif gräifende Reforme vum Internationale Währungsfong a vun der Weltbank den Drëttweltlänner ganz wäitgehend entgéintzekommen, soulaang wäert et och net kënnen zu wesentleche Verbesserunge vun der Situatioun an de Länner vum Tiers-Monde kommen. Dir Dammen an Dir Hären, et wier och ganz vill iwwert de Rôle vun der Welthandelsorganisatioun - der OMC - a Bezuch op d Relatiounen Nord/Süd ze - 5-

6 soen. Well déi honorabel Häre Goerens an Adam awer e Bericht iwwert d Konferenz vun Hongkong hei wëlle maachen - ech huelen un, datt dat geschwë wäert geschéien -, nëmme ganz kuerz (Interruption) Dozou also nëmmen hei op dëser Tribün ganz kuerz, Här Goerens. D OMC - dat ass dat Mannst wat een haut muss soen - gëtt weiderhin dominéiert vun de Fräihandelsinteresse vun de räichen Industriestaten, an dat och wann elo zënter kuerzem eng Partie sou genannt «pays émergents», wéi China, Indien, Brasilien an esou virun, ugefaangen hunn dobäi matzespillen. Mä wiem seng Interesse bei den OMC-Konferenzen nach ëmmer keng bedeitend Roll spillen, dat sinn ouni Zweifel nach ëmmer déi meeschte Länner aus dem Tiers-Monde. An et ass dofir och kee Wonner, wa sech d Vertrieder vun Afrika, vu Latäin- oder Mëttelamerika bei OMC-Konferenzen ëmmer erëm iwwert den handelspoliteschen Egoismus vun Industriegroussmächten, neierdéngs och iwwer China, beschwéieren. Ee Beispill - en dramatescht Beispill -, wéi iwwert d OMC-Regele Politik gemaach gëtt um Bockel vum Tiers-Monde, an dësem Fall um Bockel vun Afrika, ass dee säit Jore schonn undauernden Aids-Skandal. Milliounen Afrikaner sinn infizéiert, d Zuele steige weider un - och d Zuele vun den Aidsdoudeger -, an déi afrikanesch Mënsche bräichte méiglechst bëlleg Aidsmedikamenter, virun allem déi nei Tritherapië vun der zweeter Generatioun. Mä déi international Pharmakonzerner, vun deene bekannt ass, wann een d Bilane liest, datt se all Joer erëm op en Neits ëmmer méi héich Profitter maachen, kréien es leider nach ëmmer net genuch. Et ass hinne gelongen, ab August 2005 déi sou genannten ADPIC-Accorden an der OMC, also e wäitgehende Brevetschutz fir hir deier Tritherapien, duerchzesetzen, sou datt sou genannte Génériquen do dervunner nach just a Fäll vun absoluter Urgence an op Demande vun engem eenzelne Land däerfen ugefrot a geliwwert ginn. Wat natierlech all Ureiz ewechhëlt, esou Génériquen a Bëlleg- a Masseproduktioun hierzestellen, mam Resultat, datt déi Aidskrank an - 6-

7 d Santésministere vu ville State mussen op Liwwerunge vu vill méi deieren Tritherapië vun de Pharmaindustrien zréckgräifen. Hei ginn shareholder value an héchstméigleche Profit eendeiteg op d Käschte vu Gesondheet a Liewensqualitéit. Hei wäerten iwwer esou OMC-Regele vill nach jonk afrikanesch Mënschen onnéideg stierwen, well se sech déi deier Medikamenter ganz einfach net méi wäerte kënne leeschten. Dir Dammen an Dir Hären, ech hat virdrun dovunner geschwat, datt et beim IWF a bei der Weltbank misst zu déif gräifende Reformen an hirer Orientéierung kommen; ënner anerem zu Gonschte vun den Intérête vun de Länner vum Tiers-Monde. Datselwecht gëllt evidenterweis fir d OMC, déi sech praktesch als iewescht Weltinstanz am eenzegen Interesse vun engem ongebremste Fräihandel etabléiert huet, an déi iwwer e sou genannten Comité de règlements des différends an Usproch hëlt, praktesch all handelspolitesch Konflikter, och déi, déi mat der Ëmwelt, mam gesondheetleche Verbraucherschutz oder mam Aarbechtsrecht ze dinn hunn, eleng kënnen ze entscheeden. Dat ass an eisen Aen inakzeptabel, an dofir verlaange mer op deem Niveau vun den Institutiounen, datt och d Roll vun der OIT, vun der Internationaler Aarbechtsorganisatioun, d Roll vun der OMS an d Roll vum Ëmweltprogramm vun der UNO verstäerkt gëtt, sou datt déi kënne wierklech endlech eng staark Géigepart spille vis-à-vis vun där dominanter Roll vun der OMC. All dës Aspekter, also d Ierfschafte vum Kolonialismus an Neokolonialismus, d Fro vun enger wäitgehender Annulléierung oder Reduktioun vun de Scholde vun den Drëttweltlänner, d Fro vun néidegen déif gräifende Reforme vum Internationale Währungsfong, der Weltbank an der OMC an d Fro vu méi Gerechtegkeet am Welthandel insgesamt spillen eng wichteg Roll, wann et soll geléngen, déi international Kooperatiounspolitik zu engem wierklechen Erfolleg ze bréngen. Lëtzebuerg mécht a senge konkreten Aktioune mat senge ronn 0,9% Entwécklungshëllef haut grosso modo eng gutt Kooperatiounspolitik. Mä eist Land ass awer och Deel vun der Europäescher Unioun, Lëtzebuerg huet do och eng - 7-

8 Stëmm, a mir sinn och Deel vum Internationale Währungsfong oder vun der Weltbank. Mir mussen dofir och oppassen a kucken, datt eis Entwécklungspolitik, déi am Klenge grouss Erfolleger opweise kann, net op där anerer Säit duerch néfaste Politiker vum Internationale Währungsfong, der Weltbank oder der OMC erëm futtigemaach gëtt. Mir brauchen also Kohärenz an eise politeschen Aktiounen, fir datt se glaubwürdeg sinn. An all betraffe Ministerressorte sollten dobäi un deemselwechte Strang zéien, fir den Entwécklungslänner endlech wierklech Entwécklungschancen opzemaachen. A mir sinn, Här Minister, dofir och gespaant op Äre Rapport vum nächste Joer, fir ze gesinn, awéiwäit dës Froe vun der politescher Kohärenz vun de Politiken doranner da wäert Agang fannen. Zum Schluss nach just zwou kuerz Bemierkungen: Eng éischt par rapport zu de Mikrokreditter, déi an eisen Aen och e sënnvollt Instrument vun der Entwécklungsförderung op der Basis, also um konkreten Terrain kënne sinn. Mir gesinn dës nei Entwécklung also als absolut positiv, virun allem wann op déi Aart a Weis zum Beispill konkret Projete vu Fraeförderunge kënnen an d Rulle bruecht ginn. Et ass hei de Mëtte vill vun der Wichtegkeet vun der Fraeförderung geschwat ginn, wat mir och kënnen ënnerstëtzen. Et muss een allerdéngs am kloere Bewosstsäin behalen, esou positiv wéi Mikrokreditter an déi Entwécklungen och sinn, datt déi Mikroprojeten net vill wäerte kënnen änneren un de grousse makroekonomesche Problemer, och wann déi Mikroprojeten, wéi gesot, solle punktuell duerchaus positiv sinn. An dann eng zweet Bemierkung, Här Minister, oder éischter eng Fro zum Schluss par rapport zu där neier Iddi vun der sou genannter Kerosinsteier, wéi se am Entwécklungskontext zënter e puer Méint an d Gespréich bruecht ginn ass, a wou an eisen Aen de Risque ka bestoen tëschent enger Vermëschung vun der Kyoto-Politik op där enger Säit an der Entwécklungspolitik op där anerer Säit. Dozou e puer Froen. - 8-

9 Här Minister, bleift et an der Entwécklungspolitik bei där aktueller normaler Speisung aus dem Statsbudget a Richtung vun 1% vum PIB? Wéi stitt Dir zu där Kerosinsteier an enger eventueller Verwendung do derzou? A schliesslech an deem Kontext och vu Kyoto: Wéi steet d'lëtzebuerger Regierung zu hire Kyoto-Verflichtungen, dat heescht fir awer dem Gros vun hire Verflichtungen, zumindest 50% dovunner, hei zu Lëtzebuerg selwer nozekommen? Mir hätten do also de Wonsch no Opklärung vun Iech. Dat gesot, wëll ech awer nach eng Kéier hei ënnersträichen, datt mir mat Ärer konkreter Kooperatiounspolitik kee Problem hunn an déi weider wäerten ënnerstëtzen. Merci. Une voix.- Très bien. M. le Président.- Merci, Här Huss. Den nächste Riedner ass den Här Henckes. Dir hutt d'wuert, Här Henckes. - 9-