SMA 11 S- 32. Aunc damondas tier quei problem?

Transkript

1 SMA 11 S- 31 Nus vein dau la davosa gada in'egliada sin igl artechel 'masler / mischlà' dil DRG. Il muster da quels artechels ei en principi adina il medem. Igl emprem vegnan las fuormas dialectalas, sch'ei han da quellas a disposiziun. Lu vegn indicau, en tgei vocabularis pli vegls ch'il plaid ei tut d'anflar, entschiet cul pli vegl tochen tier il pli giuven, pia cronologicamein. Lu vegnan las differentas significaziuns dil plaid, ina suenter l'autra, mintgamai cun exempels. Igl emprem vegn per ordinari indicau exempels dil lungatg plidau, lu exempels dil lungatg scret. Lezs ein lu puspei ordinai d'ina vart tenor regiun: Engiadina, Grischun central, Surselva, da l'autra vart duessen els esser ordinai cronologicamein. Il pli vegl exempel ch'ei han anflau stuess esser igl emprem era enteifer la regiun. Tier artechels pli vegls san ins buc quintar cun quei, mo tier artechels pli giuvens duess quei funcziunar. Quei che pertucca ils artechels hai jeu priu in artechel relativamein concis. Igl artechel il pli liung dil DRG tochen uss ei igl artechel 'man / maun' cun 59 paginas, ch'ei probablamein ualti pil gat. En in vocabulari encuer'ins enzatgei, e sch'ins sto encurir enzatgei en in artechel da 60 paginas, cal'ins avon ch'entscheiver, perquei che las schanzas dad anflar quei ch'ins encuera ein miminas. Il temps ch'ins drova per encurir enzatgei en in tal artechel stat en scadin cass en negina relaziun cun quei ch'ins anflass lu veramein aunc el meglier cass. La fin fa lu adina l'etimologia, ch'ei era scretta tradiziunalmein pli pign ch'il rest, probablamein perquei ch'ins suppona che mo specialists legien quei, quei ch'ei probablamein era correct. L'emprema frasa veva Silvana legiu e nus tractau: ei vegn indicau en quella, en tgei lungatgs e dialects ch'ei dat aunc plaids che van anavos sin latin MAXILLĀREM, igl acc.sg. da MAXILLĀRIS, ch'ei indicaus cheu. Igl ei denton bunamein adina la fuorma digl accusativ ch'ei il pugn da partenza dils plaids romans. La fuorma digl acc. ha surpriu schon el latin vulgar la funcziun da tut ils casus auter che dil nominativ, aschia che quella fuorma era bia pli frequenta che quella dil nominativ: Perquei ei lu la fuorma digl accusativ vegnida generalisada, cu ch'ins ha dau si el temps medieval era la distincziun denter nominativ ed accusativ. Ei vegn lu era renviau a differents vocabularis etimologics, nua ch'ins anflass probablamein era las fuormas ch'ein citadas cheu; quellas van gie buc ils redacturs dil DRG ad encurir. Lu legin nus aunc a fin la part etimologica. Legi inaga la secunda frasa, l.19-23, ch'ei buc gest aschi liunga sco l'emprema. Il problem ei, ch'ins sto supponer ina midada da suffix per declarar las fuormas sin ḕr el vallader; MAXILLĀREM vess stuiu dar 'maslār' el vallader, buc 'maslēr'. Ei para denton da dar singulas fuormas sin ēr era el talian dil nord ed el franzos. Quei vegn lu declarau cheu cun supponer ina midada da suffix dad ĀREM sin ĀRIUM. Igl Idil suffix ĀRIUM palatalisescha igl Ā- aschia ch'il resultat ei ē- els lungatgs galloromans. En quella declaraziun ei denton -ĀRIUM mo ina sort ideogram, in segn che significhescha enzatgei, senza ch'il connex denter ideogram e quei ch'el significhescha seigi clars. In plaid latin *MAXILLĀRIUM ha ei numnadamein segir mai dau. Documentaus eis el buc, e per reconstruir el pli latin vulgar eis el buc derasaus lunsch avunda. El ei pia silpli galloromans, buc latins, e probablamein gnanc gliez buc, perquei ch'el ei mintgamai mo documentaus sporadicamein en tut ils lungatgs che vegnan citai, era el romontsch. Leu eis ei gie mo il vallader e la Val Müstair ch'han ina fuorma sin -ḕr enstagl ār, sco ch'ei fuss da spitgar. Sin basa da quei stuess ins lu era encurir la raschun, pertgei ch'il plaid ha num leu 'masler' el vallader sez. Ei dess pliras pusseivladads,

2 SMA 11 S- 32 p.ex. l'influenza d'in auter plaid sin ēr, in plaid surprius dil puter ni eventualmein d'in auter dialect. La secunda ediziun dalla Bibla da Scuol ha en scadin cass era la fuorma 'sculers' per ils giuvnals da Christus, ferton che l'emprema ha 'sculars'. Mo igl ei clar, che gliez ei lu in pulit tec pli difficultus da demussar che da semplamein supponer in auter suffix latin, e secapescha gest quel ch'ei drova per declarar las fuormas specificas. Tenor miu manegiar ei quei proceder cun ideograms latins scientificamein nuncorrects, mo damai che tut ils romanists fan quei aschia, sun jeu era aunc buc vegnius da perschuader ils redacturs dil DRG da far quei auter. Per las fuormas dall'engiadin'aulta drova ins buc supponer il suffix ideogrammatic ĀRIUM, perquei che leu daventa in Ā- liung automaticamein ē-. Perquei ein ils resultats dil suffix ĀREM e quels dil suffix ĀRIUM identics el puter, quei che schon Melcher veva remarcau. Aunc damondas tier quei problem? Lu legi la proxima, l Cul tierm 'sincopa' designesch'ins l'eliminaziun d'in vocal nunaccentau, aschia ch'ils consonants avon e suenter lezs vegnan en contact in cun l 'auter. En certs cass gioga ei ina rolla, schebein ina gruppa da consonants ei oriunda ni per seresultada entras sincopa, ed en auters cass vegn ins insumma mo aschia tier certas gruppas da consonants, sco cheu. Cheu ei igl I- nunaccentuau da MAXILLĀREM eliminaus, aschia ch'ei dat il nexus ksl-, ch'ei dat buc el latin. [ks]- vegn simplificau ad [s]; lat. AXEM > assa el vallader, aissa el sursilvan; leu daventa igl [a] aunc [ai] avon [ks]. Dil [ks] che ei daventaus s- e cun eliminaziun digl I- resorta lu sl-. La damonda ei uss, tgei che quei sl- far vinavon. Vein nus la successiun [sl] el romontsch? - All'entschatta dil plaid mo en 'slalom' e 'slav', buc gest invenziuns romontschas. Mo agl intern dat ei in ni l'auter. 'aisel, aisla' "arbeitsam", 'braslentar' "fest braten", 'brausel, brausla' "schwach"; 'pasler' "Spatz", 'frosla' "Hagebutte", 'grasslut' "rundlich", 'insla' etc. Per sursilvan dat ei era 'mislar' "schlagen", e 'maslada' dev'ei era ell'engiadina bassa pli baul. Co vegn jeu tier quels plaids? Dar en ella banca da datas dil rumantsch grischun <sl>, intern e rumantsch-tudestg, e lu survegnis els suenter in'uriala. Ei va era cun la banca da datas sin internet. Co stat ei cun schl-? All'entschatta dil plaid dat ei massas: schlitta, schlieusa, schlatta, schlonda, schluppar etc. Egl intern dil plaid ei schl- empau pli rars, mo ei dat tuttina era bein enqual: beschlar, raschlar, vaschler, veschla. Ei dat schizun aunc in auter plaid romontsch che variescha denter sl- e schl-; la 'gheisla' ha num el ladin 'la giaischla'. Era leu ei schl- secundar; il plaid vegn da tud. 'Geissel'. Ei para pia da dar in svilup secundar da sl- a schl-, mo cu che quel succeda e pertgei, ei lu aunc ina autra damonda. Pil mument vegn ins a stuer schar cun quei ch'il 'Handwörterbuch', il vocabulari etimologic romontsch, indichescha sut 'mischlà': "-šl- entsteht sekundär aus sl-." Cun quei han ins bein era buc declarau il svilup, mo la constataziun ei bein correcta. Il renviament a 'visdar' ch'ei fatgs cheu gida denton nuot; tut ils plaids cun la successiun <sd> vegnan pronunziai [žd]. All'entschatta dil plaid ei quei en rg 'sdarmanar, sdignar, sdiavlar, sdrappar, sdratsch, sdrima', egl intern dil plaid en rg 'dasdar, masdigl, disdir, glindesdi, rasdiv, susdar' etc. Jeu hai anflau in soli plaid cun la successiun [zd]- el romontsch, numadamein 'giurisdiziun', era buc ina invenziun romontscha. *[vizdā] fuss pia

3 SMA 11 S- 33 gnanc pusseivel buc, mo [mislā] bein. L'indicaziun dil Handwörterbuch ei pia pli correcta. Aunc damondas tier quella frasa? - Lu aunc la davosa. Legi inaga. Vesis, pertgei ch'ei va cheu? Per declarar in pèr fuormas singulas che varieschan dallas fuormas pricipalas. L'emprema da quellas ei 'manslḗr' en E 35 ni a Müstair, denton mo leu. Ella ei era documentada el ms. Lombardin, in vocabulari dalla Val Müstair. Quei manuscret citescha il DRG sin basa d'ina copia ch'era vegnida fatga. Igl original era ella Biblioteca Böhmer ed ei uss effectivamein a Krakau, sco Paul Videsott ha constatau. A Müstair ei pia vegniu integrau in [n] supplementar en quei plaid; epentesa vul dir "Einschub". Quei tierm vegn duvraus, cu che ins sa culla megliera veglia buc declarar ina consonant supplementar en ina fuorma d'in plaid. Savens gioga in auter plaid cun ina structura e semantica semeglionta ina rolla. En lezs cass discuorra 'ins lu dad analogia. Mo en quei cass para ei buc da dar in model che vegness en damonda per declarar igl [n] supplementar. En scadin cass indichescha era Schorta el liung citau el DRG negin model per quella fuorma. In'autra fuorma speciala han Marmorera e Bivio. Leu ha il plural num 'mislerts' enstagl 'mislers'. Cheu stuess ins uss saver, co che [rs] vegn tractau en quels dialects, mo tier Candrian anfl'ins nuot da quei. A Bravuogn fuss [rts] la regla; leu vegn bunamein adina integrau in [t] denter [r] ed [s]. Lutta numa el liug citau el DRG ina massa exempels: 'er erts' per 'êr ers', 'arts' enstagl 'ars', 'la buǎrtsa, e schizun 'ils pokṛts', che fuss tgei per sursilvan? 'ils purs', surmiran 'ils pours', ch'han era num 'pogrs' da Savognin ensi, mo ch'ha silmeins buc aunc in [t] denteren. Il davos exempel d'ina specialitad ei lu il plural 'mislaks' a Trin, e gliez "setzt" lu segir buc "Suffix ACCU voraus". In suffix ACCU dat ei buc el latin; el ei mo inventaus per declarar in pèr plaids romontschs che fineschan cun ac. Cunquei che la fuorma dil da singular ei normala a Trin, vegn pia da MAXILLĀREM, stuess quei dar in paradigma MAXILLĀREM - *MAXILLĂCCŌS, acc.pl., e paradigmas aschi abstrus dat ei lu veramein buc el latin. Cheu stat igl ideogram latin lu veramein mo per buc stuer far patratgs davart la fuorma. Cheu stuess ins saver, co ch'ins sa tut far il plural a Trin avon ch'ins sa dir enzatgei da quella fuorma. Al latin san ins schon buc dar la cuolpa da quella; per gliez eis ella lu memia singulara. Sch'ella ei schon documentada mo a Trin, eis ei logic ch'ella sto era vegnir declarada sin basa dil lungatg da Trin e nuot auter. Lu vessen nus era l'etimologia; dat ei aunc damondas tier quella part? Damai che nus enconsuchin uss il punct da partenza da quei plaid fagein nus gest in exercezi d'etimologia cun quel. Ella 'Philologie romane', ch'era obligatoria pli baul per tut quels che studegiavan in lungatg roman, vevan ils students da far exercezis d'etimologias. Ei survegnevan in text da 10 ni 20 vers e stuevan indicar l'etimologia da tut ils plaids da quei text. Quei era schon human; a Turitg stuevan ils students etimologisar 200 vers. Era a Friburg era ei da far pliras da quellas lavurs, mo ins vegneva silpli sin 50 vers, buc dapli. Ina da quellas lavurs astgavan ils students romontschs era far sur dil romontsch, e lezzas vev'jeu lu da curreger. Da far eran quellas etimologias sin cartas da cartoteca. 4 da quellas hai jeu copiau sin quei fegl, per che vus vesies aschi ca. sco quei mava. Sin quellas cartas era il svilup da mintga sun d'indicar separada-

4 SMA 11 S- 34 mein cun indicaziun dil paragraf, nua ch'il sun era tractaus. Per franzos era ei dad indicar il paragraf dil Bourciez, Phonétique française. Pil romontsch era quei pli difficultus all'entschatta, mo inaga che la 'Historische Lautlehre des Bündnerromanischen' ei stada cumparida, era ei secapescha lezza ch'era d'indicar. Sil fegl ei schon quella citada, sco quei ch'ins vesa vi dalla sigla HLB. Il text dil fegl ei l'entschatta dil Psalm 31 da Stefan Gabriel: Nus spronza vein sin tei Sègniur / Vangyr nus lai buc á zanur. ed ils plaids ils pli impurtonts da quels dus vers veis vus sil fegl. Mo nus lein uss buc controllar la lavur d'ina studenta da pli baul, mobein mirar, co ch'ina tala carta vesess or per MAXILLĀREM. Il plaid latin, ch'era pér d'eruir normalmein, vein nus pia schon. Quei che pertucca il romontsch, stuein nus lu aunc sedecider per ina ni l'autra fuorma, la valladra ni la sursilvana. Domsiduas ein denton buc propi regularas. Ei dat era il plaid en rg; leu fuss el mislar. Quei ei la fuorma da Ruschein, denton era quella digl entir Grischun central da C2-C9 e da S1-S5, pia segir la pli derasada. Jeu pren inaga quella sco pugn da partena; las variantas discutein nus lu aunc. Il tetel fuss pia: mislar < MAXILLĀREM. Lu stuess ins declarar igl emprem igl M- inizial. Jeu hai gia dau a vus la tabla da cuntegn dils vocals dalla HLB; cheu aunc quella dils consonants. Tiels consonants ei la caussa empau pli sempla che tier ils vocals, silmeins a prima vista. Cheu dat ei inaga 'Anlautende Konsonanten - Anlautende Konsonantengruppen Inlautende einfache Konsonanten Doppelkonsonanten' ed 'Inlautende Konsonantengruppen'. Leu ston ins lu aunc encurir empau, sch'ins vegn tier ina da lezzas. Nua encuris igl M- da MAXILLĀREM? Sut 'Anlautende einfache Konsonanten' inaga. Lu? Sut 'Bilabiale' para el buc dad esser, malgrad che /m/ ein in bilabial. Mo effectivamein vegn el buc tractaus tenor siu liug d'articulaziun bilabial, mobein tenor sia moda e maniera d'articulaziun, e leu eis el in sun nasal, perquei che l'aria va tras il nas cun formular quei sun. Effectivamein stat lu sut "Nasale" igl emprem igl M, cun in renviament a pagina 233. Il paragraf corrispundent ei 304a, e leu ha ein num: "M- ist erhalten". Quei dess pia, el sistem da notaziun usual ella filologia romana: M- > m- ed il commentari "resta intact" ed il renviament a HLB 304a. Igl exempel 'masler/mischlà' numna ella buc en quei liug, mo tut ils plaids che van tenor ina regla vegnan praticamein mai indicai, nun ch'ei seigi mo paucs. Il plaid 'masler' ed il plaid 'mischlà' ein bein indicai egl index dalla HLB, mo a quei paragraf vegn buc renviau. Per quei svilup dat ei auters exempels avunda, aschia ch'ei drova buc aunc quel cheu. Aunc damondas tier quei sun? Il proxim ei lu pli difficultus. Da partir ei puspei dil plaid latin MAXILLĀREM, e leu ei quei A- en tgei posiziun? En scadin cass nunaccentuaus. Vor- ni nachtonig? Vortonig. Igl accent ei sigl Ā- liung. Lu aunc 'nachenbentonig' ni 'anlautend'? Priu exact ni in ni l'auter: ei ha negina silba avon, aschia ch'ei sa buc esser 'nachnebentonig', ed igl A- stat era buc all'entschatta dil plaid; leu vein nus gie igl M-. En quella fonetica vul denton 'anlautend' mo dir "en emprema silba", aschia ch'ins mirass inaga sin p.191. En 261a vein nus igl emprem in exempel, nua ch'igl A- stat veramein all'entschatta dil plaid, AMĪCUM > scret amitg, pronunziau [Ǎmiċ] etc. Exempels en emprema silba ein lu 'camischa' ils treis proxims lasch jeu ad interim giudem la pagina 'marti' e

5 SMA 11 S- 35 sin l'autra lu aunc 'savun', ed il davos ei lu puspei in pulit tec pli cumplicaus. Tgei fuorma san ins declarar cun quei paragraf? - La fuorma cun <mas>-, pronunzia [mǎs]-, pia la fuorma ladina. Il Grischun central ed il sursilvan han denton in [mɩs]- ni [mɩš]-, buc [mǎs-]. Sch'ins mira lu pli exact, ha ei era aunc auters en quei paragraf, ch'ein buc aschi unitars sco quei ch'igl ei indicau cheu. Danunder essas vus, Silvana? - Jeu pronuziel en scadin cas [kɩtšā], buc [kǎtšā], sco igl ei indicau cheu, e [kɩštī] e buc [kǎštī]. E tier il proxim indichescha la HLB lu era la scripziun <mischun> per S, mo ella prentenda lu tuttina, che la pronunzia seige "allgemein" cun [Ǎ], [mǎžun], quei che sa uss schon strusch constar. Sche tut pronuziuass [mǎžun], scrivess ins gie segir buc <mischun> el sursilvan. Pia el dretg liug essen nus schon sut "Anlautende Vokale": -A-, mo per [mɩs]- vein nus aunc buc il dretg paragraf. Lez ei lu pér sin l'autra pagina, il 261b, nua ch'ei stat lu: "Folgende Beispiele haben Ǎ- zu -ɩ- geschlossen: igniu, ch'ei tgei? In uaul dad ogna, puter 'las agnas', sco 'pigniu' in uaul da pegns. Lu 'izun', ladin 'uzun' "Heidelbeere", 'iral, ischel'. Lu vegnan era da quels che stattan cun [Ǎ] sin tschella pagina: [kɩtšā], [kɩštī], mischun. Ualti alla da quei paragraf vegn lu aunc indicau: Typisch ist die Schliessung des Ǎ- zu -ɩ- in S und C vor ts-, vor j- oder ġ-, dieselbe Schliessung in S vor s- und den Palatalkonsonanten š-, - ž-, -tž- und ñ-, mintgamai cun exempels che jeu lasch cheu. Avon certs suns stat pia [ɩ] enstagl [Ǎ] en quella posiziun. Per las fuormas cun [mǎs]- fuss pia da citar 261a, per quellas cun [mɩs]- ni [mɩš]- il 261b. La descripziun fuss pia, sch'ins parta da 'mislar': -A- > -ɩ- en 1. silba nunacc. av. s-, HLB 261b. Il medem valess era per 'mischlà', mo ch'ei fuss lu avon [š]. Aunc pli correct fuss secapescha sch'ins indicass tut ils suns, nua che A- daventa ɩ- enstagl Ǎ-, ed aunc pli ruffinau, sch'ins schess vegnir il sun igl emprem Ǎ- e pér suenter -ɩ-, perquei che quei ei claramein in svilup secundar, mo cun quei che stat cheu, fuss jeu schon cuntents. Per il resultat Ǎ- fuss la descripziun empau pli sempla: -A- > -Ǎ- en 1. silba nunacc., HLB 261a. Gliez ei effectivamein la regla da basa, ed igl -ɩ- avon suns palatals, [s] e [ts] in svilup ulteriur, ch'ei, auter ch'avon [ġ] e [ts], restrinschius silla Foppa e Lumnezia, tenor la HLB. Tier 'mislar' han ins denton era [ɩ] el Grischun central, quei ch'ei buc indicau cheu. Il plaid 'mischlà' ei puspei buc numnaus cheu, aschia ch'ei dat era negin renviament egl index sin quei paragraf ella HLB. Cheu ston ins pia anflar or sez il liug, nua che quei ei tractau. Aunc damondas tier quei sun? Lu igl X-. Nua mireis? En scadin cass sut "inlautend", mo "einfache Konsonanten, Dopplekonsonanten" ni "Konsonantengruppen"? Konsonantengruppen. Foneticamein ei igl X [ks], pia ina cumbinaziun da [k]+[s] che vegn mo scretta cun in sulet bustab, oriundamein probablamein ina ligatura. Tier las gruppas ei la successiun ualti cumplexa. Igl emprem vegnan "Bilabiale + Kons.", lu "Dentale + Kons.", lu "Velare + Kons.". Enconuschis la terminologia fonetica? - Schiglioc dei in'egliada en x-ina grammatica; las biaras han enzanua quels tiarms. Ella 'Grammatica per l'instrucziun dal rumantsch grischun', ch'ei sin nossa pagina da seminari, dat ei era ina tabella en 304, ch'ins sa era cargar giu. Sut velars + consonant ei [ks] lu era d'anflar, cun renviament a p.322. Leu stat lu gest all'entschatta: "-X- ausser vor Ī- ist generel regressiv zu s- assimiliert". Quei ei formulau empau cumplicau. Il svilup vegn schon ad esser ius da [ks]- a -[ss]- e lu ad

6 SMA 11 S- 36 [s]-. Il [k] ei pia s'assimilaus agl [s], e l'assimilaziun ei pia stada "rückwirkend" ni cul tierm tecnic 'regressiv'. Ina assimilaziun progressiva vess dau [k]-, perquei ch'il secund bustab fuss vegnius assimilaus agl emprem. Quei tonscha en principi, nun ch'ins vess in Ī- liung latin che suandass. Lu mass el tenor 445b, ed il resultat fuss lu [š]. Gest gliez vein nus lu era en 'mischlà'. Tuttina vegn ins buc a saver metter quella fuorma en quei paragraf, perquei ch'igl I- da MAXIL- LĀREM ei buc mo buc liungs, mobein stat era en posiziun nunaccentuada. Ei dat in cass en quei paragraf, nua ch'igl I- ei era buc liungs ed en posiziun nunaccentuada, numnadamein *AXILŌNEM, il secund, che dat 'schalun' "Sensenstiel", mo quel ei derivaus dad 'ischel' ed ha il [ž] da siu plaid da basa. Cun quels paragrafs ei il [š] da 'mischlà' buc da declerar. Cun lez stuein nus lu pia mirar da vegnir en autra moda e maniera a riva. Resta pia: -X- > -s-. Sch'ins vul aunc precisar la caussa san ins aunc aschuntar, sco la HLB, "danor avant Ī- (lung)" e renviar a HLB 445a. Aunc damondas tier quei pass. Lu vegn igl I- cuort da MAXILLĀREM. Nua encuris? - Igl emprem inaga sut 'Unbetonte Vokale'. Il tun vegn sigl Ā- liung, pia 'vortonig'. Cunquei ch'ei dat aunc in'autra silba nunaccentuada avon igl I- eis ei buc in "anlautender Vokal", pia sto ei esser in "nachnebentoniger Vokal"; igl emprem A- vess lu in "Nebenton", ed il 'Hauptton' fuss lu sigl Ā- liung. Igl E- ed I- ein tractai p 187. Leu stat lu en 253: "Nachnebentoniges E-, -I- ist in Erbwörtern gefallen". Igl emprem exempel ei puspei buc fetg buns, perquei ch'el ha treis silbas avon igl accent, mo CEREBĔLLUM > tschurvi/tscharvè ei lu in bi exempel, nua ch'il secund vocal nunaccentuau ei svanius. Pli clars ei aunc igl exempel sin p.188: LARICĀ- TUM > largau /largià ha ina structura fetg semeglionta a MAXILLĀREM, ed ins vesa clar e bein, ch'igl I- ei svanius, pia il secund vocal, buc in auter. La regla constat pia, mo sch'ins vul lu declarar quei cun "Nebenton" ei lu aunc in'autra damonda che jeu laschel cheu. Era quella regla ei pia clara: -I- > Ø: sincopà en 2. silba pretonica, HB 253. Lu igl LL-. Nua mireis lez? Sut "Doppelkonsonanten", e leu ein els numnai cun renviament a p.306. Leu stat en 413a: -LL- ist ausser vor (langem)-ī- als lerhalten. Cass specials ein lu aunc ĂLLUM, -ĔLLUM, -ĬLLUM, -ŬLLUM, mo tut quei vein nus buc cheu. Pia ei quei il dretg paragraf, ed il resultat ei l-, pia: -LL- > -l-: danor avant Ī- HLB:413a. Uss dat ei mo aunc in pign problem; nus vein uss sco resultat sl-, perquei che X- dat s-, -I- croda ed LL- dat l-. Cun quei vein nus lu ina "Sekundäre Konsonantengruppe", che la HLB tracta specialmein sin p , sco ch'ei resorta dil cuntegn p.9. Effectivamein sa ei schon aunc dar svilups supplementars en quels cass. Nua savess ins forsa anflar enzatgei davart la gruppa secundara -s'l-? Quei mass sut "Spiranten + Konsonant"; [s] ei in spirant, pia p.414. Leu anfl'ins lu era sin p.415 l'indicaziun S'L-; igl apostrof denter S ed L singifichjescha, ch'enzatgei seigi eliminau leu. Tenor la regla resta sl-, mo aschi clars ein lu ils exempels buc. Il pli clar ei aunc 'isla' sco num, 'insla' cun refatg igl n-, mo ei dat era 'ischla' ell'engiadina bassa. Lu vegn nies cass, cun 'mischlar' ella Cadi, 'mislar' ni 'masler' els auters territoris. Uorschla ha lu puspei [š], mo cheu savess igl r- ver giugau ina rolla. Per sursilvan datti aunc 'Mariuschla' < 'Mariurschla', era cun [š]. 'crous-

7 SMA 11 S- 37 la' ha -[zl]- enstagl [sl]-, mo en scadin cass buc žl-. Pli derasaus ei schon il resultat [sl]-, mo ei dat buc mo la fuorma 'mischlà' sco excepziun. Cheu ei MAXILLĀREM lu era numnaus, ed ins anfla lu era ils dus plaids egl index cun renviament a quei paragraf. L'indicaziun fuss pia en scadin cass: -s'l- > [sl], per regla, exc. era -[šl], HLB 625a. Cun quei vessen nus lu ton la fuorma 'mislar/masler' sco la fuorma 'mischlà', lezza semplamein sco exepziuns. Aunc damondas tier quei sun? Lu vegn igl Ā-. Nua mireis quel? Quei ei uss in A- accentuau en silba aviarta. En lezza seria stuess el esser "vor Liquid"; -l- ed r- ein liquids, pia p Effectivamein anfl'ins sin p.35: "-A- nach nicht palatalem romanischen Konsonant und vor R-", pia in cass fetg special. Leu ha ei lu num: "In Erbwörtern ist A- nach nicht palatalem Konsonant und vor R- überall ausser in C51, C10 und Eo" konserviert". Leu han ins lu in pulit diember d'exempels, denter quels era MAXILLĀREM > mischlà, mislar. Quei ch'ins anfla denton buc cheu ein las fuormas sin ḕr ladinas. Igl ei clar, che lezzas san buc star cheu, perquei ch'ei va cheu per cass, nua ch'igl A- ei semantenius. Lezzas stuess ins pia anflar enzanua auter. Normalmein ein quellas excepziuns numnadas mintgamai el medem paragraf sut b, mo gliez ei buc il cass cheu. Tgei che Aavon R ha dau ella medema posiziun en C51. C10 ed Eo. hai jeu buc anflau ella fonetica, mo cheu vala la regla generala che A- daventi [ē] en quella posiziun en quels loghens. Cheu ves'ins lu ils avantatgs da reglas generalas; lu ston ins buc indicar quei svilup adina puspei e sa lu era buc emblidar da numnar el en in liug ni l'auter. Effectivamein anfl'ins egl index dalla HLB 'mischlà' cun renviament a quei paragraf, denton negin renviament per il svilup Ā- ad -ēsut il cavazzin 'masler'; leu anfl'ins mo in renviament al 625a che nus vein tractau avon. Ei resta pia nuot auter che da fixar la regla: -Ā- > -a- avon R, sch'i na preceda betg in cons. palatal, HLB 17a La varianta putera vess lu aunc ina varianta generala: -Ā- > -ē- en silba averta. Quei svilup ei lu tractaus en plirs loghens ella HLB, p.ex. en 3b, sco nus vein viu, en 11b, 12b, 14b, 16b e forsa aunc en plirs loghens, denton mitgamai sut cundiziuns specialas, ch'ins savess denton generalisar. In clar renviament da quei svilup avon R savess jeu denton uss buc indicar, malgrad ch'el ei fetg frequents tier ils verbs sin ĀRE. Puter 'der' e 'fer' e 'dschler' ein numnai en quei paragraf, aschia ch'ins stuess renviar q quei paragraf per quels, mo puter 'masler' buc. Aunc damondas tier ĀREM? -