SA 10 L- 1. La descripziun linguistica dal rumantsch

Transkript

1 SA 10 L- 1 La descripziun linguistica dal rumantsch Ei dat ozildi fetg biaras differentas metodas da descriver in lungatg. Quei semuossa lu era en differentas denominaziuns supplementaras al tierm tud. 'Sprachwissenschaft' ni pli tard lu 'Linguistik', sco 'Historische Sprachwissenschaft, funktionale Sprachwissenschaft, strukturale Sprachwissenschaft, Transformationsgrammatik, Dependenzgrammatik, Soziolinguistik, Kontaktlinguistik, Psycholinguistik, Textlinguistik, kognitive Linguistik, Neurolinguistik, Computerlinguistik', eav.. Jeu hai schizun in cudisch cul tetel 'Praktische Linguistik', cul suttetel "Eine Einführung in die Linguistik für Logopäden und Sprachheillehrer". Quei ei segir buc tut quei ch'ei dat sin quei sectur, mo igl ei en scadin cass schon memia bia, ch'ins savess tractar tut quei en ina lecziun dad in semester. Plinavon giogan mo fetg paucas da quellas linguisticas insumma ina rolla per la descripziun dil romontsch, aschia ch'ins vegn schon a saver serestrenscher en quei rom sin las "linguisticas" las pli frequentas. Quellas selain plinavon reparter en duas gruppas, ch'ins sa numnar ad interim inaga 'linguistica tradiziunala' e 'linguistica moderna', aschia ch'ins sa lu era seconcentrar per entscheiver sin las differenzas fundamentalas da quellas duas gruppas. Quei tonscha lu bunamein per igl entir semester, aschia ch'ei vegn strusch a restar la massa temps dad entrar en detagls per las biaras sutgruppas dalla linguistica, cunzun ch'ellas giogan era praticamein negina rolla per la descripziun dil romontsch. Quei savein nus pia surschar als scienziai d'auters lungatgs, ch'han schon tontas descripziuns da lur lungatg, ch'ei san sespecialisar sin aspects empau pli exotics che quei ch'ins sto far el romontsch. Ei vegn pia buc ad ir per tractar singulas metodas pli da rudien en quei semester, mobein per mussar cun in pèr exempels las ideas fundamentalas che stattan davos entginas da quellas metodas. Gest quellas ideas fundamentalas sur dil lungatg ein semidadas radicalmein dapi ils onns 70 dil 20avel tschentaner, aschia ch'ei dat era tiels linguists sezs ina clara ruptura denter quels ch'han studegiau avon ils onns 70 e quels ch'han studegiau suenter. Ils onns 70 han ins denton pér entschiet a s'occupar ellas universitads svizras cun quei ch'ins numna ozildi 'linguistica moderna', e lezza ha lu aunc duvrau in pulit temps, tochen ch'ella ei lu entrada tec a tec en bunamein tut ils roms universitars. Gest sin las differenzas dil pugn da vesta dil lungatg da quellas duas "scolas" linguisticas less jeu far attent vus specialmein el decuors da quei semester. Per quei tema vev'jeu a disposiziun pli baul dus semesters, mo a caschun dalla restructuraziun dalla facultad ha il romontsch piars empau da sia autonomia pervia dil diember relativamein pign da students. El fa uss part dalla domena 'Plurilinguitad e didactica da lungatgs', aschia che jeu stos era far ina lecziun per quella domena da temps en temps. L'auter semester ha Rapahel Berthele, il professer da quella domena, in semester liber, aschia che jeu hai stuiu tscherner in tema che pudess era interessar ses students. Il pli interessant vi dil romontsch per linguists d'ordeifer ei actualmein l'introducziun d'in lungatg da standard, pia dil rumantsch grischun, aschia che jeu tractel lu quei tema gl'auter semester. Gliez stos jeu lu far per tudestg, per ch'eventuals students da quei rom sappien era suandar la lecziun. Ina ni l'autra domena linguistica vegn perquei probablamein a vegnir empau a la cuorta quella gada. Ei va denton, sco gia detg, en emprema lingia denton per introducir vus els principis fundamentals dalla linguistica e buc en tut las enco-

2 SA 10 L- 2 nuschientschas che quella disciplina ha contonschiu denton sin tut ils secturs. Lu tiel tema. L'historia dalla scienzia da lungatg ni 'linguistica' el senn general dil plaid, ei nuota aschi veglia sco quei ch'ins tratga forsa, silmeins sch'ins capescha 'scienzia' el senn sco quei plaid vegn capius ozildi. Quella scienzia ei en sesez in affon dalla romantica tudestga da l'entschatta dil 19avel tschentaner, ed ils Tudestgs ein lu era stai duront igl entir 19avel ed aunc a l'entschatta dil 20avel tschentaner dominonts en quella scienzia. Quei vala buc mo per la germanistica da quei temps, mobein era per l'indogermanistica, tier la quala nus vegnin lu era aunc cuortamein, e schizun per la romanistica. In'entira roscha dad ovras da standard dalla romanistica, era dil franzos e talian, ei scretta da Tudestgs. Ei dat p.ex. ina Historische Grammatik der Französischen Sprache da W. Meyer-Lübke ed ina Historische Grammatik des Italienischen da Gerhard Rohlfs, domisduas screttas da prominents romanists. Ellas ein denton screttas per tudestg, buc el lungatg roman ch'ei tractan, quei che fa lu magari difficultads als romanists franzos e talians, che san per part gnanc leger las ovras fundamentalas sur da lur lungatgs. Schizun ella retoromanistica ein ils tudestgs representai detg pulit. L'emprema descripziun grammaticala scientifica dils dialects romontschs anfl'ins ella Rätoromanische Grammatik da Theodor Gartner, in Austriac. Quella grammatica ei cumparida 1883, ei denton vegnida restampada 1984, aschia che jeu hai in exemplar da quella. Il medem ha publicau 1910 in 'Handbuch der rätoromanischen Sprache und Literatur', ch'ei era aunc oz in'ovra da standard per la linguistica tradiziunala romontscha. Secapescha ch'ei ha era dau gia avon il 19avel tschentaner ponderaziuns davart il lungatg e descripziuns grammaticalas dil lungatg. Ella tradiziun occidentala van ellas anavos, sco bunamein tut, sils Grecs. La distincziun denter nomen (= onoma), numnaus ozildi ella grammaticografia romontscha normalmein 'substantiv', e verb (= rhēma) para dad ir anavos sin Plato, sch'ella deriva buc d'in autur aunc pli vegl, dil qual las scartiras ein idas a piarder denton. Plato distingua denton mo quellas duas specias da plaids; il rest interessescha tut semplamein buc el. Sia definiziun ei secapescha era autra ch'ozildi, e surtut eis ei ina definiziun che sebasa sin ponderaziuns dalla logica, ina sutpartiziun dalla filosofia, buc sin ponderaziuns linguisticas. 'Nomens' ei per el quei che numna las caussas, dallas qualas ei vegn detg enzatgei. Grammaticalmein schess ins ozildi plitost 'subject' a quei. 'Verbs' ein quellas parts dalla construcziun che din enzatgei sur dil subject, ozildi il 'predicat'. Ei setracta pia aunc buc da 'specias da plaids' el senn actual, ed era buc da funcziuns sintacticas, sco 'subject' e 'predicat', mobein da categorias logicas. Quella derivaziun dalla filosofia san las specias da plaids aunc adina buc snegar, perquei vegn ins era mai a riva da definir las specias da plaids exactamein. Sin categorias linguisticas san ei buc sebasar. In bien exempel per demussar quei ei il sintagma tudestg der gefangene floh. Ell'ortografia tudestga vegnan ils nomens resp. ils substantivs screts grond. Tgei ei pia da scriver grond en quei sintagma? - Ei dat duas pusseivladads: u 'der Gefangene floh' ni 'der gefangene Floh. Tut leusuenter sa pia la medema fuorma esser ton subst. sco enzatgei auter. Da quei dat ei secapescha era el romontsch. 'bien' ei p.ex. usualmein in adjectiv, en ina construcziun sco 'Fai il bien e lai il mal, truscha la supp' e mett'en sal' ei 'il bien' denton secapescha in substantiv. Ins numna lu quei 'in adj. substantivau'.

3 SA 10 L- 3 Schon la denominaziun muossa, ch'ei sa buc setractar da categorias formalas strictas tier las specias plaids, inherentas al lungatg. Igl ei categorias che mischeidan fuorma e funcziun, e per part era aunc significaziun, e cun da quellas mischeidas survegn ins adina difficultads. Jeu less mo citar cheu la definiziun digl 'adverb' ord il cudisch 'Partenza', il cudisch da lungatg sursilvan dalla scola secundara. Leu ha ei num: Il plaid adverb di a nus che tal vegni aschuntaus ad in verb, sa denton era vegnir aschuntaus ad in adjectiv ni ad in auter adverb. (p.57). Cheu muossa gia la definiziun, che la denominaziun 'adverb' ei tut auter che logica, viu dil sistem dil sursilvan ano silmeins. Quella specia da plaids savess era ver num 'adadjectiv' ni 'adadverb'; ella sa gie era star tier adjectivs e tier adverbs tenor la definiziun. La formulaziun acceptass jeu denton aschia ni aschia buc da vus: 'che tal' ei pur stil administrativ, e sintacticamein ei la construcziun 'Igl adverb di a nus che..., sa denton era', semplamein fallida. Autras denominaziuns grammaticalas ein aunc bia pli nunlogicas, p.ex. 'accusativ', che vul dir oriundamein 'casus da l'accusaziun'. Il tierm latin sebasa sin ina translaziun fallida dil tierm grec per quei casus. Per cletg capesch'ins ozildi buc pli la significaziun oriunda dil plaid 'accusativ', aschia ch'ins sa silmeins buc scriver pli: Igl accusativ ei, sco il num di, il casus da l'accusaziun. La denominaziun greca ei "casus digl effectuau", e bia meglier ei gliez era buc. Il medem vala per autras denominaziuns. 'verbum' p.ex. vul semplamein dir plaid per latin, e 'plaids' ein gie era quels che s'audan tier in'autra 'specia da plaids' ch'ils verbs. La terminologia grammaticala, sco nus duvrein ella oz, ei per gronda part vegnida fixada dils Alexandrins, ils emprems filologs, el 2. tschentaner a.c., secapescha per descriver il grec e buc il romontsch; lez deva ei aunc buc da gliez temps. Lezs eran tuttina schon vegni sin 8 specias da plaids, schegie buc culla medema repartiziun dils plaids sco ozildi. Ils grammatichers latins han surpriu il sistem dils gammatichers alexandrins praticamein en tut ils detagls, mo ch'ei han translatau ils tiarms grammaticals grecs el latin, per part era cumpletamein falliu, sco nus vein viu tier igl 'accusativ'. Quella transposiziun ei aunc ida senza difficultads pli grondas, perquei ch'il latin veva in sistem relativamein semegliont al grec. Dils grammatichers latins ei quei sistem da descripziun lu ius viaden els lungatgs moderns e viva pruamein vinavon, malgrad che lezs han per part tut auters sistems linguistics ch'il latin. Ils lungatgs romans han p.ex. negina declinaziun, ferton ch'il latin ha ina declinaziun fetg cumplexa cun p.ex. autras fuormas da declinaziun pils pronoms che per ils nomens. Perquei dat ei lu era buc paucas difficultads da descripziun els lungatgs moderns cun quei sistem, sco nus vegnin lu aunc a veser. Ei dat era lungatgs moderns, ch'han puspei empruau da translatar quels tiarms el lungatg descret, sco p.ex. il tudestg. Gliez vessen ei denton fatg meglier da schar star; ei dat mo aunc dapli confusiuns. Ella quarta ediziun dalla grammatica dil DUDEN da 1984, ein ins lu era turnaus definitivamein anavos tier las denominaziuns latinas. Tier 'Verb' vegn p.ex. indicau en ina annotaziun en lezza ediziun dalla grammatica dil DUDEN: Andere, weniger angemessene Bezeichnungen sind Zeit-, Tätigkeitsoder Tuwort., ina annotaziun ch'ins anfla aunc buc ella tiarza ediziun. Ella 5avla ediziun da 1995 ha ei schizun num: Andere, weniger angemessene Bezeichnungen (vor allem in älteren Schulgrammatiken) sind Zeit-, Tätigkeits- oder Tuwort. En principi constat quella annotaziun era buc; la designaziun 'Verb' era oriundamein nuota pli adattada per designar ils verbs che las denominaziuns tudestgas sco 'Zeitwort' etc. Ozildi ha ella denton il grond avantatg ch'ei se-

4 SA 10 L- 4 tracta mo d'in num pli e che mo paucs san, tgei che quei plaid significhescha effectivamein. Ei ha era dau emprovas da definir las specias da plaids da niev sin basa dil lungatg che vegn descrets, pil tudestg p.ex. da Hans Glinz, dil reminent in Svizzer. Alla fin dils onns 70 ei sia classificaziun e sias denominaziuns schizun i viaden els cudischs da scola da tudestg. Cunquei ch'in carstgaun normal empren denton pli ch'in lungatg en sia veta, ha quei lu menau ad in schischuri terminologic e classificatori aunc pli grond che quei ch'el era schon avon. Denton ein ins era turnaus anavos en Svizra tier la terminologia tradiziunala, ch'ha silmeins igl avantatg dad esser en biars lungatgs tuttina, era sch'ella zuppa tscheu e leu differenzas ualti fundamentalas dallas caracteristicas d'ina specia da plaids d'in lungatg a l'auter. Mo sia simplificaziun da quellas specias da plaids ei lu tuttina aunc restada tochen sil di dad oz. Las biaras grammaticas distinguan ozildi mo pli tschun specias da plaids, e la definiziun da quellas specias ei lu dil tuttafatg differenta dallas definiziuns tradiziunalas. Ei dat era per romontsch denton ina ni l'autra emprova en quella direcziun. Il 'Carnet accumpignont' tier il cudisch dalla scola secundara 'siat otg nov', cumparius 2003 en versiun surmirana e sursilvana, ha era mo 5 specias da plaids pli, e la 'Grammatica per l'instrucziun dal rumantsch grischun' schizun mo 4 pli, mo tier lezza vegnin nus lu aunc en auter connex il proxim semester. La terminologia da descripziun grammaticala ei pia per gronda part aunc in'ierta ord il temps prescientific. Ina part da quella terminologia ei vegnida creada oriundamein per basegns filosofics, buc linguistics. Quels tiarms ch'ein lu aunc vegni vitier tier ils Alexandrins per basegns linguistics, ein vegni creai per la descripziun dil grec, in lungatg cun in sistem ualti different da quel dils lungatgs actuals. Tiel transfer da quels plaids dil grec al latin ei lu era aunc capitau bein enqual malentelgientscha dil tierm e sistem oriund. Igl ei pia buc da smarvigliar, ch'ins vegn buc senz'auter a riva cun quei sistem terminologic per descriver il romontsch actual, sco nus vegnin aunc a veser. Quella terminologia ha denton igl avantatg dad esser relativamein universala, era sche las differenzas da quei che vegn mintgamai subsummau en differents lungatgs sut il medem tierm san esser ualti grondas. Quei ei lu era in dischavantatg da quei sistem, che las differenzas individualas da mintga lungatg van tgunsch a piarder, aschia ch'ins descriva lu buc pli il sistem dil lungatg ch'ins tracta, mobein in sistem abstract, che sa per part esser ualti lunsch naven dil sistem dil lungatg ch'ins vul descriver. Era da quels exempels dat ei el romontsch, sco nus vegnin era aunc a veser. Aschi lunsch mo fetg cuortamein tier las restonzas prescientificas ella linguistica actuala. Dat ei aunc damondas tier quellas? - L'entschatta dalla linguistica sco scienzia ves'ins en general, sco gia detg, pér el 19avel tschentaner. Quei ei denton per part era ina damonda dalla definiziun da scienzia. Ils grammatichers grecs e latins e pli tard era ils grammatichers dils lungatgs moderns tochen el 19avel tschentaner vevan secapescha era la pretensiun, che lur descripziun dil lungatg seigi scientifica. Ozildi ein ins denton d'in auter meini che quei ch'ins era da gliez temps, quei che pertucca l'argumentaziun scientifica. La basa da partenza dalla scienzia dil lungatg ei, sco gia detg, la romantica tudestga. La Tiara tudestga era da gliez temps dividida en ina massa principadis pli u

5 SA 10 L- 5 meins independents. Il soli communabel a tut quels stadis e stadisets era lur lungatg. Il lungatg ha perquei era stuiu surprender ina rolla ideologica essenziala per las emprovas d'unificaziun dalla Tiara tudestga, sco quei ch'el ha dil reminent era stuiu far ella Italia. Per saver surprender quella rolla ha el stuiu survegnir qualitads che lubeschan d'identificar lungatg e naziun. Perquei ein ins vegnius sill'idea, ch'il lungatg stetti en stretg connex cul caracter dil singul e dil pievel che tschontschi quei lungatg. Tut quels che tschontschien il medem lungatg hagien pia fundamentalmein il medem caracter e s'audien perquei era ensemen en in stadi. Las consequenzas desastrusas da quella idea han ins lu viu el nazionalsozialissem tudestg e sa veser aunc ozildi ella Jugoslavia. La scienzia linguistica naschenta ha lu era gleiti refutau quella idea dalla romantica. Il carstgaun e siu ambient influenzeschan bia pli fetg il lungatg ch'il lungatg il carstgaun. Deplorabel ei mo, che quella enconuschientscha ei aunc adina buca vegnida enconuschenta dapertut; ei dat aunc adina avunda da quels ch'argumenteschan cul lungatg sco olma dil pievel. Quella ideologia fallida dalla romantica ha denton era giu consequenzas positivas. Sin basa da quella han ins numnadamein entschiet a s'interessar pli fetg pil lungatg popular enstagl pil lungatg litterar, perquei ch'ins spitgava d'anflar el lungatg popular in lungatg pli genuin e perquei pli caracteristic pil pievel ch'el lungatg litterar. Il lungatg litterar tudestg era, sco tut ils lungatgs litterars da quei temps, influenzaus fermamein d'ina vart dalla scolaziun e cultura latina e classica, da l'autra vart dad elements surpri dad auters lungatgs da cultura, da gliez temps surtut dil franzos. Perquei han ins entschiet a rimnar praulas, sco las 'Kinderund Hausmärchen' da Jakob e Wilhelm Grimm, cumpari (Märchen) lu detgas, canzuns popularas, sco 'Des Knaben Wunderhorn - Alte deutsche Lieder', dad Achim von Arnim e Clemens Brentano, cumpari , insumma la tradiziun linguistica populara. Da quellas activitads ein era stadas viers la fin dil 19avel tschentaner, cugl retard usual romontsch da ver 80 onns, punct da partenza per la renaschientscha romontscha. La 'Crestomazia' da Caspar Decurtins, cumparida oriundamein en 12 volums ils onns , rimna gie era praulas e canzuns popularas, sper ina massada auter material. Quei interess pil lungatg genuin ha lu era menau alla tscherca e publicaziun da texts historics dil lungatg tudestg, igl emprem da texts en tudestg medieval. Cun quels entscheivan lu denton era gia ils problems per la teoria dil lungatg sco olma dil pievel. Il tudestg dil temps medieval ei aschia, ch'in contemporan capescha buca pli el senza problems, e pli lunsch anavos ch'ins va e pli difficultus ch'ils texts ein da capir. Quei meina lu al problem, ch'ins sto u era schar semidar l'olma dil pievel cun las midadas linguisticas, ni ch'ins sa lu buca prender pli il lungatg sco spieghel dil caracter d'in pievel, perquei ch'il lungatg semida, ed il caracter dil pievel buc, silmeins tenor tut ils pregiudecis buc. Perquei pren lu la perscrutaziun dil lungatg plaunsiu in'autra via che meina tec a tec alla scienzia linguistica tradiziunala. L'idea romantica, ch'il lungatg popular seigi pli genuins ch'il lungatg litterar, ha numnadamein era menau alla perscrutaziun da lungatgs che vevan insumma negina litteratura el senn dalla schinumnada litteratura biala, denter auter p.ex. dil sanscrit. Il sanscrit ei il lungatg dils vedas, ils pli vegls texts religius dallas Indias, e da lur interprets, ils brahmans. Ella religiun hinduistica gioga el pia la rolla ch'il latin ha giugau tochen avon in pèr decennis ella religiun catolica: El ei semantenius sco lungatg religius lungatg dil

6 SA 10 L- 6 clerus, mo buc pli sco lungatg plidau e scret dil pievel. Ozildi ei il sanscrit era lungatg surregiunal da l'elita inda sper igl engles. Quei lungatg era è vegnius enconuschents ella Europa entras ils Engles. In da lezs (William Jones) veva gia constatau 1786, ch'il sanscrit, il grec ed il latin hagien dapli semeglientschas, ton tiels tscheps dils plaids sco era ellas fuormas grammaticalas, che quei che la casualitad vessi saviu producir. La semeglientscha seigi aschi gronda, che negin filolog sappi intercurir quels lungatgs senza vegnir tier la conclusiun, ch'els derivien dalla medema fontauna, vul dir dil medem lungatg, in lungatg ch'ei detti forsa buca pli. Sco praticamein tut las enconuschientschas scientificas fundamentalas ha era quella duvrau bunamein 50 onns, tochen ch'ella ha giu fitgau pei avunda per revoluziunar la concepziun da lungatg dominonta. La cuolpa da quei retard ei segir dad ina vart l'idea romantica dil lungatg sco expressiun da l'olma dil pievel. En quella concepziun veva l'enconuschientscha, ch'il sanscrit, grec e latin derivien dil medem lungatg, negin plaz. Co duein era pievels aschi differents sco ils Inds, ils Grecs e Latins ver las medemas caracteristicas fundamentalas, la medema olma. Da l'autra vart valeva il hebraic sco mumma da tut ils lungatgs, perquei ch'ins saveva gie ver tschintschau el parvis mo hebraic. Il Diu dil Vegl Testament tschontscha gie era hebraic. Pér la perscrutaziun dils texts tudestgs vegls ha era aviert la via a l'enconuschientscha, ch'ils treis lungatgs numnai, sanscrit, grec e latin, denton era aunc auters lungatgs europès sco il tudestg, seigien effectivamein fetg parents in cun l'auter. Enten perscrutar ils texts vegls tudestgs vev'ins numnadamein fatg persenn, che pli lunsch ch'ins mava anavos el tudestg e pli semeglionts che quel vegneva als auters lungatgs numnai. Il svilup dil tudestg ha lu Jakob Grimm, il coeditur dallas 'Kinder- und Hausmärchen', descret en sia 'Deutsche Grammatik', 4 toms cumpari en emprema ediziun Cun quella grammatica ha Grimm fatg il pass digl interess romantic pil lungatg sco expressiun da l'olma dil pievel ad ina descripziun scientifica dil svilup dil lungatg duront plirs tschentaners. Denton era la perscrutaziun era buca stada eri sin auters camps, ed ins veva aunc anflau differents auters lungatgs parentai cun quels numnai tochen uss. Denter 1833 e 1849 cumpara l'emprema grammatica cumparativa da differents lungatgs parentai, scretta da Franz Bopp, secapescha era in Tudestg. El numna el tetel da sia grammatica ils sequents lungatgs parentai - jeu setegn vid sia successiun: sanscrit, zend, in lungatg ch'ins numna ozildi avestic. Quei ei il dialect il pli vegl documentau dil persan ni iranes actual, ch'ei in lungatg indogerman, buc in lungatg arab. En quei lungatg ein ils texts dil fundatur da religiun Zarathustra, ch'ha viviu ca. 600 a.c., screts. El ei fetg parentaus cul sanscrit e vegn perquei numnaus gest suenter lez el tetel dalla Grammatica da Bopp. Lu vegn il grec, latin, lituan, il lungatg dalla Lituania, in lungatg indogerman ualti arcaic, lu il gotic, in dialect german digl ost. En quei lungatg han ins ha ina translaziun dil Niev Testament, scretta entuorn 400 s.c., il pli vegl dialect german documentau, svanius pli tard. Lu numna Bopp aunc il tudestg, in representant dils dialects germans dil vest. Ils lungatgs numnai van pia geograficamein dallas Indias sur la Persia tochen tiel tudestg il pli el vest. Perquei han ins numnau quella gruppa da lungatgs parentai 'lungatgs indogermans'. Ils franzos ed engles ein buca propi stai cuntents cun quella

7 SA 10 L- 7 denominaziun; lezs numnan quels lungatgs 'langues indoeuropéennes' resp. 'Indo-European languages'. Ella secunda ediziun da quella grammatica cumparativa dils lungatgs parentai, cumparida , ei il tscherchel dils lungatgs parentai gia puspei slargaus per dus ulteriurs lungatgs, numnadamein igl armen, il lungatg dils Armens el nordost dalla Terchia ed el sid dalla Russia, e lu il slav vegl, la fuorma la pli veglia documentada dils lungatgs slavs actuals dil bulgar tochen tiel russ. Dils lungatgs econuschents da gliez temps mauncan mo pli ils lungatgs celts, che s'audan era tier quella gruppa, ed igl albanes, il lungatg dalla Albania, era quei in lungatg indogerman independent, buc forsa in dialect slav. Pli tard ein aunc vegni enconuschents il hettit, in lungatg historic ella Terchia actuala, plidaus leu, sper auters, denter 2000 e 1200 a.c. cun texts en scartira da cugn naven dil 18avel tschentaner av.c., e lu il tochar, in lungatg historic en China, pia aunc pli lunsch egl ost ch'igl ind. Quella genesa dalla scienzia linguistica ha determinau temas e metodas da quella scienzia bunamein totalmein duront pli ch'in tschentaner. La linguistica ch'ei seresultada en quei svilup ei perquei en emprema lingia ina linguistica historica. Q.v.d., ella s'interessescha specialmein per la historia dils lungatgs, e bia meins per il stadi actual da quels. Sch'ella tracta fuormas e plaids d'in lungatg actual, lu plitost per declarar, co ch'igl ei vegniu historicamein tier quellas fuormas e tier quels plaids. Era pil romontsch ei vegniu fatg relativamein biaras lavurs sin quei sectur, ch'ein denton curdadas oz ualti en emblidonza, auter che tier ils specialists dalla linguistica historica. Las lavurs da Gartner hai jeu gia citau en passant; era sia 'Rätoromanische Grammatik' ei ina grammatica che declara, sin tgei che las differentas fuormas romontschas van anavos, buc sco ch'ei funcziunan el romontsch dalla fin dil 19avel tschentaner. Ei dat da quei temps era grammaticas romontschas che descrivan il lungatg actual, sco l'ortografia ed ortoepia del idiom romauntsch d'engiadin'ota da Zaccaria Pallioppi ni l'ortografia gienerala, speculativa ramontscha da P. Baseli Carigiet, mo lezzas ein lu buc fatgas da scienziai. Ei dat denton era scienziai indigens che fan lavursen quella direcziun, surtut dissertaziuns. La pli veglia da quellas ei Le parler de Sent, "Il dialect da Sent" da Chasper Pult, il tat dil Chasper Pult actual, publicada Era en quella lavur va ei buc per descriver il lungatg plidau da Sent da quei temps, mobein da declarar il svilup historic dil lungatg da Sent dil latin ni d'auters lungatgs tochen la fuorma actuala da quel. Quei succeda lu tec a tec era per entgins auters vitgs e regiuns, adina cun la mira da declarar il svilup specific dils suns latins el dialect che vegn gest tractaus. En tut dat ei ver 15 da quellas lavurs, ed ellas tractan differents loghens ni regiuns denter Tujetsch e la Val Müstair, denter quellas era ina sur dil dialect da Ramosch (K.D. Schneider, Die Mundart von Ramosch, Berlin 1968), che jeu hai denton aunc mai giu enta maun. Jeu vi buc entrar en pli bia detagls dallas prestaziuns da quella linguistica historica. Malgrad ch'ella ei ozildi empau ella defensiva visavi la linguistica moderna, vegn tuttina era aunc luvrau ozildi tenor las metodas dalla linguistica historica, era aunc el romontsch. In exempel per in'ovra tenor quella metoda ei il 'Dicziunari rumantsch grischun', l'ovra principala dalla linguistica historica romontscha, abreviaus DRG. Il material per quei dicziunari ha Robert von Planta entschiet a rimnar 1899 sin basa privata. Dapi

8 SA 10 L , pia avon 106 onns, ha la Societad retorumantscha surpriu la responsabladad per quei dicziunari, perquei che Planta veva viu, che quei seigi ina interpresa che survarghi las forzas d'in singul. Entschiet a rimnar il material per quei dicziunari han ins pia 1899, ed igl emprem fascichel ei lu cumparius 1939, 40 onns pli tard. Uss eis el vegnius tochen tiel tom 13 e va denton dad A Maria, ei pia aunc ualti a l'entschatta dil bustab M. Il DRG ei ordinaus tenor il vallader, aschia ch'ins sto prender in vocabulari vallader per saver schazegiar, con lunsch ch'el ei denton. El PEER stat 'Maria' sin p.277 da 570. Il DRG ei pia aunc buc dil tut tier la mesadad dil vocabulari vallader. 25 toms dat ei pia segir tochen alla fin, probablamein dapli, perquei ch'ils artechels vegnan pli e pli liungs, pli lunsch ch'ins vegn el dicziunari. Sch'ei lavuran vinavon el tempo ch'ei han uss, e scrivan effectivamein mo 13 toms pli, vegness el alla fin en ca. 50 onns, mo jeu dubetel. Sch'ei vegnan mo da luvrar giu ton dil Peer sco quei ch'els han fatg el davos tom, che va da 'mai' tochen 'mani', quei che mo 8 paginas dil Peer, drovan ei aunc 36 toms, quei che dess lu 48 toms en tut. Sur dil senn da cuntinuar quella lavur savess ins discutar, mo quei schein nus cheu. Jeu hai copiau in exempel dil davos fascichel ch'ei cumparius, las indicaziuns tier in plaid relativamein sempel, 'marendar'. Jeu vi buc ir en tut ils detagls, mo far attent sin in pèr caussas tipicas per la presentaziun d'in plaid en in vocabulari historic.